Read Biblia Mixe de Quetzaltepec Ester 7 Bible Online

Ester 7 - Biblia Mixe de Quetzaltepec bible

Ester 7

¹Yë yajkutujkpë ets ja Amán ojts nyëjkxtë ma ja ka'ayën ukën y'ityën,

²ma ja mëmäjtsk xëëwpë yajwowtën kääpyë. Ënät ja yajkutujkpë jatëkok t'ënëmaay ja Ester: Amëtoowkës tii mtimtsyojkpy, tyam mijts nmo'ojëty, oy yë'ëjëty yë nkutujkënës kujkwä'kxy xytyim amëtowa'anëty.

³Ënät ja Ester y'ëtsooy: Pën xytyukjotkëtakpës ets xytsyojkpës yë yajkutujkpë, yi'iyës n'amëtoopy ets xypya'ëyow xynyajts'ëyowëtyës ets tpa'ëyow tnajts'ëyowëty yë nnaax nkajpnës ets njëëky nmëku'ukës.

⁴Jä'ä ko tëëjës nijawë ko ëëtsëty ets nnaax nkajpnës tëëjës nyajtook nyajyaktë ets ni'ëmukë nkëjxta'a ntëkooytya'atëtyës. Ëjts ka'apës jeexyë wi'ix n'ëna'any koos jeexyë je'eyë të nyajtooktë ets nmëtuntëtyës, ja mëtsip ka'ap jeexyë nëkoo jëtu'un tyimtuuntëkoy ma ja yajkutujkpën.

⁵Ënät ja Asuero tyajtëëy: ¿Pën jëtu'un ets tii ja ja'ay xyëëwajtyp mëti'ipë jëtu'un ëtëtspën?

⁶Ja mëtsip mëti'ipë ëxëëk ja'ay'ajtpën, yë'ë tyaapë y'u'unyën, Amán, jëtu'un ja Ester y'ëtsooy. Ko jëtu'un ja Amán tmëtooy, jëtu'unyë ojts tyimmëkë, ka'ap y'ëktimyu'kxnë mëët ja mëktsë'ëkë ko twinku'ijxëy ja yajkutujkpë Asuero ets ja yajkutujkpë Ester.

⁷Ënät ja yajkutujkpë Asuero yajxon jyoot'anpëjky ets wyä'ätsë'ky, jap ojts nyijkxy tëjk'ëjxy ma ja pëjykyamën. E ja Amán ko t'ijxy ko tëë ja yajkutujkpë tuknipëjktaakë ko yaj'ooka'anyë, ënät tyëjkëy nu'kxtakpë ma ja Ester yajpaatyën ets t'ënëmaay ko wä'än pyokmye'kxyë.

⁸Ko ja yajkutujkpë wyimpijty ets jap tyëjkëy tëkoty ma ënäty jap të kyäy të y'uuktën, tää t'ijxy ko jam ja Amán tyimnäkyëxjujpënë ma ja Ester ja pyuuyën. Ënät ja yajkutujkpë yujk'ënany: Mijts Amán, ¿wi'ixën mwinma'any xytyimpëjktaknë ko jam jëtu'unyë mtimnyäkyëxjujpënë ma yajkutujkpë Ester pyuuyën; ëkë m'ënaanpën ënät näjyëtu'un xymyëët'atanë ja nkutëjkës ëjts nwintuuy maas yë nkë'ëmtëjkënë? Tim je'eyë jëtu'un ja yajkutujkpë Asuero y'ënäny, ënätyë ja tyuunpëtëjk tyëjkëtyë jap tëkoty ets tmajtsë'ktë ja Amán. Tääts ja wit tukwinkupä'änëtyë ets tu'uk y'ënäny mëti'ipë xyëëwajtypyën Harboná: Jam ma Amán tyëjkën, tam tu'uk o'ktakn. Jä'ä kyëjxmëty majkmajkts xajpk ja kujkm. Yë'ë ojts yë Amán tukni'oytyunë yë Mardoqueo ets jam y'ookëty, yë Mardoqueo mëti'ipë ojts ja nija'awën tyäkyën ma mijtsën yajkutujkpë ets ojts myajtso'okyë. Tä ja yajkutujkpë ni'ënä'ämëy ets y'ënäny: Nëjkx jam yo'ktëytyë.

¹⁰Jëtu'un'äämpy ojts ja Amán jam y'ooky ma ja o'ktaknën mëti'ipë ënäty të tukni'oytyunën ja Mardoqueo. Tä ojts jëtu'un ja yajkutujkpë jyotxeemy.