Read Biblia Mixe de Quetzaltepec Esdras 10 Bible Online

Esdras 10 - Biblia Mixe de Quetzaltepec bible

Esdras 10

¹Tam ënäty ja Esdras jyiiytyä'äky nyu'kxtä'äky koxtänë ma Wintsën Tiosën jam tsajptëkotm, ko nyimiinë ja Israel ja'ayëty ye'etyëjkpë to'oxytyëjkpë, näjyëtu'un tyëjkëtyë jëëytyakpë nu'kxtakpë.

²Ënät ja Secanías, Jehiel yë myaank, Elám y'u'unk y'ok wya'akë'ky ets t'ënëmaay ja Esdras: Tëyajtën yë'ë ko ëëtsëty ka'ap oy ja Wintsën të nwinkutsë'ëkëtës, jä'ä ko ëëtsëty tëë mëët ja to'oxytyëjkëty mpëjknëtës n'uknëtës, mëti'ipë ka'ap nja'ay'ajtëmën ets ka'apë t'ëwtatën ja nTios'ajtëmë, je'eyëp ko ka'ap ënät ntimy ëna'anmëty tëë winë tyima'ta'ay, ka'ap, jaaktam'ajtpnëm ja nitsokën ets ja Israel ja'ayëty ëwaatsë'ajtën tpaatëty.

³Ëëtsëty tyamës nikajpxtë ko n'ëxmatsantëpës ja nto'oxytyëjkëty mëti'ipë ka'ap y'Israel ja'ayëtyën mëët ja y'u'unk y'ëna'këty, jëtu'un ijxtëm ja ënä'ämën tëyajtën jap myinyën mëti'ipë mijts mnija'apën, mëti'ipë Wintsën jyä'ä'ajtypyën.

⁴Pëtë'ëk, jä'ä ko mijts ya'atë mpatëp xytyunëty, tyam myajputëkëty, tun ja mëti'ipë mpatëpën.

⁵Ënät ja Esdras wya'akë'ky ets t'ënëmaay ja teetytyëjkëty ets ja Leví ja'ayëty ko tyunäämpy ja mëti'ipë ënäty të yajtuknipëkyën ets ni'ëmukë ja Israel ja'ayëty putëkëjantëp;

⁶Tä ja Esdras jam tsyo'ony ma ja Wintsën ja tsyajptëjkën ets ojts nyijkxy ma ja Johanán jap y'ityën, yë myaank yë Eliasib; jap ja tsuu tyajnajxy, ka'ap kyääy y'uky mëët ja monyëtukyë. Jä'ä ko jä'ä pya'ëyoopy mëti'ipë ënäty jatëkok të wyimpitën.

⁷Ënät yajmëkajpxmujktaaytyë ja ja'ayëty jam Judá ets Jerusalén, ets ye'eymyuktëty jam mëti'ipë të wyimpitën jatëkok nyaaxjoty kyajpnjoty ma ëxwopy ixkexy të y'itën.

⁸Ets ojts tkäjpxy'atë ko pën ka'ap t'aminë ja ye'eymyujkën, yajpëjkëp ja tsyënaaytyakn ets yaj'ëxwopëp ma ja naax kajpnën mëti'ipë ënäty të tjapaatyën jatëkok.

⁹Paatykyëjxm ja Judá ja'ayëty ets Benjamín ja'ayëty jam nyiye'eypyäjtaaytyë Jerusalén ma y'i'px anyën ja mëtaxtujk po'opë, ma tyëkëëkxëëwpetyën jëtu'un tä ënäty të t'awitstën ja xëëw ma ye'eymyuka'antën. Aakjam ja'ay nyaaxwä'tstaaytyë tsajptëjk'ëkë'ëm, aak tsëtyuuytyëp ja ja'ayëty mëët ja jotmay ets mëët ja nëë tuu näjyëtu'un.

¹⁰Ënät ja teety Esdras wya'akë'ky ets y'ënëmaayëtë: Miitsëty yë'ë të xytyëko'oyën'atë ko të mpëktë mëët ja to'oxytyëjkëty ka'apë y'Israel ja'ayëtyën, xyajkëjääjëtë jëtu'un ja nëë poky ma Israel ja'ayëtyën.

¹¹E tyam, yaa ma Wintsën wyintuuy, nikajpxtë ets mëmay mëtajtë wi'ix të mtëkoytyën ets xypyatuntëty mëti'ipë ja Wintsën yajkutujkpyën. Jëwa'aktë jam ma ja'ayëtyën mëti'ipë ëxëëk ja jyot wyinma'anyëtyën ets ëxmatstë tääpë to'oxytyëjkëty mëti'ipë ka'ap y'Israel ja'ay'atën, mëti'ipë wiink wintsën y'ëwtajtëpën.

¹²Ets ja ja'ay mëk myäy'ëtsoowtë: Ntunantëp ëëts mëti'ipë mni'ënä'ämëpën.

¹³Je'eyëp ko nimay ëëtsëty e tuu ka'ap nyäknyäxy; nän ka'ap tjëkyepy ëëts yaa nwintuukëta'aktëty tëjkwiin, ya'atë ka'ap jye'eyëty tu'kxëëw mäjtsk xëëw y'oyëja'any, may ja poky ets nimay ëëts ja poky të nmëtëkëtë.

¹⁴Nikë oy jeexyë ëëts yë nkutuunk wyë'ëmtë, mëti'ipë jää y'ixtëpën wi'ix ya'atë jotmay y'oyë ets ëpëky xyëëw jeexyë näjyëtu'un myiintëpë ja ja'ayëty mëti'ipë të pyëktën mëët wiink to'oxytyëjk ka'apë t'ëwtatën yë Wintsën, paminëtëp ja kyutuunktëjkëty, koonëm ja Wintsën ja jyoot'an xyäämëty.

¹⁵Tëkokyë ja ja'ayëty mëti'ipë ënäty të wyimpitën jatëkok ma ja nyaax kyajpnëtyën oy jëtu'unpë ja winma'any tmëtoowtë, yi'iyë ka'ap tukjotkëtäky jëtu'unpë ja winma'any yë Jonatán, myaank yë Asael ets Jahazías, myaank yë Ticvá, mëti'ipë ojts jä'ä tpuwa'akëtën ja Leví ja'ay mëti'ipë xyëëwajtëpën Mesulam ets Sabtai. Ënät ja teety Esdras ojts kë'ëm timy tnikajpxpety ja kutuunktëjk mëti'ipë nyikopk'atëpën ets tkutänëtëty ja naax kajpn ma tyu'uk anyën yë mëmajkpo'opë, ets jä'ä tpaye'eytyëty nitu'ukjaty ja nëë poky.

¹⁷E ma tyu'uk anyën ja mëët tu'uk po'opë jää ojts tyaj'o'oyëtya'atë ja jotmay mëti'ipë ënäty ja ye'etyëjktëjk të pyëktën mëët ja to'oxytyëjkëty mëti'ipë ka'ap ja Wintsën t'ëwtatyën.

¹⁸Ja teetytyëjkëty mëti'ipë ënäty mëët ja to'oxytyëjk të pyëktën ka'apë Wintsën t'ëwtatën jä'ä xyëëwajtëp: Ma Josué y'u'unk y'okën, Josadac yë myaank ets jyiiky myëku'uk: yë'ë ijtë yë Eliézer, Jarib ets Guedalías,

¹⁹ojts y'ëna'antë ko y'ëxmatsantëp ja tyo'oxytyëjkëty mëti'ipë ka'ap ja Wintsën t'ëwtatën ets ko ënäty tu'uk ja tsajppax ëna'k nyätyukniyajktu'uta'anëtë ko të pyok tyuntë.

²⁰E ma ja y'u'unk y'okën ja Imer: Hananí ets Zebadías.

²¹E ma ja y'u'unk y'okën ja Harim: Maaseías, Elías, Semaías, Jehiel ets Uzías.

²²E ma y'u'unk y'okën ja Pashur: Elioenai, Maaseías, Ismael, Natanael, Jozabad ets Elasá.

²³E ma ja y'u'unk y'okëtyën ja Leví ja'ayëty: Jozabad, Simí, Quelaías, mëti'ipë näjyëtu'un yajtijpën Quelitá, Petahías, Judá ets Eliézer.

²⁴Ma ja mëti'ipë ëëwtëpën: Eliasib. Ja mëti'ipë tëjk'aaw kyëwent'ajtëpën: Salum, Telem ets Urí.

²⁵E ja Israel ja'ayëty mëti'ipë ënäty näjyëtu'un ja nëë poky të tmëtëkëtën: Ma ja Parós ja y'u'unk y'okën: Ramías, Jezías, Malquías, Mijamín, Eleazar, Malquías ets Benaías.

²⁶Ma ja Elám ja y'u'unk y'okën: Matanías, Zacarías, Jehiel, Abdí, Jeremot ets Elías.

²⁷Ma ja y'u'unk y'okën ja Zatú: Elioenai, Eliasib, Matanías, Jeremot, Zabad ets Azizá.

²⁸Ma ja y'u'unk y'okën ja Bebai: Johanán, Hananías, Zabai ets Adlai.

²⁹Ma ja y'u'unk y'okën ja Paní: Mesulam, Maluc, Adaías, Jasub, Seal ets Ramot.

³⁰Ma ja y'u'unk y'okën ja Pahat-moab: Adná, Quelal, Benaías, Maaseías, Matanías, Besalel, Binuy ets Manasés.

³¹Ma ja y'u'unk y'okën ja Harim: Eliézer, Isías, Malquías, Semaías, Simeón,

³²Benjamín, Maluc ets Semarías.

³³Ma ja y'u'unk y'okën ja Hasum: Matenai, Matatá, Zabad, Elifélet, Jeremai, Manasés ets Simí.

³⁴Ma ja y'u'unk okën yë Paní: Madai, Amram, Uel,

³⁵Benaías, Bedías, Queluhi,

³⁶Vanías, Meremot, Eliasib,

³⁷Matanías, Matenai, Jaasai.

³⁸Ma ja y'u'unk y'okën ja Binuy: Simí,

³⁹Selemías, Natán, Adaías,

⁴⁰Macnadbai, Sasai, Sarai,

⁴¹Azarel, Selemías, Semarías,

⁴²Salum, Amarías ets José.

⁴³Ma ja y'u'unk y'okën yë Nebo: Jeiel, Matatías, Zabad, Zepiná, Jadau, Joel ets Benaías.

⁴⁴Tëkokyë ya'atë ja'ayëty aakyë'ë ënäty mëët të pyëktë ja to'oxytyëjkëty ka'apë Wintsën ninu'un timy ëwtatën, aak jaaypyo'kxyjyä'äy ijty yë'ëjëty, je'eyëp ko ojts ja yaj'ëxmajtstaaynyëtë ni'amukë mëët ja nyi'u'unk nyi'ëna'këty.