Read Biblia Mixe de Quetzaltepec Esdras 6 Bible Online

Esdras 6 - Biblia Mixe de Quetzaltepec bible

Esdras 6

¹Ënät ja yajkutujkpë Darío, ni'ënä'ämëy ets yaj'ixta'ajëty ya'atë noky mëti'ipë pëjkë'ëky yaj'ijtëpën ja Babilonyë ja'ayëty,

²e jam ma ja kyutujkëntëjkën ja Ecbatana, ma Media y'itjotmën, jam yajpaty tu'uk ja noky, ma tnimëtyä'äkyën ya'atë ja aaw ayuk:

³Ma ënäty ëka'any mëtu'uk jëmëjt tyunyën ja yajkutujkpë Ciro, jää tu'uk ja ënä'ämën tyajpëtsëëmy, mëti'ipë ënaanpën: Ja Wintsën ja tsyajptëjk, jampë Jerusalén yajpaatyën. Wä'än ja potsy tso'ontä'äky ets wä'än tyajkoj'oyë, jamts yajyakëty ja Wintsën ja wyintsë'kën. Majkmokx xajpk kyëjxm'atëty ets majkmokx xajpk myëjwiin'atëty;

⁴ëpëky tëkëëkwääpy yë tsaapotsy yajnipëjktaakëty ets tëkëëkwääpy yë kepy oyjyätyëtypë. Yë kutuunk yë'ë yakëp ja wit meeny ma ënäty myëyätyën.

⁵Ja apëjk atu'unën pu'ts pujxn poop pujxn, Wintsën yë jyä'ä, mëti'ipë Nabucodonosor jam myëpëtsëëmën tsajptëkotm Jerusalén ets tmëmiintaay yaa Babilonyë, wä'än jatëkok twinpijta'ay jam Jerusalén ets yajpëjktakta'ajëty jam tsajptëkotm ma Wintsën jyëën tyëjkën.

⁶Ënät ja yajkutujkpë Darío tmooy ja ënä'ämën ja Tatenai, mëti'ipë jam kutuunk'ajtpën ma ja it naaxwiinyëtën yajpaatyën, xëëwkëtä'äkytsyow, winkon jam Éufrates ets ja Setar-boznai mëët ja myëku'uktëjk, mëti'ipë jam kutuunk'ajtëpën ets t'ënëmaay: Jëwa'aktë jam Jerusalén

⁷ëxmatstë yë jutië ja'ayëty ets kyutuunktëjkëty wä'än tkoj'oyëtë yë tsyajptëjk ma jam tkoja'antën.

⁸E tyamës nyikäjpxy wi'ix mëpaat yajputëkëtën tääpë jutië ja'ayëty ma tsyajptëjk tuunk'atën: Yë'ë jam ja meeny tunëp mëti'ipë y'ayajk y'ako'onëtyëpën yë ja'ayëty jampë tsyëënëtën xëëwkëtä'äkytsyow, wiinkonpë ma Éufrates nëëpa'ajën, tsojk'am mëpaat ja meeny yajtukë'ëtëkëtë mëti'ipë jam tunantëpën këtiipë ja tuunk wyë'ëmëty.

⁹Ets winjëpom mëpaat ja meeny yajtukë'ëtëkëtë ja teetytyëjkëty mëti'ipë jam ja tuunk wintënaaytyëpën Jerusalén, jëtu'un ijxtëm tnikajpxtën tyajmëyatën ets tii tyim yajmëyajtëp, yë tsajpkaa, tsajppax, kupixyny mëti'ipë tyukwintsë'këtyëpën ja Wintsën tsajpjotmëpë; yë mok, xëjk, kaan, kääky, uuky, on ets tiijaty yajmëyajtëpën,

¹⁰ets tmo'otëty ja Wintsën tsajpjotmëpë ja wyintsë'kën oypyë tsujpë ets t'amëtowtëty ja Wintsën oyajtën mëk'ajtën ma yajkutujkpën ets ma y'u'unk y'ëna'këtyën.

¹¹Tyam näjyëtu'un ënä'ämën mpëjktä'äkyës, ko pën ya'atë aaw ayuk tnakumëtoownaxëty ëkë tkapatunëty, nëjkxëp ja tyëjk yajpa'atjijtu'uty ets nyijijtpätëtëty; ja jyëën tyëjk xit ko'ow jyajta'ajëty.

¹²Ja Wintsën mëti'ipë wyin'ijxën ja Jerusalén kajpn ets yë'ë tjä'ä'ata'any, nëjkxëp tyajkutëkoy ja naax kajpn mëti'ipë ënäty ëxëëk tunanëpën ets mëti'ipë yajjotkëjxëpën ma ja tsajptëjk jam Jerusalén tuunk'atën. Ëjts Darío, mëti'ipë yajkutujkpën, jëtu'unës ya'atë ja ënä'ämën mpëjktä'äky. Yajpatunëp jëtu'un tääjës yam nikäjpxyën.

¹³Ënät ja yajkutujkpë Tatenai, mëti'ipë jam ënä'ämpën matsow ja xëëw kyëtä'äkyën, wiinkonpë Éufrates nëëjën ets ja Setar-boznai ets ja myëku'uktëjk, tuuntë jëtu'un tä ënäty ja Darío yajkutujkpë të tni'ënä'ämën.

¹⁴Jëtu'un'äämpy ja jutië ja'ayëty mëti'ipë ja tuunk tyu'uwinye'eytyëpën ojts tyajtu'utëkëtë ja tsajptëjktuunk, jëtu'un y'atëëy ja y'aaw y'ayuk ja Wintsën ja kyäjpxynyajxpë Hageo ets Zacarías, ja y'u'unk y'ëna'k ja Idó. Tääts y'apatëy ja tuunk jëtu'un tä ënäty ja Wintsën të tni'ënä'ämën, mëti'ipë y'ëwtajtëpën ja Israel ja'ayëty, mëti'ipë nyi'ënä'ämëtën ja yajkutujkpëtëjkëty Ciro, Darío ets Artajerjes, jampë y'ënä'ämtën Persië.

¹⁵Ma tyëkëëk anyën yë Adar po'o jää ojts kyoj'apaatë ja tsajptëjk, yë'ë ënäty yajkutujkp yë Darío jam Persië.

¹⁶Ja Israel ja'ayëty, ja teetytyëjkëty, ja Leví ja'ayëty ets tëkokyë jënu'un ënäty ëxwop ixkexy të y'itën ojts tnixëëwtuntë ja tsajptëjk mëët ja xoontakën mëjwiin këjää.

¹⁷Ma ja wintsë'kën tyajktën: jä'ä ja tsajpkaa u'unk tyaj'o'ktë nimëko'px; nimäjtsk mëko'px ja tsajppax ets taxk mëko'px ja kupixyny; ëpëky wiinkpë tsajppax nimajkmäjtsk, mëti'ipë ja Israel ja'ayëty nätyukunajxëtën, ja nimajkmäjtskpë y'aptëjk'atën, ma ja nëë poky të tuuntëkoytyën.

¹⁸Ets tuknipëjktë ja teetytyëjkëty ets Leví ja'ayëty ets jä'ä ja Wintsën jap tmëtuntëty ma ja tsajptëjkën jam Jerusalén jëtu'un tä myinyën kuja'ay jap nokyjoty, ma ja Moisés ja nyokyën.

¹⁹Mëti'ipë winpijtën ma ënäty ëxwopy ixkexy të y'itën, ojts nixëëwtuntë ja ëmaayxyëëw, paskëpë yajtijyën, ma myajkmajkts anyën ja mëët tu'uk po'opë.

²⁰Ja teetyëty ets ja Leví ja'ayëty tëë ënäty tpaatë ja näypyuj näjyä'ätsë. Tää tkë'ëyajktë ja wintsë'kën ma ja Wintsënën, tnixëëwtuntë ëmaayxyëëw, jä'ä yatukunajxtëp ja Israel ja'ayëty mëti'ipë ënäty ëxwopy ixkexy të y'itën ets ja myëku'uktëjkëty teetytyëjkëty ets yë'ëjëty.

²¹Ni'ëmukë ja Israel ja'ayëty mëti'ipë ënäty të y'itën ëxwopy ixkexy ojts tkaaytya'atë ja kääky uuky mëti'ipë ënäty të yajtuknikojën yë ëmaayxyëëw ets may myiintë ja'ayëty mëti'ipë ënäty ka'ap të nyätyukpaatëtën ja ëxëëktu'un, ëxëëkajpxën, ka'apë të yajtukwin'ëëntën ja wit meeny; ojts myiinta'atë, tukxoontaktë ja Wintsën, mëti'ipë y'ëwtajtëpën ja Israel ja'ayëty.

²²Wëxtujk xëëw tnixëëwtuuntë ja tsajpkääky ka'apë tsyooymyëëtëtyën, jä'ä ko mëjwiin ojts tja'awëkyëta'aktë ko Persië yajkutujkpë pyutëjkëy ma ja Wintsën ja tsyajptëjk ënäty të kyojyën, mëti'ipë ja Israel ja'ay y'ëwtajtëpën.