Read Biblia Mixe de Quetzaltepec Éxodo 15 Bible Online

Éxodo 15 - Biblia Mixe de Quetzaltepec bible

Éxodo 15

¹Ënät yë Moisés mëët nitëkokyë yë Israel ja'ayëty ojts t'ëwtë ya'atë ëy ets ojts yë'ë mëët tmëjjawëtë ets tukxoonta'aktë ja Wintsën: Ëwtë ya'axtë ets mëjjawëtë kënu'kxyjyawëtë yë Wintsën, jä'ä ko yë'ë të myëtä'äky ko të tyajkiinta'ay yë këwaayëty mëët yë nyija'ay mëti'ipë ënäty tuk'ënyääyëpën.

²Ëjts nwin'ëëpy nwinyäxypyës yë Wintsën, jä'ä ko yë'ëjës xymyëkmoopy xymyëjaawmoopy ets yë'ëjës xyajnitsokp. Yë'ëjës nTios'ajtyp paatyës nwin'ëy nwinya'axy. Yë'ë näjyëtu'un yë nteetyës ojts tTios'aty, paatyës nmëjjaw nkënu'kxyjawë.

³Yë Wintsën yë'ë tu'uk mëjtsiptuunpë. Wintsën, xyëëwajtyp.

⁴Yë Wintsën tëë tyajkiinta'ay yë kepy wintëkäämpë jap nëëjoty mëët yë tsyiptuunpëtëjk yë mëj'ënä'ämpë, e ja tsiptuunpë wintsënëty, mëti'ipë ënäty mëj'äämpy ijtëpën, ojts nyëëji'kxta'atë ma ja mëjmejyën mëti'ipë xyëëwajtypyën Tsaptsmejy.

⁵Jap kya'ataaytyë këkmejyjoty. Jëtu'un kyuka'anajxtaaytyë tsaajën. Ja komnëë ojts nyijä'tstëkoyëtë.

⁶Wintsën yë mmëkajtën mkutujkën yë'ë winë të tuny, mëti'ipë mëkën ets maaytyääyëp winë, mëti'ipë ojts tjaamteeny tnaaxteenyën ja mëtsip.

⁷Mëët yë mmëkajtën, yë'ë mëët xyjyaamte'eny xynyaaxte'eny, ja mëti'ipë mjanipëtë'kën, ko ja mjoot'an yajxon tyooypyijky. Ënät yë'ëjëty tyooytyëkooytyääytyë jëtu'un tä mëëy tyoyën.

⁸Ojts tu'uk ja mëkpoj xyajminy ets ja nëë ojts ëpëkyjyäty nyäpyëjktä'äkyë. Yë nëë'o'pyk jëtu'un jya'ajtaay tä tu'uk yë potsyën. Ja nëë ja jampë ënäty nëë'itkujky ye'eytyën, jëtu'unyë myëkëtyääytyë.

⁹Yë mmëtsip tyaa ënäty të myäy të tyäjy: Mpapo'ojäämpyës yam mapaatës najtspaatën, etsës nyajwa'kxtaja'any, mëti'ipës ënäty të mpëjkëtyä'äyën, koonëmës yajxon nku'uxëtëty. Etsës nkupujxta'aja'any mëët ja mpujxnës, mëti'ipës nkë'ëkë'ë'ajtypë.

¹⁰E ko ojts xyajpojyu'kxy, jëtu'unyë ja nëë ojts nyikoonpäjta'ajëtë. Jëtu'unyë jap kyiintaaytyë tä tu'uk yë pujxn kyinyën.

¹¹Wintsën; nimëti'ipë tios mijts mkamëpaatëtëty. Nimëti'ipë tios winë tëyajtën tkatuny, tä mijts winë tëyajtën xytyunyën. Mijts mëj këjää winë xytyuny ets atsë'ëk ajawë. Mijts mpatëp myajmëjjaw myajjaantyjyawëty.

¹²Ojts ja mëk'ajtën xynyajtsmatsë ets ja naaxwiinyëtë jëtu'unyë jyë'ëntaayëtë.

¹³Yë'ë mëët yë mtsojkën mja'awën ya'atë naax kajpn xytyu'uwinwoy mëti'ipë të xyajtso'okyën. Yë'ë mëët yë mëk'ajtën jam xyajnëjkxy jam ma mtsajptëjkën.

¹⁴Yë naax kajpn yajxon nëjkx tsyë'ëkëtë jyawëtë, ko jëtu'un nijawëtëty. Yë filistejë ja'ayëty jëtu'unyë nëjkx nyäwyiit nyäxyaatsëtë, mëët ja pëjkën ato'onën.

¹⁵Ja wintsëntëjkëty mëti'ipë jam yajpatëpën Edom, jëtu'unyë wyë'ëmta'aja'antë xejytyuky. Näyjyëtu'un ja kopktëjkëty jampë Moab y'itën, näjyëtu'un nëjkx tsyëtyuuypyëjkta'atë mëët ja tsë'ëkë ets ja Canaán ja'ayëty nëjkxëp ja jyotmëk'ajtën tyëkooytya'atë.

¹⁶Wintsën, wä'än tsë'ëkëtë, wä'än tsë'ëkëtë tjawëtë. Wä'än jëtu'unyë twë'ëmta'atë tä tsaajën mëët ja mëk'ajtën mkutujkën, koonëm ënäty ja mnaax mkajpn të nyajxta'atë, ja mëti'ipë të xyjyä'äniwa'anyën.

¹⁷Wintsën, jamës yajnëjkxtëk tsënääpyë ma mtun mkopkën wa'atspë tsujpë. Jam ma ja itjotmën mëti'ipë të xywyin'ixyën, etsës jam ntsëënëtëty ma ja mtsajptëjkën mëti'ipë ojts mijts kë'ëm xykyojyën.

¹⁸Yë Tios yë'ë jëtu'un ënä'ämp yajkutujkp winë xëëw winë jëmëjt.

¹⁹Ko tyëjkëtyë ja kepy wintëkäämpë ets ja këwaayëty jap nëëjoty, yë Tios yë'ë ojts tyajkutuky ets ja nëë jëtu'unyë nyijä'tstëkooytya'ajëtëty, yë Israel ja'ayëty jëtu'un ja nëë tuknajxtë tä jeexyë wintë'ëtstuuy ye'eytyën të'ëts wa'ats.

²⁰Ënät ja Maria käjpxynyajxpë, ja Aarón ja y'uty, tpëjkë'ky tu'uk yë xijtn ets ojts pyaye'eyi'ikyë ja maytyo'oxy'ëna'k, tääts tyëjkëtyë äjtspë, tjantyaj'ëna'antë ja pyo'ojëty.

²¹Tä ja Maria ojts t'ëy ya'atë ëy: Win'ëw winya'axtë yë Tios ets mëjjaw kënu'kxyjyawëtë. Jä'ä ko yë'ë jëtu'un të myëtä'äky mëjwiin këjää, ko të tyajkiinta'ay ja këwaayëty, mëët tu'kë'ëyë ja nyija'ay mëti'ipë tuk'ënyääyëpën.

²²Ënät ja Moisés twoowtso'ontaay ja Israel ja'ayëty jam ma mëjmejyën mëti'ipë xyëëwajtypyën Tsaptsmejy, jam ojts nyëjkxtë ma të'ëts'it të'ëtsnaax txëëwatyën Shur, tëkëëk xëëw tyu'uye'eytyë, nimaa ja nëë tkapatë.

²³Ko jam jya'ajtë ma tu'uk ja naax txëëwëtyën Mará, jam tpatë tu'uk yë nëëwooky, e ja nëë ta'am ënäty, ka'ap tjëkyejpy t'uuktëty, paatykyëjxm ojts txëëwmo'otë Mará.

²⁴Ënät ja ja'ayëty ojts tyëkëtë kajpxpë, je'eyë ja Moisés tjantynyi'ojëtë ets t'ënëmaaytyë: ¿Tiitën ëëts ënät n'uuktëp?

²⁵Tä ja Moisés ojts t'amëtoy ja putëjkën pupäjtën ma Wintsën Tiosën, ënät ojts tyukni''ixëty tu'uk yë kepyxye'enty, tä yë Moisés tnëëkupëjky ya'atë kepyxye'enty ets ojts ja nëë y'awinpity pa'ak. Jam ja Tios ojts wyinma'any'ixëtë ets tpëjktäky tu'uk yë ënä'ämën ma yë'ëjëtyën mëti'ipë pyatuntëpën.

²⁶Ets t'ënëmaay: Pën mijts mja'akyujkëtyëp tëkokyë mëti'ipë yam ntuk'ënëmaaytyëpën, mëët koos ëjts nWintsën'aty, mëti'ipë miitsëty mTiosajtëpën. Pën mtuuntëp jëtu'un mëti'ipës ntukjotkëtäkpyën, ko ënäty xypyatuntë ja n'ënä'ämënës ntëyajtënës, ka'ap ntuknikäxtëty ja ëyo'on jotmay mëti'ipës jap të nkexyën Egiptë, jä'ä ko ëjts Wintsën mëti'ipë miits myajtsokëtëpën.

²⁷Kom ok tääts jam jya'ajtë ma txëëwatyën Elim, majkmäjtsk ënäty jam ja nëë awookë ets tëkë'px majk ja tëëxykyepy, jam ja Israel ja'ayëty tsyënaaytyaknpëjktë.