Read Biblia Mixe de Quetzaltepec Ester 4 Bible Online

Ester 4 - Biblia Mixe de Quetzaltepec bible

Ester 4

¹Ko ja Mardoqueo tnija'awëy tëkokyë mëti'ipë ënäty të tyuny të jyätyën, ënät ojts tkëëty ja wyit ets tyajnikëxë'ëky jëtu'un ko ënäty myony tyuky, tääts tuktëjkëy ja wit mëti'ipë kuumpën u'kxpën, ojts nyätyukupëkyë kuyjaam ets kajpnjoty tyëjkëy najxpë tëjkëpë, mëk jyänty yäxy jyänty jyojky mëët ja monyëtukyë.

²Jëtu'un jam tyimja'ajty ma ja kutujkëntëjkën, je'eyëp ko jämyë nyaaxwä'ky tëjk'ëkë'ëm, jä'ä ko ka'ap ënäty t'ëwa'atstë ja'ay jap tyëkëty këmoontëkoty pën yë'ë wit myëët'ajtyp mëti'ipë kuumpën u'kxpën.

³Näyjyëtu'un maajaty ja kajpnën, ma ojts jyä'tyën jëtu'unpë ja ënä'ämën, ja Jutiiyë ja'ayëty ojts tyëkëtë moonpë tujkpë, jëëpyë yaxpë, tyajkëxë'ëktë ja monyëtukyë. May ojts ja'ay nyäkyo'okyë kuyjaamjoty ets tuktëjkëtyë ja wit mëti'ipë kuumpën u'kxpën.

⁴Ja to'oxytyëjkëty mëti'ipë pyutëjkëtyëpën ja yajkutujkpë Ester ets ja ye'etyëjktëjk mëti'ipë ijx'ijt këwent'ajtëpën, ojts ja Ester tuk'ëwaanëtë mëti'ipë ënäty jap tuunëpën jajtëpën tëja'p. Ënät ja Ester jyotmaytyëjkëy ets tyëjkëy moonpë tujkpë, ojts tkexy ja wit ma ja Mardoqueo ets tjänëty ja wyit mëti'ipë kuumpën u'kxpën. E ja Mardoqueo ka'ap t'a'ijxëy.

⁵Ënät ja Ester t'ënëmaay ja Hatac, mëti'ipë mëët ja yajkutujkpë Asuero tyuunmukyën ets wä'än tuny mëyajtën nëjkx tyajtëy ja Mardoqueo tii tuunëp jajtëp, wi'ix ko jëtu'unpë ja jot winma'any tpaaty.

⁶Tä ja Hatac ojts tninëjkxy ja Mardoqueo. Yë Mardoqueo jam ënäty yajpaaty kajpnjotm, jam tëjk'ëkë'ëm ma yajkutujktaknën.

⁷Ënät ja Mardoqueo ënätyë tukmëmëtyaktaay wi'ix ënäty ja ëyo'on jotmay jyam'atyën, ojts tuk'ëwa'anëtyä'äy jënu'un ënäty ja Amán ja poop pujxn të t'ëwaanën ma ja yajkutujkpën ets kyutëkooytya'atëty ja Jutiiyë ja'ayëty.

⁸Ojts näjyëtu'un tmo'oy ja noky ma myinyën këxja'ay ja ënä'ämën ko y'o'kta'atëty ja Jutiiyë ja'ayëty mëti'ipë jam Susa yajpatëpën, jëtu'un ja Ester tnijawëty yajxon tii tuunëp jajtëpën. Ojts näjyëtu'un mëktä'äky tuknipëky ja Ester ets tmëmëtya'akëty ja yajkutujkpë Asuero, wä'än tuny mëyajtën ets tuktëkëty ya'atë jotmay.

⁹Ja Hatac ojts jatëkok wyimpity ets tukmëmëtyaktaay ja Ester wi'ixjaty ënäty ja Mardoqueo të y'ënë'ëmxëtyën.

¹⁰Ënät jatëkok ja Ester tkejxy ja Hatac ma ja Mardoqueo ets ya'atë ëtsoowinpijtën tmooy:

¹¹Tëkokyë yë wintsëntëjkëty ets ja'ayëty mëti'ipë mëët yajpaatën yë yajkutujkpë, mëti'ipë tsënaaytyëpën ma naax kajpnën mëti'ipë y'ëne'empyën yë yajkutujkpë nyija'awëtyëp; ko tää tu'uk ënä'ämën y'ity mëti'ipë ënaanpën, ko ka'ap tjëkyepy pën tyëkëty ma yajkutujkpë y'ënyääytyaknën pën ka'ap kë'ëm yë yajkutujkpë myëkäjpxyë, oy yë'ëjëty ye'etyëjk to'oxytyëjk. Koonëm tëy kë'ëm yajkutujkpë myëkajpxëtëty, ëkë tpa'ëyowëty ja'ay täänëm tjëkyepy pën tyëkëty; ko näjyëtu'un pën yë yajkutujkpë nyajtstijëp yë tyajk ets pën pya'ëyoopy ja ja'ay ets pën pyokymye'kxyp. E ëjts mëti'ipës tyam nikäjpxypën, yë'ë ko tyam pyoxkojy i'px majk xëëw maas yë yajkutujkpë ka'ap xymyëkäjpxyën.

¹²Ko ja Mardoqueo nyija'ajtë ja ëtsoowinpijtën mëti'ipë Ester kyejxypyën,

¹³ënät näjyëtu'un t'ëtsoowinpijty mëët ya'atë aaw ayuk: Mijts ijxkëm ënät mmääpyë mtajpë ko, oy mjutiiyë ja'ayëty, mtso'okëp ënät mëët ko jap myajpaaty ma kutujktaknën.

¹⁴Pën mijts ka'ap tyam wi'ix m'ëna'any ets amonyë m'ity, ja Jutiiyë ja'ayëty wä'änxyëp wiinktsow tpaatëty pën yajtso'okëtëpën, je'eyëp ko nijawë yajxon ko mijts ets mjëëky mmëku'uk kopkpëky ko m'o'kta'atëty. Mijts ka'ap xynyijawë, wä'änxyëp jam të mja'ty ma kutujktaknën ets tyam xypyutëkëty ja mjëëky mmëku'uk ma yajpaatën ëyo'ontum jotmaytyum.

¹⁵Ënät ja Ester t'ëtsoowinpijty ja Mardoqueo:

¹⁶Yajmujkta'a tëkokyë Jutiiyë ja'ayëty mëti'ipë tsënaaytyëpën Susa ets xynyijëëytya'ak xynyinu'kxta'aktëtyës, ni pën kyakay kya'uukëty tëkëëk xëëw tëkëëk tsu'um. Yë ntuunpëtëjkës, yë to'oxytyëjktëjkëty mëti'ipës yam mëët nyajpaatyën, nän tyam ëëts njëëytya'aka'an nnu'kxta'aka'antë ayuu axëëw ets yam ninëjkxa'anyës ja yajkutujkpë ets mëët nmëtya'aka'anyës, oy jëtu'un t'ëkpaatëty ka'ap yowë nmëmëtoyës ja ënä'ämën kutujkën mëti'ipë jää ijtpën. E pën xyaj'o'ktëpës, wä'än t'ixy.

¹⁷Ënät ojts ja Mardoqueo nyijkxy ets tpatuuny jëtu'un tä ënäty ja Ester të y'ënë'ëmxëtyën.