Read Biblia Mixe de Quetzaltepec Éxodo 14 Bible Online

Éxodo 14 - Biblia Mixe de Quetzaltepec bible

Éxodo 14

¹Ënät ja Tios ojts tmëkäjpxy ja Moisés ets t'ënëmaay:

²Ënëëmë yë Israel ja'ayëty wä'än twinpitë ma it naaxwiinyëtën mëti'ipë xyëëwajtypyën Pi-hahirot mëti'ipë itkujky wë'ëmpën ma txëëwatyën Migdol mëët yë mejy, wintuuytsyow ma txëëwatyën Baal-zefón. Jamts tkojtëty yë wyitëjkëty mëti'ipë tyuktsëënëtëpën, ma tääpë naaxën winkonpë ma mejyën.

³Tääts yë Egiptë mëj'ënä'ämpë myäyëty tyajëty: Yë Israel ja'ayëty ka'ap t'ëknija'awënyëtë ma nyëjkxtëtyën, jëtu'unyë jam jyaak kumin jyaak kumatsëtë tä yë ja'ayën mëti'ipë tëë tyëkooynyën jam wintë'ëtstum.

⁴E ëjts tëëjës kë'ëm ntuknipëjktaakë ets mëj'ënä'ämpë yë mëkwinma'any tpaatëty ets mpapo'ojëtëty, ëjts ntuk'ixäämpyës yam yë nmëj'ajtënës ets tëkokyë yë tsyiptuunpëtëjkëty, jëtu'un nijawëtëty yë Egiptë ja'ayëty ko ëjts Wintsën. Yë Israel ja'ayëty jëtu'un ojts tjantytyuntë.

⁵E jap Egiptë, ja yajkutujkpë ojts tnijawë ko ja Israel ja'ayëty tëë ënäty nyakäkpëtsëëmnëtë, paaty ja mëj'ënä'ämpë mëët ja wyintsëntëjkëty mëti'ipë mëët tyuunmukyën ojts ja wyinma'any tyajtëkatstë ets y'ënantë: ¿Wi'ix ko të n'ëk'ixmajtsëmpë yë Israel ja'ayëty ets nyëjkxtëty ets ënät ja ntuunk'ajtëmë jëtu'unyë wyë'ëmëty?

⁶Ënät ja mëj'ënä'ämpë ojts ënätyë tni'ënä'ämë ets tni''ixëtëty ja kepy wintëkäämpë mëti'ipë myëtsiptuuntëpën ets jëtu'un twoowtso'ontaay tëkokyë ja tsyiptuunpëtëjk.

⁷Tëtujk mëko'px ojts ja kepy wintëkäämpë tmënëjkxtë oyjyätyëtypë ets ëpëky ja wiinkëtypë ja kepy wintëkäämpë, tëkokyë mëti'ipë jap Egiptë yajpatëpën, aakmëët ja nyija'ayëty mëti'ipë yajye'eytyëpën.

⁸Tios ojts jëtu'un tyajkutuky ets mëj'ënä'ämpë ka'ap ninu'un oy myäyëty tyajëty, tyam tëë ënäty tja'ixy wi'ix ja Israel ja'ayëty të pyëtsëmtën jap Egiptë ets ni'ikyë tpatso'onpë.

⁹Tëkokyë yë tsiptuunpëtëjkëty japë Egiptë ojts tmëtso'onta'atë yë kepy wintëkäämpë ets kyëwaayëty, tääts ojts tpatsoontë ja Israel ja'ayëty; jam tnajtspatëtyë ma ja it txëëwatyën Pi-hahirot, mëti'ipë winkon wë'ëmpën mëët ja it mëti'ipë yajtijpën Baal-zefón, ma jam tu'uk ja mëjnëë jyënäkyën, ma ja Israel ja'ayëty ënäty të tsyënaaytyaknpëktën.

¹⁰Ko ja Israel ja'ayëty t'ijxpatë ko ja mëj'ënä'ämpë jam wyinkony mëët ja myäytsyiptuunpë, ënät ojts ja tsyë'ëkëtë ets ënätyë t'amëtoowtë ja putëjkën pupäjtën ma Tiosën.

¹¹Tä t'ënëmaaytyë ja Moisés: ¿Tii o'kpë jut jëtää ënäty jap ka'ijtpë Egiptë ets yaa muum nmi'inmëty o'kpë tëkoopyë yaa wintë'ëtstuuyë? ¿Tiis ko jëtu'un xytyuntë? ¿Wi'ixës ko të xyajpëtsëmtë jap Egiptë?

¹²Ya'atë ojts nja'ëntijtës, ko jap nja'ënëmaaytyë: Ixmajtstëkës minës yë'ë n'ëkmëtuntë yë Egiptë ja'ayëty, jaak'oy'ajtp koos yaa je'eyë ntimmyëtun ntimkyupëktëty ets këtii koos jam nëjkx muum je'eyë n'ooktë wintë'ëtstum.

¹³Tä ja Moisés ojts y'ëtsowëtë: Këtii mtsë'ëkëtë, yajpaatë amëk jotmëk, yë Tios jëtu'un të tuknipëjktaakë ets tyam xy'ixtëty wi'ix myajtso'oka'anëtë; yë Egiptë ja'ayëty nijëna'a nëjkx jëtu'un tka'ëk'ijxnëtë, tä tyam t'ixa'antën.

¹⁴Miitsëty këtiimës mmaytyë mtajtë, yë Tios yë'ë mnitsiptunanëtëp.

¹⁵Ënät yë Tios t'ënëmaay yë Moisés: ¿Wi'ixës ko xy'amëtoy yë putëjkën pupäjtën? Ënëëmë yë Israel ja'ayëty wä'än tu'uye'eytyë.

¹⁶E mijts kajpë'ëkmës yë mtajk ets xynyajtstijëty jam yë mkë'ë ma mëjmejyën ets nyäwya'kxëtëty mäjtskpëky. Jëtu'unts yë Israel ja'ayëty tuknaxtëty yë mejy të'ëts wa'ats.

¹⁷Ëjts jëtu'un të ntuknipëjktaakës ets Egiptë ja'ayëty yë mëkjot mëkwinma'any tpaatëty ets mpapo'ojëtëty, jëtu'unës yë mëj'ënä'ämpë ntuk'ixa'any yë nmëj'ajtënës mëët nitëkokyë yë tsyiptuunpëtëjk, mëët yë kyepy wintëkäämpë ets mëët yë këwaayëty.

¹⁸Koos ënäty jëtu'un të nyajkëxë'ëky ja nmëj'ajtënës ma ja mëj'ënä'ämpën, mëët nitëkokyë ja tsyiptuunpëtëjk ets ja kyepywyintëkäämpëty ets ja kyëwaayëty, ënätnëm nëjkx ja Egiptë ja'ayëty y'ëna'antë ko janty ëjtstëm jëtu'un Wintsën.

¹⁹Ënät ja Tios ja kyukajpxpë ojts ënätyë kyëtä'äky ets ja yoots nyäpyëjktakë ix'am, mëti'ipë ja Israel ja'ayëty ënäty jëyëjp winye'eyëtëpën.

²⁰Ja yoots itkujky ojts nyäpyëjktä'äkyë ma ja Israel ja'ayëtyën mëët ja Egiptë ja'ayëty. Ja Egiptë ja'ayëty je'eyë ënäty ja yoots t'ixtë janty yëkëm, e jam ma ja Israel ja'ayëtyën të'kxp jajp jam kyëxë'ëky. Paatykyëjxm ja Egiptë ja'ayëty ka'ap tjëkyäjptë tnajtspaatëtëty ja Israel ja'ayëty, jëtu'un nyäjxy ja tsu'um.

²¹Ënät ja Moisés ja tyajk jam tnajtstijëy nëëjotm, tä ja Tios tu'uk ja mëkpoj tkejxy, tu'ktsu'um ojts pyojy ets ja nëë mäjtskpëky nyäwya'kxë. Jëtu'un ojts ja Tios ja naax tyajnitëtstu'uty jam nëëjotm,

²²ets ojts ja Israel ja'ayëty ja nëë tuknaxtë ma ënäty të nyäwyä'kxyën mäjtskpëky, ja nëë jëtu'un ojts kyëxë'ëky apojtsë'ëkypën mäjtskpa'ajëty.

²³Tääts tpatëjkëtyë ja tsiptuunpëtëjkëty mëti'ipë ja kwaay tyuk'u'unyääytyëpën ets ja mëj'ënä'ämpë ja myäkyepywyintëkäämpë jampaat ojts tpaja'të nëë'itkujky.

²⁴E kujk ënäty ëka'any jyajtä'äky ko ja wintsën t'ijxy ja maytsyiptuunpëtëjk japë Egiptë tsyoontën. E ja Tios jap ënäty yajpaaty ma ja yootsën, jëtu'unpë kyëxë'ëkyën tä yë jëënën, ënät jëtu'unyë tyimlokëjajtaaytyë ja tsiptuunpëtëjkëty, aakyë'ë ojts nyäy'ijxma'tënëtë.

²⁵Ënät mya'taay ja kepy wintëkäämpë nyiye'eypyäjn ets oywyi'ix ojts jyaak nëjkxtë, paaty ojts y'ëna'antë ja Egiptë ja'ayëty: Nikë tsojk ntimkyukäkëmë yë Israel ja'ayëty, jä'ä ko jëtu'un kyëxë'knë yë Tyiosëty yë'ë yowë kuwanëtëp ets yë'ë nitsiptuunëtëp ma ëëtsajtëmën.

²⁶E yë Tios tyaa t'ënëmaay yë Moisés: Nastijë yë mkë'ë mëët yë mtajk jam nëëjotm ets Egiptë ja'ayëty nyëënikoompäjta'atëty mëët tu'kë'ëyë yë kyepy wintëkäämpë ets kyëwaayëty.

²⁷Ënät ja Moisés ojts ja kyë'ë tnajtstijë jam nëëjotm. Ko ojts xyiinyënë, ja nëë tëë ënäty jatëkok nyämyukyë. Paaty ko ja Egiptë ja'ayëty ojts jyakä'äkanëtë ja komnëë ojts twinkuja'tëtë, tääts kyiintaaytyë ets ja Tios yaj'o'ktaayëtë.

²⁸Ko ja mëjmejy jatëkok nyämyujkë jëtu'unyë ojts tyajnikoonpäjta'ay ja Egiptë ja'ayëty mëët ja kyepywyintëkäämpëty ets mëët ja kyëwaayëty, tëkokyë ja tsiptuunpëtëjkëty mëti'ipë ënäty të tpatëkëtën ja Israel ja'ay jap nëëjoty, nitu'uk ojts kyawë'ëmy juuky mëti'ipë ja mëj'ënä'ämpë tsyiptuunpë'ajtypyën.

²⁹E ja Israel ja'ayëty të'ëts wa'ats ojts tuknaxtë ja nëëjot, ma ënäty të nyäwyä'kxyën ja nëë mäjtskpëky.

³⁰Jëtu'un ja Tios ojts tyajtso'oky ja Israel ja'ayëty jä'ä xëëw ma ja Egiptë ja'ayëtyën. Yë Israel ja'ayëty y'ijxtë ja may o'kpë, ko jam myäykyëniinpëtsëmtë nëëpë'am.

³¹Ko ja Israel ja'ayëty t'ijxtë ja Tios ja myëj'ajtën mëti'ipë tyuunën ma ja Egiptë ja'ayëtyën, ënät ja Tios tmëjja'awëtyë ets tmooytyë ja näywyinkutsë'kën, tä ojts jam tu'ukyë timpyëjkta'aktë ja wyinma'anyëty ma yë'ëjën ets näjyëtu'un ma ja tyuunpën Moisés.