Read Biblia Mixe de Quetzaltepec 2 Crónicas 7 Bible Online

2 Crónicas 7 - Biblia Mixe de Quetzaltepec bible

2 Crónicas 7

¹Ko ja Salomón kyajpxtaktaay, ënät jam tsajpjotm tsyo'ony mëj jëën ets tukkëtäky ja jëyujk'ooky mëti'ipë ënäty jam të yajpëjktä'äkyën ma ja wintsë'kën yajyäkyën ja nino'okpyë, tä ja Wintsën ja tyëjk tyuktujky mëët ja myëj'ajt y'oyajtën,

²mëti'ipë ojts t'ëtukyën ets ka'ap ja teetyëjk jap tyëkëtëty tsajptëkoty.

³Ko ja Israel ja'ayëty t'ijxtë ja jëën ets ja Wintsën ja myëj'ajt y'oyajtën mëti'ipë jap tsajptëkoty të kyëtä'äkyën, ënät koxtänë kya'ataaytyë, tyukpatëp ja wyimpok ja naax, t'ëwtajtë jëtu'un ja Wintsën ets tyajnajxtë ja kukajpxën ja'awëkyëtakën ma Wintsënën, tniwinpitë ja aaw ayuk ets y'ëna'antë: Jä'ä ko yë'ë janty'oy yë'ë ets tsojkp ja'ap xëmë.

⁴Ko jëtu'un tyuuntaay jyajtaayë, ënät ja yajkutujkpë ets ja naax kajpn tkë'ëyajktë ja wyintsë'kënëty ma ja Wintsënën mëti'ipë ënäty të tmëmintën.

⁵Ja yajkutujkpë Salomón ojts ja wintsë'kën tyäky, i'px mäjtsk mil ja tsajpkaayä'äy ets mëko'px ja i'px mil ja kupixyny. Jëtu'un ojts ja yajkutujkpë ets ja Israel ja'ayëty tnixëëwtuntë ets tkënu'kxtë ja Wintsën ja jyëën tyëjk.

⁶Ja teetytyëjkëty aaktam ënäty yajpata'atë ets ja Leví ja'ayëty aakmëët ja xyuxnëty kyowëty, mëti'ipë ënäty ja yajkutujkpë të tyaj'oyën ets tukpa'ëna'antë ja ëy mëti'ipë ënaanpën: Jä'ä ko yë tsyojkën jya'awën xëmëkyëjxm yë y'ity, ko ja David ijty mëët y'ëwtë. Ets ja teetytyëjkëty tim xux tim koowtëp jamëty, tyam ja mayjyä'äy jyänty ëwtë.

⁷Salomón ojts näjyëtu'un tkënu'kxy ja tsajptëjk ja nyitëja'aw itkujkpyë yajpaatyën mëti'ipë ënäty wintuuytsyow wë'ëmpën ma ja Wintsën ja jyëën tyëjkën, jam ja wintsë'kën tyäjky mëti'ipë nino'oky nixämyën ets näjyëtu'un tkë'ëyäjky ja jëyujk on ja tsajpkaa on, jä'ä ko jam ma ja tsuxkpujxn wintsë'këntyaknën ka'ap ojts y'ëkmëtaknë mëët ja maywyintsë'kën, ja aay ujts, ja aaypyajk ujtspajk ets ja may on mëti'ipë yajktëpën ja ja'ay nino'oky nixämpyë.

⁸Jä'ä xëëw jä'ä po'o ojts näjyëtu'un tnixëëwtuntë ja tëjkxo'omy, tëë ënäty myäymyintë ja ja'ay mëti'ipë tso'ontëpën Hamat ets jampaat ma ja wokjotmën mëti'ipë Egiptë nyitënääpyën.

⁹Komjëpom, ënät tu'uk ja mëj xëëw tyaj'apatëtyë, tëë ënäty y'ëkxëëwtuuntëpë wëxtujk xëëw ma ja wintsë'këntyakn tkënu'kxtën ets ojts ja wiinkpë tyajtso'ontakojnëtëpë nän wëxtujk xëëw tyajpoxtë ma tnixëëwtuntën ja tëjkxo'omy.

¹⁰Ma y'i'px tëkëëk anyën ja myëwëxtujk po'opë, jää ja yajkutujkpë ojts t'ënëmaaynyë ja mayjyä'äy ets ye'eywya'kxtaaynyëtëty ets wyimpijnëtëty jatëkok ma jyëën tyëjkëtyën akujk jotkujk, mëët ko të t'ixtë wi'ix ja Wintsën t'oyjyawën ja David, ja Salomón ets Israel kajpn.

¹¹Ko ja Salomón tkoj'apatëtyääy ja tsajptëjk, ja këmoontëjk ets mëti'ipëjaty nyipëjktakëyën tkoja'any,

¹²ënät ja Wintsën koots nyänyikëxë'kë ma yë'ëjën ets y'ënëmaayë: Tëës nmëtoy mjëëytyak mnu'kxtakën, e tëëtsës nwin'ixy ko yaa ma ya'atë itjotmën yaa ja nwintsë'kënës yajyakëty.

¹³Paaty ko ënäty ëjts jëna'a ja naaxwiinyëtë nyajtëëtsë'ëkyës ets ka'ap maa ja nëë tuu y'ëkyaj'ijxnë, ëkë ja pujtpë ënäty ja pëjktä'äky të tyajwintëkooytyä'äy, ëkë ja pa'am ëyo'on nkäxëtyës ma ja nnaax nkajpnënës,

¹⁴ets ja nkajpnës, maas ja nxëëw y'ityën, tyaj'oyëty ja jyot wyinma'any, tmëët'atëty ja naxym'aaw naxymjyot, tyëkëty jëëytyak nu'kxtakpë, t'ixta'ajëty ja näpyutëjkën ets t'ëxmatsëty ja ëxëëktu'un ëxëëkajpxën; ëjts nmëtowäämpyës jam tsajpjotm, mpokymyä'kxäämpyës ets jatëkok nmo'oja'antës ja jotkujk'ajtën ma ja nyaax kyajpnëtyën.

¹⁵Tyam nmëtowanëpës ja ëëwtak kajpxtakën mëti'ipë ënäty yaa yajtuunpën ma ya'atë itën,

¹⁶jä'ä ko tëëjës kë'ëm ya'atë it naaxwiinyëtë nwin'ixy, tëëjës kë'ëm nkënu'kxy ya'atë njëën ntëjkës, ma y'itëtyën ja'amyetsy winë xëëw winë jëmëjt ja nxëëwës. Xëmës nmëët'ata'any, nkëwent'ata'any winë xëëw winë jëmëjt.

¹⁷E mijts, pën jëtu'un winë oy xytyuny tä mteety David winë oy tuunyën, ko xypyatunëty ja n'ënä'ämënës ntëyajtënës ets xytyunëty jëtu'un winë tä të ntuk'ëne'emyën,

¹⁸ëjts nyaj'itäämpyës xëmë yë mkutujktakn jëtu'un tä ojts mëët yë David, yë mteety nkäjpxy'ätyësën, koos n'ënëmaay: ko jam ma kutujktaknën yë'ë y'u'unk y'ëna'k nëjkx jam xëmë yajpaatë mëti'ipë tyu'uwinwowtëpën ja Israel kajpn.

¹⁹E pën miitsëty xymyëjëkämkäktëpës ets ka'ap xy'ëktuunëtë jëtu'un tä ja n'ënä'äm ntëyajtënës jyaminyën, ni'ikyë ja wiinkpë ja wintsën xypyanëjkxtëjkënëtë,

²⁰miitsëty kopkpëky ko nëjkx n'ixkäxtë ma ja naax kajpnën mëti'ipë ënäty të njamo'otën ets njijtë'ëkäämpyës ya'të tsajptëjk mëti'ipës ënäty të njakënu'kxyën, mëti'ipë nëjkx je'eyë yajnëxi'iky yajtukxi'ikyën ma wiinkëtypë naax kajpnën.

²¹Ya'atë tsajptëjk mëti'ipë ënäty oy të jyakëxë'ëkyën, je'eyë nëjkx jyaak yaj'ixy tukpotsyën, potsykyutukën; ja ja'ayëty mëti'ipë ënäty y'ijxtëpën jëtu'un nëjkx y'ëna'antë: Wi'ix jëtää ko jëtu'un yë Wintsën tyaapë naax kajpn të tuunpë ets o'ktëy ja tsajptëjk të tuunë.

²²Ets nëjkx yaj'ëtsowtë, yë'ëkyëjxm jëtu'un të jyatë, jä'ä ko ojts t'ëxmatstë yë Wyintsënëty, ja Wintsën mëti'ipë ojts t'ëwtatën ja y'ap y'okëty, mëti'ipë jap Egiptë yajpëtsëëmëtën ets paaty näjyëtu'un ëxëëk të jyatë jä'ä ko wiink wintsën të tpanëjkxtëjkënëtë ets të tmëtuunëtë.