Read Biblia Mixe de Quetzaltepec Éxodo 16 Bible Online

Éxodo 16 - Biblia Mixe de Quetzaltepec bible

Éxodo 16

¹Tëkokyë yë Israel ja'ayëty ojts tsyo'onta'atë jam Elim ets ojts nyëjkxtë jam ma tu'uk të'ëts'it txëëwatyën Sin, itkujky yajpaaty mëët yë Sinaí ets Elim. Majkmokx ënäty y'äny ja po'o ja mëmäjtskpë mëët ma ënäty të tsyoontën jap Egiptë.

²E ko jam jya'ajtë ma ja të'ëts'itën, ënätyë tnimëtyaktëjkëtyë wiinkjaty ja Moisés ets ja Aarón.

³Y'ënantë: Nikë oy jeexyë yë Tios të xytyimyaj'o'këmë jap Egiptë, yajxon ijty jap yë kaaypyäjn nwinkuwä'tsëmë ujts mëët yë tsu'utsy ets ijty njanty jyë'kxëmë koonëm yajxon nkuxëmë, e miitsëty koos yaa të xywyoowmiintëpë jëtu'un tpatnë o'kën tëko'oyën yowë të xytyuknimintës.

⁴Ënät ja Tios t'ënëmaay ja Moisés: Ntuknikäxantëp yam yë ka'ayën ukën may'äämpy mëti'ipë tso'onpën tsajpjotm, winjopy yë ja'ay tpëjkmujkojtëty yë jyi'kxy pyikyëty, jëtu'un tä t'a'ixëtën naje'eyë nyipaatëty tu'kxëëw. Ëjts n'ixäämpyës pën jyänty kuuytyuuntëp jëtu'un tääjës yam nikäjpxyën.

⁵Komtëtujk xëëw ko xynyipëjktaakëtëty mëti'ipë mënëjkxantëpën ma mjëën mtëjkëtyën, jaakni'ikjawë ja mjë'kxy mpëky xypyëjkmuktëty, ka'ap jyëtu'unëty tä xëmë winjëpom xyajmuktën je'eyë tu'kxëëwkay, jä'ä xëëw jä'ä xypyëjkmuktëty mäjtsk xëëw kay.

⁶Ënät yë Moisés ets Aarón t'ënëmaaytyë yë Israel ja'ayëty: Tyam ko jyënäkyxyëëw'atëty jää ënät xynyijawëtëty ko yë Wintsën yë'ë ojts mjuutëtë jap Egiptë.

⁷E ko jyopy'atëty, jää xy'ixtëty yë Tios yë myëj'ajt y'oyajtën, yë'ë wa'ats të tmëtoy ko miitsëty wiinkjaty të xynyimëtya'aktë. ¿Jä'ä ko ëëtsëty tii mëj'ajtën n'ëkmëët'ajtëpës etsës xynyi'oj xynyiyaaxëtëty?

⁸Tä yë Moisés ojts jyaakëna'any: Ko jyënäkyxyëëw'atëty jää yë Tios mo'oja'anëtë yë tsu'utsy mëti'ipë mtukkaytyëpën, e ko jyopyëp'atëty yë'ë mo'ojanëtëp yë tsajpkääky mëjwiin këjää, jä'ä ko yë'ë tëë tmëtoy ko miitsëty wiinkjaty xynyikajpx xynyimëtya'aktë, ëëtsëty ¿tii mëj'ajtënës n'ëkmëët'ajtëp? Ko miitsëty wiinkjaty të m'ëna'antë, ka'ap jëtu'un y'ëëtsëty të xytyijtë, Tios jëtu'un wiinkjaty të xytyijtë.

⁹Ënät yë Moisés t'ënëmaay yë Aarón: Ënëëmë tëkokyë yë Israel ja'ayëty, wä'än tmëwinkontë yë Tios, jä'ä ko yë'ë tëë tmëtoy ko tëkatsyëty yë aaw ayuk të nyipëtsëmyë.

¹⁰Ma ënäty jam jëtu'un ja Aarón myëtyä'äkyën mëët yë Israel ja'ayëty, ënät jam nyajts'ijxëtyääytyë të'ëts'itum ets ojts ja Wintsën t'ijxëtë ja myëj'ajt y'oyajtën yootsjotm.

¹¹Ënät ja Tios ojts tmëkäjpxy ja Moisés ets t'ënëmaay:

¹²Tëës nnijawë ko yë Israel ja'ayëty je'eyë wiinkjaty myäytyë tyajtë. Paaty tyam kopkpëky ko xymyëkajpxëty ets xy'ënëëmëty: Ko jyënäkyxyëëw'atëty, ja tsu'utsy jää mtsu'utstëp, e ko jyopyëp'atëty yë tsajpkääky jää mkaytyëp, koonëm yajxon m'utstëty. Jëtu'unts xynyijawëtëty ko ëjtsë jëtu'un Wintsën mëti'ipë Tios'ajtpën.

¹³Jä'ä xëëw ma ënäty të yaj'akäjpxyën, ko jyënäkyxyëëwajty myäymyiintë ja muuxy ets tyajwintujktaaytyë ja tsënaaytyakn ma ja Israel ja'ayëty jam tsyëënëtën, komjopy jëtu'un yaj'ixy tä nëma'ajën.

¹⁴E ko ojts pyojë'ktaaynyë ja nëma'a, ënät jam yaj'ijxy tä yë tip kyä'äyën naaxkëjxy jam të'ëts'itjotm.

¹⁵Yë Israel ja'ayëty ka'ap tnijawëtë tiitën jä'ä, ko t'ijxtë tääts nyäyajtëëwëtë aak yë'ëjëty: ¿Tiitën ya'atënë? Tää ja Moisés y'ëtsoowëtë: Yë'ë tsajpkääky mëti'ipë ja Tios mooyëtëpën ets xyjyë'kxtëty xypyëktëty.

¹⁶Tëë Tios tu'uk ja ënä'ämën tyäky: Ko nitu'ukjaty xyajmuktëty ya'atë tsajpkääky, jënu'un tä xy'a'ixëtën naje'eyë myëta'akëty ma ja mjëën mtëjkëtyën ets ninu'un jap mjuuky'atën, jä'ä nëjkx xyajmuktë ya'atë jë'kxy oy mäjtsk'a'ukën ja tu'ukpë ja'ay tjë'kxëtyën.

¹⁷Jëtu'un tjantyuuntë ja Israel ja'ayëty. Pënëty ojts wäänë tyajmuky ja jyi'kxy pyiky, pënëty mëti'ipë ojts may tyajmukyën ja jyä'ä.

¹⁸Jëtu'un ijxtëm ënäty të yajtuk'ëwaanëtën tyajmuktëty, jëtu'un ojts tjanty yajmuktë, mëti'ipë ja jyä'ä may pyëjkmujkën ka'ap ojts tii nyatëkë, e ja mëti'ipë wäänë ja jyä'ä yajmujkën, nän ka'ap ojts tii myëyajtxëty; jä'ä ko nitu'ukjaty ja ja'ayëty jëtu'un ënäty të tyajmuktë, tä tyajmëyatën.

¹⁹Ënät ja Moisés ojts näjyëtu'un y'ënë'ëmxëtë: Ni pën mëpaat tii tkayajwë'ëmy ets y'ënaanpëty komjëpom tjë'kxa'any.

²⁰Ka'ap pën tyëkoy'äjty, mëti'ipë ka'ap tja'akyujkëyën, mëti'ipë ja Moisés ojts tjanikäjpxyën, ojts ja tyajwë'ëmy ja jyi'kxy ets komjëpom nyätyukjëjp'ijxyë. Ja mëti'ipë ojts tyajwë'ëmtën, ko komjëpom t'ijxpatë tëë ënäty nyatënë'këtyääynyë ets xu'knëp. Ënät ja Moisés ojts mëk y'ëwa'antä'äky ko jëtu'un y'ëtëtstë.

²¹Nitu'ukjaty ja ja'ayëty tsojk ijty tyajmujkojtë ja jyi'kxyëty ko jyopyëp'aty, jëtu'un tä ënäty këëkjä'ä tyajmëyatën, jä'ä ko ja xëëw pyajnë tääts jyiiywya'kxtaaynyë.

²²E ma tyëtujkxëëwpetyën jää ijty may tyajmuktë tä mëpaat naje'eyë mäjtsk xëëw tni''itën. Jä'ä tpaaty taxknëë'a'ukënjaty tu'kja'aypyë, e ko jëtu'un t'ijxtë ja kopktëjkëty ma ja naax kajpnën, ënät ojts ja Moisés tuk'ëwaanëtë,

²³ets ja Moisés y'ënäny: Jëtu'un yë Tios të tni'ënä'ämë, ijxtëm xynyijawëtën po'kxënxëëw jopy, tu'uk ja po'kxënxëëw mëti'ipë ja Tios yajtukmëjja'awëpën, paaty oytyuntë tyam yë mjë'kxy mpëkyëty, mëti'ipë jyëkyejpy tyam xynyipëjktaakëtëtyën. E mëti'ipë ënät tyam natëkëpën, yë'ë jëpom mnätyukjëjp'ixëtëp.

²⁴Jëtu'un tä ënäty ja Moisés të tni'ënä'ämën, ojts jëtu'un tjantypyëjkë'ëktë ja jyi'kxyëty pyikyëty, mëti'ipë ënäty të nyatëkën. Jä'ä komjëpom nätyukjëjp'ijxëtë ja mëti'ipë ojts tpëjkë'ëktën, niwi'ix ojts kyajaty, ka'ap ojts tyënë'kë ets ka'ap ojts wi'ix xyuuky jyoky.

²⁵Ënät ja Moisés y'ënäny: Tyam je'eyë jëtu'un timjë'kx timpëktë, jä'ä ko ya'atë po'kxënxëëw, yë'ë yë Tios mëpaat yajtukwintsë'ëkë, ya'atë xëëw katii jam tyam xykyapaatëty kamjotm tu'ujotm.

²⁶Jyëkyäpëp xypyëjkmuktëty yë mjë'kxyëty mpëkyëty tëtujk xëëw jëtu'un y'itëty, e ma wyëxtujkxëëw'ajnën po'kxënxëëw jäänë, ka'ap jää tii y'ita'any.

²⁷Tam mëti'ipë ojts jyatsoontën ets ja jyi'kxy tjayajmuka'antë, ka'ap ojts tii tpaatë.

²⁸Ënät ja Tios ojts t'ënëëmë ja Moisés: ¿Jëna'a jëtää mja'akyukëja'antë, miitsëty xëmë yowë je'eyë xykyäjpxykyutëjanëtë yë n'ënä'ämënës ntëyajtënës ets n'aaw n'ayukës?

²⁹Yë'ë yajxon mtimyjä'äymyätstëp, ko ëjts, mëti'ipë Wintsën'ajtpën, tëëjës tu'uk nnikäjpxy yë xëëw, mëti'ipë mpo'kxtëpën. Paatykyëjxm ma tyëtujkxëëwpetyën nmo'otë miits yë mjë'kxy mpëkëty mëti'ipë naje'eyë mni''itëpën mäjtsk xëëw. Ko ënät wyëxtujkxëëwpety, jam myajpaatëty ma mjëën mtëjkëtyën ets ni pën kyatsoonëty.

³⁰Ënät ja ja'ayëty ojts ya'atë xëëw tjantypyo'kxtë ma wyëxtujk xëëwpetyën.

³¹Ja Israel ja'ayëty jä'ä ojts tijtë maná mëti'ipë ënäty winjopy yajmujktëpën. Ya'atë maná jä'ä ënäty y'ixëty poop ets jëtu'un kyëxë'ëky tä yë tsajpmokën ets pya'akëty jëtu'un tä yë tsajpkääkyën cerëpa'akmëëtpë.

³²Ënät ojts ok ja Moisés y'ënä'äny: Ya'atë jëtu'un ënä'ämën'ajtp mëti'ipë yë Tios të tyäkyën: kijpxtë ëpëky mäjtsk nëë a'ukën yë maná, mëti'ipë yë'ë mtuknipëjkë'ëkëtëpën ja m'u'unk m'okëty. Yë'ët nëjkx t'ixtë ets nijawëtëty wi'ix ojts miitsëty ja ka'ayën ukën nmo'otën nkäxtën të'ëts'itum, ko nyajpëtsëëmtë jap Egiptë.

³³Ënät näjyëtu'un t'ënëmaay ja Aarón: Ix tu'uk yë katsy ets ënät jap xy'apëkëty yë maná oy mäjtsk nëë a'ukën, tä ënät ok xytyukwintsë'ëkëty yë Tios. Japts wyë'ëmëty pëjkë'ëky, yajtuknipëjkë'ëkëtëty ja m'u'unk m'okëty.

³⁴Jëtu'un tä ja Tios ënäty të tmo'oyën ja ënä'ämën ja Moisés, ojts ja Aarón tu'uk ja katsy tjanty'ixy ets ojts jap tpëjkë'ëky ja maná, jap tkupëjkëy ma ja Tios ja kyaaxën ets jap ja maná ojts pëjkë'ëky wyi'imy.

³⁵Yë Israel ja'ayëty jä'ä ja maná tkaaytyë t'uktë wëxtyikxy jëmëjt, koonëm ojts jam jya'të ma ja naax kajpnën, ma ja tsyëpa'an nyäxyën ja Canaán itjotm.

³⁶Ja kijpxën mëti'ipë yajtijpën gomer, jä'ä ënäty jye'emtyëty tu'kpëky je'eyë ma ja majk pëkpyën.