Read Biblia Mixe de Quetzaltepec Esdras 9 Bible Online

Esdras 9 - Biblia Mixe de Quetzaltepec bible

Esdras 9

¹Ko ya'atë y'ëkkëjxy y'ëknajxy, ënät ojts ja mëjja'aytyëjk xynyimintës ets xy'ënëmaaytyës: Yë Israel ja'ayëty ets näjyëtu'un yë teetytyëjkëty ets Leví ja'ayëty je'eyëm yowë mëët ye'eymyuk nyajxmuktë yë Canaán ja'ayëty, Hit ja'ayëty, Ferez ja'ayëty, Jebús ja'ayëty, Amón ja'ayëty, Moab ja'ayëty, Egiptë ja'ayëty ets Amor ja'ayëty, jya'ijxtëp ko tääpë ja'ayëty ka'ap oy nyëëye'ey tyu'uye'eytyë.

²Yë'ëjëty ets ja y'u'unk y'ëna'këty ye'etyëjkpë tëë pyëjknëtë y'uknëtë mëët ja to'oxy'ëna'këty mëti'ipë tääpë ja'ayëty nyëëx'ajtëpën; tääts jëtu'un ja nätyuktëk nätyukwa'akë y'ijnë mëët tääpë ja'ayëty ka'apë kyunaax'at kyukajpn'atën. Yë'ë jëtu'un ëtëtsnëtëp mëti'ipë ja naax kajpn nyikopk'ajtëpën, tä yë kutuunktëjkëtyën.

³Ko jëtu'un nmëtooyës ënät ja nwit ntukë'tsëyës ets ja nwiinwaay n'aawaay nka'ptaayës, mëët ko jëtu'un nmëtoowpatyës, janty tim pëjkë'k ntimy ja'awëyës ja njot nini'kxës, jëtu'unyës ntimy wyä'tskëtäky mëët ja monyëtukyë.

⁴Tëkokyë ja ja'ayëty mëti'ipë ënäty të tpaatën jatëkok ja nyaax kyajpn ets mëti'ipë mëk tsyë'këtyëpën ko ja Wintsën tukjoot'anpëjkp ets ëxëëk xytyu'unmëty ko ja nëë poky nmëtëjkëmëty ma ja naax kajpnën, miintaaytyë ma ëjtsën, ëjts ka'apës ojts nwa'ayu'kxy, koonëm tpaty jënäkyxyëëw ma ja wintsë'kën yajyäkyën.

⁵Ënät ojts wäänë ja monyëtukyë xynyiwa'atyës ets tamës jëtu'un ja nwit nixox'aty koos ntëjkëy kajpxtakpë ma Wintsën Tiosën,

⁶ets n'ënëmaayës: Wintsën, Wintsën, tsëtyuumpës koos nkatukjaty wi'ix nmëëtkajpxy nmëmëtya'akëty. Mëjwiin këjää ëëts të mpokytyuntë.

⁷Pokyjoty ëëts njuuky'atë, tyimtso'ontäky jëtu'un tëëyëp. Mëëtkyëjxm koos të nkamëta'aktë ets ko näjyëtu'un të kyamëta'aktë ja teetytyëjkëty ets yajkutujkpëtëjk o'ktëy ëëts të njatë, wiink naax wiink kajpn muum të xyajja'tës ma ja wiinkëtypë yajkutujkpëtëjkën. Ojts ëëts yë ja'ay xyajtsëtyut xyajwintëkoytyë, ojts ëëts ja'ay xy'ëxwop xy'ixkäxtë, ojts ëëts yë ja'ay xytyontë xymyäätstë ets tëëjës yë ja'ay xy'ixtij xy'ëxwa'antë, e tyampaat je'eyëm ëëts nyajpaatë.

⁸E yë'ë ënät näjyëtu'un nnikajpxäämpyës ma mijtsën Wintsën, mëët yë'ëkyëjxm ko xymyëët'aty ja oyjyot oywyinma'any paatyës të nyajmo'otë ja ëwaatsëtuuy'ajtën ets tëëjës nyajnajtsmatsëtë ets nkojtëtyës ja njëën ntëjkëtyës ma ja oynyaax kënu'kxynyaaxën; jëtu'un tä jeexyë ëëts jemy ja të'kxën jajën npaatën jëtu'un ëëts jatëkok të xyaj'ijxë'ëktë, jëtu'un ëëts jatëkok të näjyawëtë tä jeexyë xyajpo'kxtënës ma ëëts mëk nmëtun n'ëyowtën.

⁹Oy ëëts tyam ja'ay je'eyë xy'ëkyajmëtuntë mijts ka'apës xy'ëxmatstë; tëëjës mijts xytyuk'ixtë ja m'oyjot m'oywyinma'any ma ja yajkutujkpëtëjkën Persiaja'ayëty, tëëjës ja juukyajtën xymyo'otë ets ja mtsajptëjk jatëkok ëëts nkoj'oyëtëty ma ënäty taj xit yajpaatyën. Mijts ëëts të xy'ijx'it të xykyëwent'atë jam Judá ets Jerusalén.

¹⁰¿E ëëtsëty Wintsën tii ayukës n'ëkpaatëp mëët ja mëti'ipës të ntuntën? Ëëtsëty ka'ap të npatuntës ja m'ënä'ämën mtëyajtën

¹¹mëti'ipë ojts xyjyatuk'ëne'emyën ja mkäjpxynyajxpëtëjk. Ojts xyjyatuk'ëwaanëtës, ko ja naax kajpn ma ënäty ëëts ntëkëja'antën ëxëëk ja yajpaaty ets aak toon aak mä'tstëp yë ja'ay, ko aakjä'ä ja ëxëëkpë tyuunk'ajtëp.

¹²Ojts näjyëtu'un mijts xy'ënëëmëtës koos ja nëëxëty ka'ap mëpaat pyëktë y'uuktë mëët yë myaankëty etsës ja nmaankëty nän ka'ap mëpaat pyëktë y'uuktë mëët yë nyëëxëty, ojts xynyikäjpxy ko ka'ap mëpaat yajmëët'aty oy'aaw oy'ayuk mëët yë'ëjëty, koos mëk mëpaat ja jot winma'any nmëët'atës ets ntuk'oy'atëtyës mëti'ipë ja naax kajpn myëët'ajtypyën ets nëjkx jëna'a ntukumaytyës ja n'u'unk n'ëna'këtyës, mëti'ipë xëmëkyëjxm myëwë'ëmtëpën.

¹³E mëët koos ja nëë poky mëjwiin këjää të ntuntë ets ënät o'ktëy të njajt të nkëpäjnëtës, e oyën ka'ap jëtu'un të xytyim tëy tyuntës ijxtëm ënäty jyapaatë'atyën, ix ja ëwaatsëtuuy'ajtën jatëkok të xymyo'otës,

¹⁴¿wä'än tääjën ëëts jatëkok n'ëkkäjpxykyutëjtëty mijts ja m'ënä'ämën mkutujkënë ets näjyëtu'un jatëkok winë ntuntëtyës tä ja ja'ayëty mëti'ipë ëxëëktuun ëxëëkkajpxtëpënë? ¿Këtii tääjën xytyukjoot'anpëktëtyësë ets këtii tääjën nëjkx xyajkutëkoytyësë ni'ëmukë?

¹⁵Wintsën, Wintsën, mëti'ipë yë Israel ja'ay y'ëwtajtëpën, mijts janty'oy mjot mwinma'any xyajkëxë'ëky ma ëëtsëtyën, mijtsën të xyajkutuky ets ja ja'ay ka'ap tyimkëjxta'ajëty, jëtu'un ijxtëm tyam yaj'ixy yajtunyën. Ëëtsëty tëë nëë poky njanty myëtëkëtës ma mijtsën; paatykyëjxm ka'ap tjëkyepy wi'ix ëëts nyajpaatëtyën ma mijtsën.