Read Biblia Mixe de Quetzaltepec 2 Crónicas 8 Bible Online

2 Crónicas 8 - Biblia Mixe de Quetzaltepec bible

2 Crónicas 8

¹I'px jëmëjt ojts nyäxy ma ënäty ja Salomón të tkojyën ja tsajptëjk ets ja kyutujkëntëjk,

²ënät tkojo'oyëtyääy ja kajpn mëti'ipë ënäty Hiram të tyukë'ëtëkëtyën ets jam tyajtsënaaytyaknpëjky ja Israel ja'ayëty.

³Ënät mëët tsyiptuuny ja Hamat, jampë Sobá kyukajpnëtyën, ets tpëjkëy ja kyajpn.

⁴Ojts näjyëtu'un tkoj'oyë ja Tadmor kajpn, jampë të'ëts'itjotm yajpaatyën ets tkoj'o'oyëtyääy ja kajpn ma ijty ja jë'kxy pëky tpëjkë'ëkyën, ma ja Hamat itjotmën.

⁵Ojts tkoj'oyë ja Bet-horón kajpn, ja anëkëjxytsyowpë ets ja Bet-horón kajpn ëpa'tkë'ëytsyowpë, mëti'ipë ta'tspëky kyajpnën, jä'ä ko napotsy ijty, yë'ë y'akaj'ajtëp pujxn,

⁶Näyjyëtu'un tkoj'o'oyëy ja Baalat kajpn ets ja wiinkëtypë ja kajpn ma ënäty ja jë'kxy pëky tpëjkë'ëkyën, tëkokyë ja jëën tëjk ma ja pujxnwintëkäämpë pëjkë'ëky y'ityën mëti'ipë myëtsiptuuntëpën ja tsiptuunpëtëjkëty ets ja jëën tëjk ma ja jëyujk yajpëjkë'ëktën mëti'ipë myëtsiptuuntëpën ets tëkokyë mëti'ipë ënäty të tuknipëjktaakën tkoja'any jam Jerusalén, jam Líbano ets maajaty ja naaxwiinyëtë tnitänën.

⁷E ja Hit ja'ayëty, Amor ja'ayëty, Heve ja'ayëty, Ferez ja'ayëty ets Jebús ja'ayëty, mëti'ipë të wyë'ëmtën ka'apë y'Israel ja'ay'atën,

⁸ja y'u'unk y'okëty mëti'ipë ojts jyaakwë'ëmtën, ja y'aptëjk ojts y'o'ktaaynyëtën, Salomón ojts ja mëkëtypë ja tuunk tmo'oy ets tyampaat je'eyëm myëtuntë ets mëkëty ja tuunk mëti'ipë tyuunk'ajtëpën.

⁹E ma ja Israel ja'ayëtyën ka'ap ojts nitu'uk yaj'atsip'aty ets myëtuntëty ma ja tuunk tyu'uye'eyën, je'eyë ojts tsyiptuntë, wyintsën'atë ets tnikopk'atë ja tsip ma ja pujxnwintëkäämpë yajkëwent'atyën ets ma ja tsiptuunpëtëjk yajtu'uwinye'eytyën.

¹⁰E ja mëti'ipë ojts ja Salomón tuknipëkyën ets ja tuunk tni'ënä'ämëtëty, jä'ä wyinë'ajtë mäjtsk mëko'px ja wëxtyikxy majk.

¹¹Salomón ojts ja faraón ja nyëëx jam tyajtso'onë ma ja David ja kyajpnën ets ojts tyajnëjkxy ma ja kutujkëntëjkën mëti'ipë ënäty të yajtuknikojën; jä'ä ko tyaa ojts myäy tyäjy ko ka'ap yowë y'oy'atëty ko jam tsyëënëty ma ja David ja kyajpnën, mëti'ipë të y'ityën ënä'ämpë yajkutujkpë ma ja Israel kajpnën, jä'ä ko maajaty ënäty ja Wintsën ja kyaaxë të yajmënaxyën aak kënu'kxy ja yajpaaty.

¹²Ja Salomón jam ijty ja Wintsën ja wyintsë'kën xëmë tyäk ma ja wintsë'këntyaknën mëti'ipë yajpatpën jam tsajptëjkwiiny,

¹³jëtu'un tä ënäty myinyën ni'ënä'ämë ma ja tëyajtënën mëti'ipë ja Moisés jyääyën: ma pokxn xëëwën: ko ja po'o pyi'k'aty ko tëkëëk'ok xyëëwtuntë winjëmëjtpë, ko ja tsajpkääky tnixëëwtuntën mëti'ipë ka'ap tsyooymyëëtëtyën, ma ja sëmaan tnixëëwtuntën ets ma ja tëjkxo'omy tnixëëwtuntën.

¹⁴Ojts näjyëtu'un ja tuunk tyajwa'kxta'ay jëtu'un tä ënäty ja tyeety David të tni'ënä'ämën ets ja teetyëjk yi'iyë ja tyuunk tyajtu'uye'eytyëty ets ja Leví ja'ayëty jä'ä wyin'ëw wyinya'axtëp ja Wintsën ets ko muum tputëkëtëty ja teetytyëjkëty ma muum myëyätyën. Ojts näjyëtu'un tyajwä'kxy ja tuunkj ets tpëjktaktaay ja ja'ay maajaty ja tëjk'aaw yaj'atänëja'anyën, jä'ä ko jëtu'un ënäty ja David të tuknipëjktaakë, mëti'ipë ja Wintsën ja'ayajtën.

¹⁵Ja ënä'ämën mëti'ipë ënäty ja David të tyajwë'ëmyën ojts tpatuunta'atë, ma ja teetytyëjkëtyën, ja Leví ja'ayëty ets ja mëti'ipë meeny pyëjkë'ktëpën.

¹⁶Tëkokyë mëti'ipë ënäty ja Salomón të tuknipëjktaakën tyaj'apaatëja'any ojts jëtu'un y'apatëtyä'äy, tyimtso'ontäky ja potsy ëjx ets koonëm wyimpëtsëëmy jyëjpëtsëëmy. Ja Wintsën ja jyëën tyëjk ojts ja yajkoj'apatëtyä'äy.

¹⁷Ënät ja Salomón tsyo'ony ets ojts nyijkxy jam Ezión-géber ets jam Elád, winkon ma ja mejypya'ajën mëti'ipë Edom nyitënääpyën.

¹⁸Ja Hiram ojts ja wyintsëntëjk tuknipëky ets tkejxy ja kepy nëëwinye'epyë ets ja mayjyä'äy mëti'ipë ënäty mëët tyuunmukyën, mëti'ipë nyija'awëtëpën ja mejy, tääts ojts mëët nyëjkxtë ja Salomón ja wyintsëntëjk ets jam jyajtë Ofir, jam tyajtso'ontë majkmokx tsim yë pu'ts pujxn ets ojts tmënëjkxtë ma ja yajkutujkpën Salomón.