Read Biblia Mixe de Quetzaltepec Ester 2 Bible Online

Ester 2 - Biblia Mixe de Quetzaltepec bible

Ester 2

¹Tëë ënäty ja xëëw jëmëjt nyajxnë këjää ko ja yajkutujkpë Asuero jyootja'ajtëyë ja Vasti, mëët wi'ix ënäty të y'ëti'itsyën ets wi'ix ënäty ja yajkutujkpë Asuero ja ënä'ämën të tkäjxwä'kxyën.

²Ënät ja wyintsëntëjk ojts y'ënë'ëmxëty: Yajkutujkpë, oy yowë tyimkopkpëkëty ets yaj'ixta'ajëty yë to'oxy'ëna'këty mëti'ipë oyëtyën ets mëti'ipë ka'ap yë ye'etyëjk tmëët'aty tmëëtsëënënëm.

³Nikë wä'än yë yajkutujkpë tuknipëky yë ja'ay, maajaty ja naax kajpnën, mëti'ipë ya'atë kutujkën nyitënääpyën; yë'ë y'ixta'atëp ja to'oxy'ëna'k ets jam twoownëjkxtëty ma yajkutujkpë ja y'ijtaknën, jam Susa, ma ja tëjkën ma to'oxy'ëna'k y'itën ets yajtuknipëkëty yë Hegai ets yë'ë t'ijx'it tkëwent'atëty. Tääpë Hegai nyija'ap yë yajkutujkpë ko oy jyä'äy'äty, wä'änts yë'ë tyajkay tyaj'uuky yë to'oxy'ëna'k; wä'än t'ixy tmëyäty ets wä'än yajxon tyajtsooypyetsy ets t'oytyuny.

⁴E ja to'oxy'ëna'k mëti'ipë ënäty ja yajkutujkpë Asuero y'oy'ijxypyën, yë'ë wë'ëmëp yajkutujkpë ets yë'ë to'oxytyëjk'atëty. Yë'ë nëjkx tkutëkë ja Vasti. Ya'atë winma'any oy ojts tmëtoy ja yajkutujkpë. Jëtu'un ojts jyänty yajtuny.

⁵Jam Susa, jam ijty tsyëënë tu'uk Jutiiyë ja'ay, Mardoqueo xyëëwajtyp, Jair myaank, yë'ë y'ok'u'unk yë Simí ets Quis, Benjamín y'u'unk y'ok.

⁶Yë Mardoqueo, jam Jerusalén ojts yajmëtsoony tsumy matsy, ënät ko ja Nabucodonosor yajkutujkpë tnitëjkëy ja kajpn, yë'ë ënäty mëët të yajmëtsoony jam Jerusalén yë Jeconías, mëti'ipë ënäty yajkutujkpën jam Judá.

⁷Mardoqueo tam ijty tu'uk tsyojknëëx, mëti'ipë ojts yë'ë tyajyeekyën ko ja tsyojknëëx mëxu'unknëm nyi'o'ktutë ja tyeety tyaak. Tääts ojts yë'ë tmëwë'ëmy tä jeexyë tnëëx'atyën. Jä'ä xyëëwajtyp Hadasá, nän yajtijp Ester. Yë Ester janty'oy janty tsuj ojts yeeky ets oy kyëxë'ëky.

⁸Ko ja yajkutujkpë ja y'ënä'ämën jam jyä'äjty ets ja to'oxy'ëna'k nyiye'eypyätëty ma ja yajkutujkpë ja tyëjkën, jam Susa ets ja Hegai yë'ë yajtuknipëjk ets t'ijx'it tkëwent'atëty ja to'oxy'ëna'k, jam ma të nyiye'eypyätën, tam ënäty näjyëtu'un yajpaaty ja Ester.

⁹Yë Ester oy ojts myëku'ukjawëty yë Hegai, paaty ojts ni'ik yajmëj'atyë ets oyëty ja jë'kxy pëky ets ja kääky uuky myooyë. Yë Hegai, niwëxtujk ojts twin'ixy ja to'oxy'ëna'k mëti'ipë ja Ester ixëtëpën. Ja Ester jam yajpëjktäky ma ja oypyë ja ijtaknën, ma ja yajkutujkpë ja jëën tëjk tmëëtëtyën, ma ja to'oxy'ëna'k nyiye'epyäjtën.

¹⁰Ester ka'ap ojts tnikäjpxy pën tyeety'äjtyp tyaak'ajtyp ets pën tyikts'ajtyp y'aats'ajtyp, jä'ä ko jëtu'un ënäty ja Mardoqueo të y'ënë'ëmxëty ets ka'ap tnikajpxëty.

¹¹Mardoqueo xëmë ënäty jam nyäxy tyëkë ma ja to'oxy'ëna'k y'itën ets tnijawë wi'ix ja Ester yajpaaty ets wi'ix jap y'ity.

¹²Tëkokyë ja to'oxy'ëna'këty majkmäjtsk po'o ojts yaj'oytyuntë ets oyëtypë ja kääky uuky yajmo'otë; tëtujk po'o ojts ja nyini'kx yaj'oytyuntë mëët tu'uk yë on mëti'ipë tyijtëpën mirra, ets tëtujk po'o ojts yaj'oytyuntë mëët yë wiinkëtypë on ets tsooy mëti'ipë pa'akxu'kpën, mëti'ipë yajtuuntëpën ja to'oxytyëjkëty. Ko yaj'oytyuuntaaytyë, nitu'ukjaty ojts yajtukniwitsëtë ets nëjkx twinkuwa'akëtë ja yajkutujkpë Asuero.

¹³Ja to'oxy'ëna'këty ko jam tsyoontëty ma y'itën, jyëkyejpy tmënëjkxtëty tii y'amëtoowtëpën ets jëtu'un nyëjkxtëty ma ja kutujktaknën.

¹⁴Koots ijty tu'ukjaty nyëjkxtë ma ja kutujktaknën, e komjëpom wiinktsow yajkäxtë, ma jam ëpëky y'itën ja to'oxy'ëna'këty mëti'ipë tëë twinkuwa'akëtën ja yajkutujkpë. Yë'ë ënäty jam të yajtuknipëky t'ijx'it tkëwent'atëty ja to'oxy'ëna'k, yë Saasgaz. Ja yajkutujkpë nyija'ap ijty ko ja Saasgaz oy ja to'oxy'ëna'k këwent'aty. Mëti'ipë ja to'oxy'ëna'k ënäty të twinkuwa'akën ja yajkutujkpë, ka'ap jatëkok t'ëkwinkuwa'kënë, ënät tëy, pën tëë ja yajkutujkpë y'oy'ixyë ets pën tëë kë'ëm myëkäjpxyë.

¹⁵Yë Ester, yë'ë Abihail tyaak'ajt ets yë'ë Mardoqueo jyämy'ajt; ko ojts tyuka'ayë ets twinkuwa'akëty ja yajkutujkpë, yi'iyë ojts tmënëjkxy mëti'ipë ja Hegai tuknëmaayën tmënëjkxëty. Yë Hegai yë'ë ënäty të tyuknipëkyë ja yajkutujkpë ets këwent'atëty ja to'oxy'ëna'k. Yë Ester aak'oy ënäty ja to'oxy'ëna'k jyawëty.

¹⁶Ënät ojts ja Ester yajmënëjkxy jam ma ja kutujktaknën ets twinkuwa'akëja'any ja yajkutujkpë Asuero, ma myajkpo'opetyën jajëmëjt mëti'ipë yajtijpën Tébet, kom wëxtujk jëmëjt ma ënäty të tyëkën yajkutujkpë yë Asuero.

¹⁷Ja Asuero oy t'ijxy ja Ester ets mëk tsojkën'ajty. Yë'ë ni'ik tsyojkën'ajt këtiinëm wiinkëtypë ja to'oxy'ëna'k mëti'ipë ënäty mëët të y'ijtmukyën ja Ester, paaty ojts jä'ä tmo'oy ja kujän, mëti'ipë oytyunyën mëët yë pu'ts pujxn, mëti'ipë yajtuk'ijxpën ko yajkutujkpë y'ity, jëtu'un ojts yë'ë tkutëkë ja yajkutujkpë Vasti.

¹⁸Ënät ja yajkutujkpë tu'uk ja mëj xëëw tuknipëjktakëy ets yajnixëëtuuny ja Ester, ojts yajwoowta'atë ja wintsëntëjkëty, tuunpëtëjkëty mëj'äämpyë ets mëti'ipë ënäty mëët tyuunmukyën ma ja kutujktaknën. Yë Asuero yajkunajk ja këpäjtën ma ijty ja ja'ayëty tii winë tkëpätën ets yajwa'kx kajpn apëtsëmy ja näynyamo'ojë, jëtu'un ijxtëm ënäty pyaat'atyën.

¹⁹Jä'ä xëëw ma ënäty ja to'oxy'ëna'këty yajmënëjkxtën jam ma ijtaknën, mëti'ipë tëë twinkuwa'akëtën ja yajkutujkpë, yë Mardoqueo jam ënäty y'u'unyë tëjkwinm ma ja akujktëjkën.

²⁰Yë Ester ka'ap ënäty të tuk'ëwaanë ja yajkutujkpë maa tsyoonyën, pën myëku'uk'ajtypyën ets maa kyunaax kyukajpnëtyën, jä'ä ko jëtu'un ënäty ja jyämy Mardoqueo të y'ënë'ëmxëty ma ënäty yë'ë myëët'atyënëm.

²¹Ma jam jëtu'un yë Mardoqueo y'u'unyën, këmoontëjk winm, ënät tmëtooy ko myëtya'aktë yë Bigtán ets Teres, mëti'ipë ënäty nyiwintsën'ajtëpën ja tsiptuunpë ja'ayëty, jampë kyëwent'atën ma kutujkëntëjkën. Ya'atë nimäjtskpë ja'ayëty yë'ë ënäty nyimëtyaktëp wi'ix tyaj'ooka'antë ja yajkutujkpë.

²²Ko yë Mardoqueo jëtu'un tmëtooy, ënät tuk'ëwa'anëy yë yajkutujkpë Ester, e yë Ester nän ënätyë tuk'ëwa'anëy yë yajkutujkpë Asuero.

²³Ya'atë jotmay ojts yajnipaye'ey ets tyajtëytyëkëja'antë; ko tyiytyëjkëy, ënät ojts yajni'ënä'ämëtë ya'atë nimäjtskpë ja'ayëty, mëti'ipë ënäty nyiwintsën'ajtëpën ja tsiptuunpëtëjk jampë kyëwent'atën ma ja kutujkëntëjkën ets ojts yajyo'ktëytyë. Ya'atë jëtu'unpë jotmay ojts yajkuja'ay nokyjoty ets yaja'amyätsëty. Jap ojts wyi'imy këxja'ay ma tnikäjpxy tnimëtyä'äkyën winë, mëti'ipë tuunëp jajtëpën ma ja naax kajpnën.