Read Biblia Mixe de Quetzaltepec 2 Crónicas 5 Bible Online

2 Crónicas 5 - Biblia Mixe de Quetzaltepec bible

2 Crónicas 5

¹Ko kyojtaay tëkokyë winë mëti'ipë ënäty ja Salomón të tni'ënä'ämën kyojëty ets ja Wintsën jä'ä yajtukmëyoxëty, Salomón ojts jap tsajptëkoty tmënëjkxta'ay winë; ja apëjk atu'unën mëti'ipë aak pu'ts pujxn mëët y'oytyunyëtyën, mëti'ipë ënäty ja tyeety David të tukmëyoxyën ja Wintsën ets jap tpëjktaktaay ma ja Wintsën ja jyëën tyëjkën ma jap winë nyipetyën.

²Ënät ja Salomón tyajmujktaay jam Jerusalén ja mëjja'aytyëjk ja kopktëjkëty ets ja yujkyä'kpëtëjkëty mëti'ipë ijtëpën jam ma Israel ja'ayëtyën ets tyajtsoona'antë ja Wintsën ja kyaaxë jam Sión, tmënëjkxa'antë ma ja David ja kyajpnën.

³Ma ja mëj xëëw ënäty y'apaatën, ma wyëxtujk po'opetyën jajëmëjt, tä tyu'ukmujktaaytyë tëkokyë ja Israel ja'ayëty mëët ja yajkutujkpë Salomón.

⁴Ojts myiinta'atë ja mëjja'aytyëjk, ja Leví ja'ayëty yë'ë kyiiyë'ktë ja kaaxë

⁵tu'ukyë mëët tyajnëjkxtaaytyë ja nyiwittëjk ma ja näpyaatë y'ityën mëët yë Wintsën ets tëkokyë jënu'un ënäty jap winë të tyunyën, tä ja apëjk atu'unën, tsim texy ets tëkokyë mëti'ipë ja Wintsën të yajtukmëyoxyën; yë'ë myënëkxtaaytyë ja teetytyëjkëty ets ja Leví ja'ayëty.

⁶Ja yajkutujkpë Salomón ets ja Israel ja'ayëty mëti'ipë ënäty të myuktën, aakjam yajpata'atë ma ja kaaxën, yë'ë jam yajktëp ja wintsë'kën may'äämpy; tä ja kupixynyën ets ja tsajpkaa yä'äyën.

⁷Oknëm, ja teetyëjk tkëëyë'ktë ja Wintsën ja kyaaxë mëti'ipë myë'ijtypyën ja käjpxytyu'unën ets jap tmëtëjkëtyë tsajptëkoty, jap ma ja ëmaaypyën ja tëkot ma këxkojy y'itën ja awinax jëtu'unpë kyëxë'ëkyën ja'ayën käkn mëëtpë,

⁸ya'atë awinax mëti'ipë jëtu'un këxë'kpën ja'ayën käkn mëëtpë, yenyëty ja kyäkn ënäty të yaj'oytyuntë, paaty ja yajxon tnixajtë ja Wintsën ja kyaaxë ets nyixajtaaytyëp mëët ja mëti'ipë yajtukpakëëpyën.

⁹Je'eyëp ko ja nyikepy ya'atë ja kaaxë yenyëty ijty oy, këxë'kp jappaat ma ja tëkotën mëti'ipë ëmaayën ets kënu'kxyën, jäpyë tëja'p ka'ap yaj'ixy; jëtu'un ojts wyi'imy, tyampaat je'eyëm jam jëtu'un.

¹⁰Ma ja kaaxën yi'iyë ënäty jap ijtp mäjtsk ja tsaatsetsy ma ja tëyajtën ojts ja Moisés tkëxja'ayën jap Horeb, ja tsaatsetsy mëti'ipë ojts ja Wintsën tni'ënä'ämën y'oyëty mëët ko ënäty ja käjpxytyu'unën të tuny mëët ja Israel ja'ayëty.

¹¹Ënät ja teetytyëjkëty jap pyëtsëëmtaaytyë ma ja tëkotën wa'atspë. Tëkokyë ja teetytyëjkëty tëë ënäty tpata'atë ja näypyuj näjyä'ätsë, ka'ap ënäty ninu'un të tjëjpye'eytyu'utë ja tyuunkëty mëti'ipë të yajtuknipëktën.

¹²Tëkokyë ja Leví ja'ayëty mëti'ipë ëëwtëpën, tä ja Asaf, Hemán ets ja Jedutún, mëët ja y'u'unk y'ëna'k ets ja jyiikytyëjk myëku'uktëjk, aakjam wya'ak o'oyëtyääytyë ma ja wintsë'këntyaknën aak xoxyëty mëët ja oywyit. Aaktam tmëët'atë ja xyuxnëty, kyä'tsnëty, y'akëty ets pyujxnëty mëti'ipë yaj'ënantëpën. Nimëko'px ja i'px ënäty jam näjyëtu'un ëpëky ja teetytyëjkëty mëti'ipë ja pujxnxuxn yaj'ënantëpën.

¹³Ënät tyëjkëtyë tu'knax xuxpë wojpë, ëëpë yaxpë; tukxoonta'aktë ja Wintsën ja xyëëw ets tyajnaxtë ja kukajpxën ja'awëkyëtakën; ja xuxn, ja ak ets ja pujxn awojpmujk jä'ä ja ëy tyukpa'ënantëp, jëtu'un y'ëna'antë: Win'ëw winya'axtë yë Wintsën, jä'ä ko oy yë'ë ets tsojkp ja'ap xëmëkyëjxm. Jää ma ënäty jam jëtu'un y'ëwtën ënät ja Wintsën ja myëj'ajtën tkejxy jap tsajptëkoty, jëtu'un tyajnaaxkëtäky tä tu'uk yoots nëma'ajën,

¹⁴e mëët ko jap wyintujktëkooy tsajptëkoty mëët ja yoots nëma'a, tääts ja teetytyëjkëty ka'ap ojts t'ëkjëkyäjpnëtë wi'ix ja wintsë'kën tkë'ëyaktëty jä'ä ko ja Wintsën ja myëj'ajtën y'oyajtën tëë ënäty ja tsajptëjk tyajwintuky.