Read Biblia Mixe de Quetzaltepec Esdras 3 Bible Online

Esdras 3 - Biblia Mixe de Quetzaltepec bible

Esdras 3

¹Ko wëxtujk po'o y'apejty ma ja Israel ja'ayëty ënäty jatëkok të tpaatën ja nyaax kyajpnëty, ënät tyu'ukmujktaaytyë jam Jerusalén.

²Ja Josué, Josadac yë myaank ets ja myëku'uktëjk ninu'un tyeety'atën, näjyëtu'un yë Zorobabel, Salatiel yë myaank ets ja jyiiky myëku'uk. Ojts tyajtso'onta'aktë ja tuunk ma tkojë'ëktën ja Wintsën ja wyintsë'këntyakn, ma tyaktëtyën ja wintsë'kën nino'okpyë, tä jap myinyën këxja'ay ma ja ënä'ämën tëyajtënën mëti'ipë ja Moisés yajkën, Tios yë tyuunpë.

³Ja wintsë'këntyakn mëti'ipë ojts tkojtën ta'tspëky ojts yajxon tyaj'oyëtë, këtiipë ja mëtsip tjitëty, jopy ux ijty tyaktë ja wyintsë'kën nino'oky nixämpyë.

⁴Ojts tnixëëwtuntë ja tëjk nixo'omy, jëtu'un tä ënäty myinyën; xëmë winjëpom ijty tyaktë ja wintsë'kën, jëtu'un tä tu'kxëëwjaty tyuka'ayën,

⁵ëpëky näjyëtu'un tyajktëpë ja wintsë'kën winjëpom, ma tmëjjawëtën ja po'o u'unk, ëpëky näjyëtu'un mëti'ipë ja kënu'kxy xëëw tyukwintsë'këtyëpën, ma ja Wintsën jä'ä yajtukmëjjawën ets ëpëky mëti'ipë kë'ëmwinma'any yajktëpën.

⁶Ma mëtu'uk xëëw y'änyën ja mëwëxtujkpo'opë, ma ënäty të tpaatën ja nyaax kyajpnëty jatëkok, jää tyajtso'ontaktë ma tyaktën ja wyintsë'kënëty ets tukwintoy tukwinjoktë ja Wintsën, oy ënäty ka'ap ja tsajptëjk yajkojtso'ontä'äkynyëm.

⁷Tääts tkë'ëmooytyääytyë ja wit meeny ja pojtspë ets ja tsäjtspë ets tmooytyääytyë ja kyä'äyënëty y'ukënëty ja ja'ayëty mëti'ipë jam kukajpnajtëpën Tirë ets Sidón ets nëjkx jam Líbano ja kepy tyajtsoontë, mejyjoty tmëmintëty ets tmëja'tëty jam Jope, aakyë'ë ajë kepy, mëët ja mëk'ajtën mëti'ipë ënäty ja yajkutujkpë të myo'ojëtën, jampë y'ëne'emyën Persië, mëti'ipë txëëwajtpën Ciro.

⁸Yë Zorobabel, Salatiel yë myaank ets Josué, Josadac yë myaank, mëët ja myëku'uktëjk, teetytyëjkëty ets Leví ja'ayëty ets nitëkokyë ja ja'ayëty mëti'ipë ojts yajmënëjkxtën jam Babilonyë, mëti'ipë ënäty jatëkok jam Jerusalén të wyimpitën, jä'ä ojts tkojjë'ëktë ja tsajptëjk, ma mëmäjtsk po'o y'änyën, ma tyu'uye'eyën ja mëmäjtskjëmëjtpë maju'unëm ënäty të wyimpitën jatëkok jam Jerusalén, ja tuunk jä'ä tyuknipëjktë ja Leví ja'ayëty, mëti'ipë ja jyëmëjt të t'apätën i'px tu'uk.

⁹Josué mëët ja y'u'unk y'ëna'k ets ja myëkä'äxtëjk, tu'ukyë ojts aakyë'ë nyämya'kxëtë. Mëët tyuunmujktë ja Cadmiel, mëët ja y'u'unk y'ëna'k mëti'ipë ja Judá y'u'unk'ajt y'ok'ajtën ets ja myëkä'äxtëjk ja Henadad, mëti'ipë Leví ja'ayëtyën ets yë'ë tnikopk'ata'antë ja tuunk ma ja tsajptëjk kyoja'anyën.

¹⁰Ko ja tëjk tuunpë tyajtso'ontaktë ja potsy'ëjx ma ja Wintsën ja tsyajptëjk kyoja'anyën, ja teetytyëjkëty ojts wya'akë'kta'atë ets tyëjkëtyë yaxmujk jojkmujkpë mëët ja xyuxnëty. Ja Leví ja'ayëty mëti'ipë ja Asaf y'u'unk'ajty y'ok'ajtypyën jä'ä yaj'ënantëp ja platillos mëti'ipë tyukpa'ënantëpën ma ja Wintsën tkuuy'ëw tkuuya'axtën, mëti'ipë ënäty ja David të tyajkutukyën, mëti'ipë ënäty yë'ë yë Wintsën të tyuk'ëne'emyën.

¹¹Nimay ja ja'ay ënäty twin'ëw twinya'axtë ja Wintsën ets nimay y'ëtsowtë: Kukajpxëtë ja'awëkyëta'aktë ja Wintsën, jä'ä ko yë tsyojkën jya'awën oy yë'ë ets xëmë y'ity. Tëkokyë ja naax kajpn aak xoontaktëp, jä'ä ko tëë ja tuunk tsyo'ontä'äky ma ja tsajptëjk yajkoj oyën.

¹²Ja teetytyëjkëty, Leví ja'ayëty ets ja mëjja'aytyëjkëty mëti'ipë ënäty të t'ixtën wi'ix ja mëwyiimpë ja tsajptëjk të y'ixë'atyën, ojts tyëkëtë yaxpë, jä'ä yajjoot'amutskëtëp ko ënäty jatëkok ja tsajptëjk kyoj'oyëjä'äny. Ëpëky ja wiinkpë jam jyänty xyoonta'aktë.

¹³Ka'ap yajmëtooy mëti'ipë ja yaxtëpën ets mëti'ipë xoontaktëpën jä'ä ko mayjyä'äy, aak yax aak jojktëp wä'än tpënëty.