Read Biblia Mixe de Quetzaltepec 2 Crónicas 34 Bible Online

2 Crónicas 34 - Biblia Mixe de Quetzaltepec bible

2 Crónicas 34

¹Tuktujk ënäty Josías jyëmëjt ko ojts tyëkë yajkutujkpë, i'px majktu'uk jëmëjt yajkutujky jam Jerusalén.

²Yë Josías oy winë tuuny ma Wintsënën, jëtu'un tä David oy winë tuunyën, mëti'ipë yë'ë y'ap'ajt y'ok'ajtën, Josías ka'ap yë jyot wyinma'any tkë'ëyäjky ma ëxëëkpën.

³Ma tyuktujk jëmëjtpetyën, ma Josías tyëkën yajkutujkpë, jää yë Josías ojts ëka'any yë Wintsën t'ixta'ay, mëti'ipë y'ëwtajtën yë y'aptëjk. E ma majkmäjtsk jyëmëjpetyën jää tjëpëjktaay ja Aserá y'awinax ets ja nyitsajptëjk ja ka'apë Wyintsënëtyën ets mëti'ipëjaty ënäty oytyunyën mëët yë pujxn, jampë yajpaatyën Judá ets Jerusalén,

⁴Ojts yajijtë'ëky may ja Baal ja wyintsë'këntyakn yë'ë wyintuuy. Ojts näjyëtu'un tukjijtëtyä'äy ja poom ja nyiwintsë'këntyakn. Ojts tjijtë'kta'ay, ja Aserá y'awinax, ja awinax mëti'ipë mëët pujxn y'oytyunyëtyën; tääts tukwojpëtyääy ets naaxwayën tuuntaay ets ojts jam twëjtëy ma nyaaxtëjkëtyën ja teetytyëjkëty mëti'ipë ënäty të tmo'otën ja wyintsë'kën ja ka'apë tiosëtyën.

⁵Yajnitooytyääy ja wyääy pyajk ja teetytyëjkëty, mëti'ipë myëtuuntën ja Baal ets Aserá jam ma ja wyintsë'këntyaknën, jëtu'un'äämpy tyajwatsy ja Judá kajpn ets Jerusalén kajpn.

⁶Näyjyëtu'un jam winë tuuny ma ja Manasés, Efraín, Simeón ets Neftalí y'itjotmën.

⁷Wa'ats tjijtë'ktaay ja wintsë'këntyakn, ja Aserá ja y'awinax ets ja naaxpotsy; xit ko'ow tuuntaay. Jyijtaay ja poom ja nyiwintsë'këntyakn maajaty ja Israel kajpnën. Ok ojts wyimpijnë jam Jerusalén.

⁸Ma myajkmokx tëkëëk jëmëjtpetyën, ma ënäty yajkutukyën yë Josías, ko ojts tyajwatsta'ay ja naax kajpn ets ja tsajptëjk. Ënät tkexy yë Safán, Asalías myaank; ja Amasías mëti'ipë jam kutuunk'ajtpën Jerusalén mëët ja jyääpyë Joah, Joacaz yë myaank, ets tkoj'oyëtëty ja tsajptëjk.

⁹E tyaapë ja'ayëty ënätyë ojts tninëjkxtë ja teety Hilquías ets tukë'ëtëjkëtyë ja meeny mëti'ipë ja ja'ay yajktën ma tsajptëjkën ets mëti'ipë ja Leví ja'ayëty ënäty të tyajmuktën ma ja Manasés ja'ayëtyën, Efraín ja'ayëty, Judá ja'ayëty, Benjamín ja'ayëty ets Jerusalén ja'ayëty, mëti'ipë wë'ëmtën jam Israel.

¹⁰E yë'ë nän ënätyë tyajnajxy ets tmooy ja ja'ay mëti'ipë nyi'ënä'ämëtyën ja tuunk ma ja tsajptëjk yajkoj'oyëja'anyën ets tmëjuytyëty ja tuunpë.

¹¹Tääts yajmooytyë ja meeny ja tsäjtspëtëjkëty ets ja pojtspëtëjkëty ets tjuytyëty mëti'ipë yajtunantëpën ma ja potsy yajtukpotsa'anyën ets ma ja tëjk kuwitsë yajpëjkta'aka'anyën, jä'ä ko ojts may wyintëkoy ko ja Judá yajkutujkpëtëjk jëtu'unyë t'ijxmajtstë.

¹²Ja ja'ayëty mëti'ipë ya'atë tuunk wyinkuwa'këtën akujk jotkujk tyuuntë; yë'ë ja tuunk nyiwintsën'ajtë Leví ja'ayëty, mëti'ipë xyëëwajtëpën: Jáhat ets Abdías, yë'ë Merarí y'ok'u'unk y'ok'ëna'k ets Zacarías; Mesulam, yë Quehat y'ok'u'unk y'ok'ëna'k. Yë'ë näjyëtu'un nyiwintsën'ajtë ma ja ja'ay jam winë tnitsëëmpätën. May ja Leví ja'ayëty mëti'ipë ijty ëëwtëpën, koowtëpën ets xuxtëpën; may mëti'ipë jaaytyëpën ets may mëti'ipë jä'ä ja tsajptëjk'aaw y'atënaaytyëpën.

¹⁴Tëkok, yë'ë ënäty yë meeny jap yajpëtsëëmtëp kaaxëjoty ma ja'ay ja meeny t'apëkëtën mëti'ipë yajktëpën ma tsajptëjkën ko ja teety Hilquías tpaty tu'uk ja noky ma jap myinyën kuja'ay ja Wintsën ja y'ënä'ämën tyiyajtën, mëti'ipë ja Moisés yajwë'ëmën.

¹⁵Tääts ënätyë tuk'ëwa'anëy ja Safán, mëti'ipë kyujääpyën winë ets tkë'ëmooy ja noky.

¹⁶E ja Safán ënätyë tuk'ëwa'anëy ja yajkutujkpë ets t'ënëmaay: Yajkutujkpë, ja mtuunpë tam ja tyuntë pyëktë akujk jotkujk ets jëtu'un jam tyuntë ijxtëm të yajtuk'ënä'ämtën.

¹⁷Tëë ja tyajwin'ë'tsmujkta'atë ja poop pujxn ets të tukë'ëtëkëtë ja ja'ayëty mëti'ipë nyiwintsën'ajtëpën ja tuunk.

¹⁸Ojts näjyëtu'un tuk'ëwaanë ko tëë ënäty ja teety Hilquías tu'uk ja noky tpaaty ets ojts tukwinkukajpxë ja yajkutujkpë.

¹⁹Ko ja yajkutujkpë tmëtooy wi'ix ja noky y'ënä'änyën, ënätyë t'akë'tsëy ja wyit,

²⁰ets ojts tuk'ëne'emy ja Hilquías ets ja Ahicam, yë myaank yë Safán ets ja Abdón, yë Micaías yë myaank; ja Safán mëti'ipë jääpyën ets ja Asaías mëti'ipë ja yajkutujkpë nyatënääpyën ets t'ënëmaay:

²¹Nëjkxtë timtyämyë yajnitëwëtë Wintsën mëët ëëtsëty ets mëët ja ja'ayëty mëti'ipë tsënaaytyëpën jam Judá, wi'ix ko ya'atë noky jëtu'un kyäjpxy; jä'ä ko wä'änxyëp yë Wintsën mëk ëëts'ajtëmë të xytyukjoot'anpëjkëmë mëët ko ja n'ap'ajt n'ok'ajtëmë ka'ap ojts tmëjpëjkta'aktë ja Wintsën ets ka'ap jëtu'un tuuntë tä ja ënä'ämën tëyajtën myinyën.

²²Ja Hilquías ets mëti'ipë ja yajkutujkpë ojts tuknipëkyën ya'atë tso'onk, ënätyë tsyo'ontë ets tninëjkxtë ja Huldá, Wintsën ja tyuunpë, Salum tyo'oxytyëjk, myaank Ticvá, y'okmaank yë Harhás, mëti'ipë nyiwintsën'ajtypyën ja wit tujkxy japë y'ityën tsajptëkoty. Yë Huldá jam ijty tsyëënë Jerusalén kajpnpë'am, e ko ojts tyajtëwtë ja jotmay,

²³tä y'ëtsoowëtë: Jëtu'un ja Wintsën y'ëtsoowinpity: Ënëëmëtë ja ja'ay mëti'ipë të mkäxëtën etsës winë xyajtëwtëty:

²⁴Ëjts mëti'ipë Wintsën'ajtpën jëtu'unës n'ëna'any: Ëjts nyajminäämpy tu'uk mëj ëyo'on ma mijtsën ets ma mnaax mkajpnën, jëtu'un tä jap tnikäjpxyën ja ëyo'on ma ja nokyën mëti'ipë ja yajkutujkpë të yajtukwinkukajpxën mëti'ipë jam Judá yajkutujkpën.

²⁵Mëët ko tëëjës xy'ijxtëkooy xyjyä'ätyëkooynyëtë ets ka'apës ja poom të xytyukwintoy të xytyukwino'oktë; ja wiinkpë ja wintsë'kën të xymyoonyëtë, mëti'ipës ëxëëk n'ijxypyën; paatykyëjxmës të njoot'anpëky ets ka'apës ja njoot'an nyaxa'any nijëna'a.

²⁶Paaty ënëëmëtë yë yajkutujkpë jampë y'ëne'emyën Judá, mëti'ipë të mkäxëtën etsës yaa xynyiminëty, ma ja nija'awën tsokyën wi'ix ja Wintsën y'ënä'änyën. Yë Wintsën, yë Israel ja'ayëty yë Tyios, jëtu'un y'ënä'äny: Mëët ko tëë xymyëtoow'ity mëti'ipë të myajtukwinkukajpxën,

²⁷ets ko tëë xyjyotmaypyiky ja aaw ayuk mëti'ipë të xymyëtoyën mëti'ipë ënäty tunan jatanëpën ma mijtsën ets ma ya'atë naax kajpnën ets mëët ko tëë xyjyotmayjyawë ets të mjë'ëy të myä'äxy; ëjts nän tyamës n'ijxkuk nja'akyukë tëkokyë ya'atë. Jëtu'unës ëjts n'ëna'any, mëti'ipë Wintsën'ajtpën.

²⁸Ko kë'ëmës nyajnikutukëja'any ets akujk jotkujk m'ookëty mtëkoyëty ets jam mnaaxtëkëty ma ja m'ap m'ok ojts nyaaxtëkëtën; jëtu'un nëjkx ka'ap xy'ixy ja ëyo'on jotmay mëti'ipë ënäty miimp këtakpën ma ya'atë naax kajpnën. Ja yajkutujkpë ja kyukäjpxy ojts ya'atë ja aaw ayuk tmëmintë ets tukmëmëtyaktë.

²⁹Tä ja yajkutujkpë tmëkajpxmujktaay ja mëjja'aytyëjk jampë yajpaatën Jerusalén ets Judá ets tyajtu'ukmujky.

³⁰Ënät ojts nyëjkxta'atë jam ma tsajptëjkën; ja yajkutujkpë, ja Jerusalén ja'ayëty, ja Judá ja'ayëty, ja teetytyëjkëty; Leví ja'ayëty ets ja pi'k ëna'këty mëjpë mutskpë yä'äypyë to'oxypyë; tä ja yajkutujkpë tukwinkukajpxëy ja mayjyä'äy ja noky wi'ixjaty y'ënä'änyën mëti'ipë ënäty të yajpaatyën jap tsajptëkoty ma Wintsën ja tyëjkën.

³¹Ënät ja yajkutujkpë wya'akë'ky jam ma ja potsy'ëjxën ets y'ënäny ko tpatuna'any ja Wintsën ja y'ënä'ämën kyutujkën ets ko winë aaw winëjot tmëmëtowa'any ja Wintsën ja y'ënä'ämën tyiyajtën, y'aaw y'ayuk ets y'ëëwtë'ëw kyajpxtë'ëwën, mëti'ipë jap miinpën kuja'ay ma ja nokyën.

³²T'ënëmaaytyääy näjyëtu'un ja Jerusalén ja'ayëty ets Benjamín ja'ayëty ko wä'än tnikajpxtë ko tmëmëtowa'antë ja Wintsën ets ko tpatuna'antë ja y'ënä'ämën tyiyajtën. Ja Jerusalén ja'ayëty ojts nikajpxtë ko tpatuna'antë ja Wintsën ja y'ënä'ämën tyiyajtën, ja Wintsën mëti'ipë y'aptëjk y'ëwtajtën.

³³Josías ojts tyajkupoky ja ëxëëkpë ja tu'unën kajpxën mëti'ipë ja naax kajpn ijty tyuuntëpën ets mëktä'äky ni'ënä'ämëy ets ja Israel ja'ayëty yë'ë t'ëwtatëty ja Wintsën. Mapaat yë'ë jyuuky'äjtyën ja ja'ayëty ka'ap ojts t'ëxmatstë ja Wyintsënëty, ja Wintsën mëti'ipë y'ëwtajtën ja y'ap y'okëty.