Read Biblia Mixe de Quetzaltepec Éxodo 13 Bible Online

Éxodo 13 - Biblia Mixe de Quetzaltepec bible

Éxodo 13

¹Ënät ja Tios ojts tmëkäjpxy ja Moisés ets t'ënëmaay:

²Ëpëky pëjkta'ak nitëkokyë yë m'u'unk m'ëna'këty mëti'ipë kä'äxkopkëtyën. Jä'ä ko yë Israel ja'ayëty yë kyä'äxkopkëty ëjts yë njä'äniwäämpy, näjyëtu'un yë jyëyujk kä'äxkopkëty.

³Ënät ja Moisés t'ënëmaay ja nyaax kyajpn: Mja'amyätstëp jëtu'un xëmë ya'atë xëëw, ma Wintsën ojts mjuutëtën, mëët yë myëk'ajtën mëjpë këjääpë jap Egiptë ma ënäty je'eyë mëtuntën m'ëyowtën. Ko ya'atë jëtu'unpë ja xëëw po'o tpaatëty winjëmëjt, ka'ap mëpaat xykyäytyë ja tsajpkääky mëti'ipë tsooymyëëtën.

⁴Miitsëty ya'atë xëëw jëtu'un yaa mtso'ontë, ma y'änyën ja po'o mëti'ipë xyëëwajtypyën Abib.

⁵Ya'atë po'o nëjkx mxëëwtuntë, ko jam myajpatnëtëty, ma ënäty ja Tios të mwoownëjkxëtën, ma ja jë'kxy pëky ka'ap y'ëmaaytyä'äkyën. Jam ma tsyëënëtën yë Canaán ja'ayëty, Hit ja'ayëty, Amor ja'ayëty, Heve ja'ayëty ets Jebús ja'ayëty, mëti'ipë ojts tukwinwanën ja aptëjk, ko miitsëty mo'oja'anëtë.

⁶Wëxtujk xëëw tkaytyëty ja tsajpkääky ka'apë tsyooymyëëtëtyën, e ko wyëxtujkxëëwpätëty jää tu'uk yë mëj xëëw xytyuntëty ma ja Wintsën yajmëjjawëtyën.

⁷E jëtu'un y'itëty wëxtujk xëëw, jää xykyäytyëty ja tsajpkääky mëti'ipë ka'ap tsyooymyëëtëtyën, oy jëtu'un tyimmaa'itëty, maajaty yë Israel ja'ay tnitänën, nimaa yë tsooy kyayajpaatëty ëkë tsajpkääky mëti'ipë tsooymyëëtën.

⁸Jä'ä xëëw nëjkx yë m'u'unkëty m'ëna'këty xytyukmëmëtya'aktë. Ya'atë yajtunyën yë'ë yajtukja'amyäjtsp ko ojts ja Tios mëj këjää winë tuny tkäjpxy ma ëëtsëtyën, koos jap xyajpëtsëëmtë ma Egiptë kajpnën.

⁹Jëtu'un ja'amyetsy xëmë xyaj'itëty tä jeexyë jam tu'uk yë ijxpäjtën xymyëët'atën mkë'ëkëjxmëty ëkë mwinpokëjxmëty, ya'atë ijxpäjtën xëmë mtukja'amyätsëtëp ets xëmë xykyajpxtëty xymyëtya'aktë ja ënä'ämën tëyajtën mëti'ipë ja Tios të tyajwë'ëmyën, mëti'ipë ojts mjuutëtën jap Egiptë mëët ja myëk'ajtën.

¹⁰Paaty miitsëty winjëmëjt ya'atë xëëw xytyuntëty ma ënäty tpaatyën.

¹¹Ko yë Tios jam të myajja'tëtë ma Canaán ja'ayëty yë nyaaxjotmëtyën, yë'ë jëtu'un n'antijpyës ko ënäty yë'ë të mkë'ëmooyënëtë ja naax kam, mëti'ipë ojts mtukwinwanëtën ets mëti'ipë tyukwinwa'anëyën ja m'ap m'okëty.

¹²Yë Tios yë'ë kopkpëky mtukmëyoxtëp yë m'u'unkëty m'ëna'këty mëti'ipë më''ëka'any miintëpnëm naaxwiiny, ets näjyëtu'un ja mjëyujkëty mëti'ipë ënäty më''ëka'any mëxu'unk'ajtëpën yë Wintsën jyä'ä'atëp.

¹³E yë krukts ko më''ëka'any y'u'unk tyajmëxu'unk'atëty, yë'ë mtukutëkats'atëp tu'uk yë tsajppax ëkë tu'uk yë kupixyny, yë'ë wintsë'kën'atëp mëët ko ënäty më''ëka'any tu'uk ja y'u'unk të tyajmëxu'unk'aty. Ko xykyayaka'antëty ja kupixyny, tääts nëjkx ja krukts u'unk xytyimyaj'ooktë, yo'kwiity nëjkx xyaj'ooktë. Näyjyëtu'un ënät ko tu'uk më''ëka'any myëxu'unk'atëty ja m'u'unkëty m'ëna'këty, nëjkxëp tu'uk ja wintsë'kën xyaktë, mëti'ipë mtukutëkats'atëpën.

¹⁴E ko nëjkx jëna'a yë m'u'unkëty m'ëna'këty myajtëwëtë: ¿Wi'ix jëtu'un ya'atë nyiwijy? Tääts xy'ëtsowtëty: Yë Wintsën ojts jap xyjyuutës Egiptë mëët yë myëj'ajtën kyutujkën ma ënäty ëëtsëty nmëtun n'ëyowtën.

¹⁵Ko yë yajkutujkpë ka'ap kyäjpxyjyä'äykyujkëy ets ka'ap xy'ëxmatsantës, yë Tios yë'ë ojts tyaj'o'kta'ay yë kä'äxkopktëjk ma Egiptë ja'ayëtyën ets näjyëtu'un ja jyëyujkëty ja y'u'unkëty mëti'ipë më''ëka'any mëxu'unk'ajtën. E paaty jëtu'un ëëts ja Tios ntukwintsë'ëkëtë tu'kë'ëyë yë jëyujk, mëti'ipë ëka'any miintëpën naaxwiiny ets mëti'ipë yä'äyëtyën, jëtu'un ja Tios nmo'otës mëti'ipë ja n'u'unkëtyës kyutëkats'ajtypyën, mëti'ipë më''ëka'any mëxu'unk'ajtëpën, ja ye'etyëjkpë.

¹⁶E ya'atë xëëw yë'ë mtukja'amyätsëtëp wi'ix ojts ja Tios jap mjuutëtën Egiptë mëët ja myëk'ajtën, jëtu'un tä jeexyë tu'uk ja tsa'ayajtën xymyëët'atën mkë'ëkëjxmëty ëkë mwinpokëjxmëty.

¹⁷Ko yë Egiptë mëj'ënä'ämpë ojts t'ëwatsë yë nyë'ë tyu'ujëty yë Israel ja'ayëty, ka'ap ojts jamtsow yë Tios yajnëjkxëtë ma filistejë ja'ayëty yë nyaaxjotmëtyën, ma ja tu'u nyäxyën mëti'ipë jaak'akonën. Jä'ä ko tyaa ojts myäy tyäjy, ko ja Israel ja'ayëty ka'ap ja tsyiptuna'antëty ets tsojk ja wyimpita'antëty jatëkok jap Egiptë.

¹⁸Paaty ojts jamtsow yaj'ëwtitëtë ma ja të'ëts'it të'ëtsjotmën ets jamtsow jya'ajtë ma tu'uk ja mëjmejyën mëti'ipë xyëëwajtypyën Tsaptsmejy. Yë Israel ja'ayëty jëtu'un jap Egiptë myäytsyo'ontë waatswitsy tä yë maytsyiptuunpë tsyoontën.

¹⁹Moisés ojts tmënëjkxy ja José ja wyääy pyajk, jä'ä ko ma ënäty ja José y'ookanën ojts tuk'ëne'emy ja Israel ja'ay ets jëtu'un tuntëty. Jëtu'un y'ënëmaayëtë: Tëy jëtu'un ko yë Tios yë'ë mniminanëtëp ets mputëkëja'anëtë. Ko ënäty jëtu'un tyunyë jyätyë mëtsoontëp yaa yë nwaay npajkës.

²⁰Yë Israel ja'ayëty jam tsyo'ontë Sucot ets jya'ajtë jam Etam, ma ojts jam wäänë y'itën. Jam Etam ëka'any tsyo'ontä'äky ja të'ëts'it.

²¹Ko xyiinyäjty, yoots ojts mëët yë Tios tyu'uwinwowëtë, e ko kyootsajty tu'uk yë jëën kyutë'kxëtë. Paaty tjëkyejpy ets nyë'ëye'ey tyu'uye'eytyëty xëëny koots.

²²Ja yoots jä'ä ënäty xëmë jëwyiin nëjkxp ko xyiiny'äty, e ja jëën jä'ä jëyëjp nëjkxp ko kyoots'aty.