Read Biblia Mixe de Quetzaltepec Esdras 8 Bible Online

Esdras 8 - Biblia Mixe de Quetzaltepec bible

Esdras 8

¹Yaa ja xyëëw myintë ja ye'eytyëktëjkëty mëti'ipë nyikopk'ajtën ja jyiiky myëku'ukëty, mëti'ipë yajaamyujktën, ko ja yajkutujkpë Artajerjes yajkutujky, mëti'ipë winpijtën mëët ja Esdras jam Babilonyë, ma jam tsyo'ontën ets nyëjkxnëtë jam Jerusalén.

²Guersón, y'u'unk y'ok yë Finees; Daniel, y'u'unk y'ok yë Itamar; Hatús, y'u'unk y'ok yë Secanías, yë David y'u'unk y'ok; Zacarías, y'u'unk y'ok yë Parós, mëët nimëko'px ja wëxtyikxy majk ja ye'etyëjktëjk mëti'ipë mëët tsyo'ontën.

⁴Elioenai, myaank yë Zérahías; y'u'unk y'ok yë Pahat-moab, mëët nimäjtsk mëko'px yë ye'etyëjktëjk;

⁵Secanías, myaank yë Jahaziel; y'u'unk y'ëna'k yë Zatú, mëët nitëkëëk mëko'px yë ye'etyëjktëjk;

⁶Ébed, myaank yë Jonatán; y'u'unk y'ok yë Adín, mëët niwëxtyikxymyajk yë ye'etyëjktëjk;

⁷Jesaías, myaank yë Atalías, y'u'unk y'ok yë Elám, mëët nitëkë'px majk yë ye'etyëjktëjk;

⁸Zebadías, myaank yë Micael, y'u'unk y'ok yë Sefatías, mëët nimajkta'px yë ye'etyëjktëjk;

⁹Abdías, myaank yë Jehiel, y'u'unk y'ok yë Joab, mëët nimäjtsk mëko'px yë ye'etyëjktëjk;

¹⁰Selomit, myaank yë Josifías, y'u'unk y'ok yë Paní, mëët nimëko'px ja tëkë'px yë ye'etyëjktëjk;

¹¹Zacarías, myaank yë Bebai, y'u'unk y'ok yë Bebai, mëët ni i'pxtuktujk yë ye'etyëjktëjk;

¹²Johanán, myaank yë Hacatán, y'u'unk y'ok yë Azgad, mëët nimëko'px ja majk yë ye'etyëjktëjk;

¹³Elifélet, Jeiel ets Semaías, nimäjtskpë yë'ë y'u'unk y'ok yë Adonicam, mëët nitëkë'px ja ye'etyëjktëjk, mëti'ipë ok jaakmiintën.

¹⁴Utai ets Zabud, y'u'unk y'ok yë Bigvai, mëët nitëkë'px majk yë ye'etyëjktëjk.

¹⁵Ni'ëmukë ojts ntu'ukmujkta'atës jam nëë'ëkë'ëm ma txëëwatyën Ahavá, tëkëëk xëëw jam n'ijtës. Ko yaj'ijxmujktaay ja ja'ay pënjaty ënäty jam yajpatpën, ka tu'uk kyayajpaty Leví ja'ay.

¹⁶Ënät yajkäjxtë ja Eliézer, Ariel, Semaías, Elnatán, Jarib, Elnatán, Natán, Zacarías ets Mesulam, aak mëjja'aytyëjkëty ets ojts yajkäjxtëpë ja yaj'ijxpëjktëjkëty mëti'ipë xyëëwajtëpën Joiarib ets Elnatán,

¹⁷ets nëjkx t'ixtë ja Idó, mëti'ipë jam kutuunk'ajtpën Casifiá jëyëjp yajtukmëmëtyaktaaytyë wi'ix t'ënëëmëtëty ja Idó ets ja myëku'uktëjkëty mëti'ipë jam tuuntëpën ma tsajptëjkën jam Casifiá, yë'ë y'amëtoowtëp ets pyaminëtëty ja ja'ay mëti'ipë tuntëpën ma ja Wintsën ja tsyajptëjkën.

¹⁸E ja Wintsën tyuun ja mëyajtën, miin ja Serebías, Leví ja'ay, yë'ë y'ok yë Mahli, mëët tyimmiiny ja y'u'unk y'ëna'k ets ja myëkä'äxtëjk; nimajkmokxtëkëëk nyiwinë'ajtë.

¹⁹Wyoowmiintë näjyëtu'un yë Hasabías ets Jesaías, Merarí y'u'unk y'ok, jä'ä nyiwinë'ajtë ni i'px.

²⁰Ja ja'ayëty mëti'ipë tuuntëpën ma ja tsajptëjkën ets mëti'ipë nyikopk'ajtën ja Leví ja'ayëty, mëti'ipë ja David kë'ëm tyimtuknipëjkën ja tuunk, jä'ä nyiwinë'ajtë mäjtsk mëko'px ja i'px, aak mëkäjpxy y'ijtë nitu'ukjaty.

²¹Ok ojts nipëjktaakës ets ja ja'ay y'ayuu'atëty tu'uk xëëw jam ma mëjnëë nyäxyën mëti'ipë yajtijpën Ahavá, ets yajmëmay yajmëtajëty ja tuuntëko'oy kajpxtëko'oyën mëti'ipë të yajtunyën ma ja nTios'ajtëmën, tääts yaj'amëtow yajpëjktsowëty wä'än oy mëjaaw xyajtu'uye'eyëmë mëët ja n'u'unk'ajt n'ëna'k'ajtëmë ets jënu'un winë nmëët'ajtëmën.

²²Ëjts natsëtyu'un ja'awëyës ko jeexyë ja yajkutujkpë yaj'amëtooy ja tujnmëëtpë, kwaawmyëëtpë, mëti'ipë jeexyë xykyëwent'ajtëmën ma ntu'uye'eya'anëmën, jä'ä ko tëë ënäty kë'ëm ja yajkutujkpë n'ëk'ënëma'ayëmë ko yë Wintsën y'ijx'ijtyp Kyëwent'ajtyp ja'ay mëti'ipë ixtaayëpën ets tyukjoot'anpëjkyp mëti'ipë ka'ap myëjpëjktä'äkyën.

²³Paatykyëjxm ojts n'ayuu'atës ets yaj'amëtooy ja Wintsën ja putëjk pupäjtën.

²⁴Nimajkmäjtsk yë teetytyëjkëty yajwin'ijxy mëti'ipë winye'eytyëpën: Serebías, Hasabías ets nimajk myëku'uktëjk,

²⁵etsës nmooytyë koos nkijpxtaay ja pu'ts pujxnmeeny, poop pujxn meeny, näjyëtu'un ja apëjk atu'unën mëti'ipë ënäty të tyaktën ja yajkutujkpëty, ja wintsëntëjkëty ets ja myëku'uktëjkëty mëti'ipë mëët tyuunmuktën mëti'ipë tyukniyajkëtyën ma ja Wintsën ja tsyajptëjk kyoja'anyën.

²⁶Ojts yajtëëytyä'äy jënu'un jye'emtyëtyën ets yajkë'ëmooytyë I'px tu'uk mil ja taxk mëko'px ja wëxtyikxy majk kilë ja poop pujxn, mëko'px pëky ja apëjk atu'unën ets tëkëëk mil ja tëkëëk mëko'px kilë ja pu'ts pujxn;

²⁷ëpëky i'px ja a'ukën aak pu'ts pujxnëpë mëët y'oytyunyëtyën, tuktujk kilë jye'emtyëty ets mäjtsk käpy ja ukypyujxn tsowpë, jëtu'unpë tä pu'ts pujxnën.

²⁸Täätsës n'ënëmaaytyë: Miitsëty tëë myajkënu'kxta'atë, näjyëtu'un ja apëjk atu'unën ets ja wit meeny. Ja poop pujxn ets ja pu'ts pujxn aakyë'ë Wintsën yam yajtukniyajkëp, mëti'ipë y'ëwtajtën ja nteety'ajt n'ap'ajtëmë,

²⁹mëk xykyëwent'atëty ets koonëm yakijpxta'ajëty ma ënäty jam ja teety wintsëntëjk, Leví ja'ayëty ets mëjja'aytyëjkëty kë'ëm t'ixtën, jam tsajptëkotm, jam Jerusalén.

³⁰Ënät ja teetytyëjkëty ets ja Leví ja'ayëty t'ëxajëtyë ja meeny ets ja apëjk atu'unën ets ojts tmënëjkxtë ma ja tsajptëjkën jam Jerusalén.

³¹Ma myajkmäjtsk anyën ja mëët tu'uk po'opë, ma jajëmëjt tsyo'ontä'äkyën, jää jam ëëts ntso'ontë ma Ahavá mëjnëëjën ets ojts nëjkxtës jam Jerusalén. Mëj këjää yë Wintsën xypyutëjkëtyës, ka'apës maa wi'ix njajtë ets ka'ap ma pën ojts xy'atsë'ëk xy'ajawëtës.

³²Koos jam nja'ajtë Jerusalén, tëkëëk xëëwës ojts mpo'kxtë.

³³Kom taxk xëëw ojts yajtëynyëm ja pu'ts pujxn, poop pujxn ets ja apëjk atu'unën jam tsajptëkotm jam Jerusalén, ma ja Wintsën ja tsyajptëjkën ets yajtukë'ëtëjkëtyääy ja teety Meremot, Urías yë myaank. Tam ënäty mëët ja Eleazar, Finees yë myaank ets Leví ja'ayëty, yë Jozabad, myaank yë Josué ets Noadías, myaank yë Binuy.

³⁴Jä'ä xëëw yajkijpxtaay, yajmëtyoowtaay winë, jää yaj'ijxmujktaay näjyëtu'un ja tsëmy kë'ëy.

³⁵Ok, ja ja'ayëty tkë'ëyajktë ja wintsë'kën ma Tiosën, mëti'ipë ënäty të yaj'ëxwoptën ets ënäty tsumy matsy të yajmënëjkxtë wiink kajpn. Ojts tmëjjaw tkënu'kxyjyawëtë ko ënäty jatëkok të tpaatë ja nyaax kyajpnëty, paaty ojts ja Tios ja wyintsë'kën tmo'otë. Majkmäjtsk yë tsajpkaa tyaj'o'ktë, majkta'px majkmokx tu'uk yë tsajppax, tëkë'px majkmokx mäjtsk yë kupixyny ets majkmäjtsk yë tsajppax ayääkë. Yë'ë ojts yë nyëë pyoky tukunaxtë ya'atë jëyujk ooky, aak tsa'ay aak no'oky yë Tios tukwintsë'ëkëtë.

³⁶Ok ojts ja kutuunktëjkëty yajtuknijawëtë wi'ix ënäty ja yajkutujkpë ja ënä'ämën të tyäkyën, ma ja kutuunktëjkëtyën mëti'ipë jam yajpatëpën ma ja Éufrates y'itjotmën, mëti'ipë ojts pyutëkëtën ko ja naax kajpn tkoj'o'oyëtë ja tsajptëjk.