Read Biblia Mixe de Quetzaltepec Éxodo 23 Bible Online

Éxodo 23 - Biblia Mixe de Quetzaltepec bible

Éxodo 23

¹Këtii tii tëkatsyjyäty xynyipaye'eyëty ets këtii xy'apupätëty ja mëti'ipë pokymyëëtën, këtiipë tyekymya'atëty ja tëyajtën ets ja yajnipaye'eyën.

²Këtii xymyëjwa'kpätëty ja mayjyä'äy ko ëxëëkjaty winë tuntëty tkajpxtëty. Ko muum ja m'ayuk tëyajtënpë xykyë'ëyaka'anëty oy jëtu'un xyjya'ixëty yë mayjyä'äy këtii mtsë'ëkëty ets këtii jam mnäkyë'ëyakëtëty ma ja ka'apë myëtëyëtyën.

³Këtii xytyimmëpëjkta'ajëty ja y'aaw y'ayuk ja ëyoopëja'ay.

⁴Pën mpatëp ja mëtsip ja jyëyujk tsyajpkaa, mëti'ipë ënäty të tyëko'oyxyëtyën, yajwinpijtë jatëkok.

⁵Këtii xytyukmëj'atëty yë näpyutëjk näypyupätë ma ja mëtsipën, pën jam xy'ixy ko tëë yë jyëyujk tmëkëtay yë tsyimy, pa'tijë ënätyë ets xytyuknikäjtu'utëty.

⁶Këtii m'ënaanpëty ko ja ëyoopëja'ay ka'ap xynyipaye'eyä'äny mëti'ipë paat'ajtëpën.

⁷Këtii xymyëpëkëty mëti'ipë je'eyë myëku'uk wiinkjaty nyikäjpxyp nyimëtyäkpyën. Këtii xyaj'ookëty mëti'ipë ka'ap tii poky tmëët'atyën; jä'ä ko mëti'ipë pokymyëëtën ka'apës nnikajpxa'any ko ka'ap pyokymyëëtëty.

⁸Këtii xykyupëkëty ko ja'ay tii mo'ojëtëty, mëti'ipë näjya'awëyëpën pokymyëët, jä'ä ko jëtu'unpë je'eyë nëkoo yajkujo'opy ets jä'ä tyuunpy ets ja ëyoopëja'aytyëjk ijxtëkoy ja'atyëkoy y'itëty.

⁹Këtii ëxëëk xytyunëty yë jaaypyo'kxyjyä'äy, jä'ä ko miitsëty ojts jap mjëpyo'kxyjyä'äy'atë Egiptë ets wa'ats xynyijawëtë wi'ix y'ixëtyën ko muum pën yajpaaty wiinkë'ëy wiink kajpn.

¹⁰Yajtun ja mnaax mkam ets jam xyajpëtë'ëkëty yë mpëjktä'äky ets mtunëty mpëkëty tëtujk jëmëjt,

¹¹e ko wyëxtujkjëmëjtpätëty këtii jää nitii xy'ëkyaj'ijnëty, ëxmats yë naax, wä'än näjyëtu'un tu'kjëmëjt tpo'kxy ets jam jyi'kxypyaatëty ja ëyoopëja'ay, mëti'ipë yajpatëpën ma ja mnaax mkajpnën ets näjyëtu'un ja jëyujk jam jyi'kxypyaatëty, ma mëti'ipë ënäty natëjkëpën. Jëtu'un xytyunëty oy jyamëty ma m'tsatsym kamën ets maa m'olivë kamën.

¹²Tëtujkxëëw mtunëty ets jää xyajwintu'upëkëty winë. E ko wyëxtujkxëëwpätëty, jää mpo'kxëty, jëtu'un näjyëtu'un pyo'kxëty ja mjëyujk, yë mtuunpë ets mjaaypyaat mjaaypyo'kxy.

¹³Tuntë jëtu'un ya'atë mëti'ipë të ntuk'ënëëmëtën ets nijëna'a kyapëtsëmëty ma m'aaw myä'änëtyën yë xyëëw yë wiink tios.

¹⁴Tëkëëk'ok tu'kjëmëjtpë xynyixëëwtuntëtyës.

¹⁵Mxëëwtuntëp ma ja tsajpkääky yajkayën jëtu'unyëpë ka'apë tsyooymyëëtëty, jëtu'un tä të ntuk'ëne'emyën, wëxtujk xëëw xykyäyëty yë tsajpkääky ka'apë tsyooymyëëtëtyën. Ya'atë xëëw jää xytyuntëty ma ja xëëw po'o y'änyën mëti'ipë xyëëwajtypyën Abib, jä'ä ko jä'ä po'o ojts jap mtsoontë Egiptë. Ets maas ëjtsën ni pën mëpaat kyaminy jëtu'unyë pën ka'ap tii tmëminy.

¹⁶Mnixëëwtunëp näjyëtu'un yë pëjktä'äky ma ëka'any xyajpëtë'ëka'anyën yë mpëjktä'äky, näjyëtu'un mëti'ipë jää myajpëtë'kpyën ma jajëmëjt kyëjxnën, ma ënäty xyajpëtë'ktaaynyën tëkokyë mëti'ipë të xynyi'ipy të xykyojyën.

¹⁷Tëkokyë yë ye'etyëjktëjk tëkëëk'ok mëpaat jam nyäwya'këxë'ëkëtë tu'kjëmëjtpë ma Tiosën.

¹⁸Ko mijts xytyukwintsë'ëkëty yë jëyujk, këtiis xytyukwintsë'ëkëty yë nye'pny tu'ukyë mëët yë tsajpkääky mëti'ipë tsooymyëëtën ets këtii xypyëjkë'ëkëty yë y'on ma ja komjëpompën.

¹⁹Yë oyjyätyëtypë aay ujts mëpaat xymyënëjkxy ma mWintsën yë tsyajptëjkën, mëti'ipë ëka'any tëëm'ajtë'kpën. Këtii yë tsajppax u'unk jap xyajwinkë'ëwëty ma tyaak yë tyi'tsknëëjën.

²⁰Ëk'ix, ntuknikäxäämpy tu'uk yë nkukexyës, mëti'ipë m'ijx'it mkëwent'atëtëpën ma në'ë tu'ujën ets myajja'tëtëty jam ma ja itjotmën, mëti'ipë të ntuknipëjkë'ëkën.

²¹Këtii xymyëjëkämkä'äkëty, mëmëtowëp ets këtii xykyäjpxykyumëtoownaxëty, jä'ä ko yë'ë ëjts yë xykyutënääpy ets ka'ap nëjkx tme'kxy ja mpoky.

²²E pën mëmëtoopy ets mtuumpy jëtu'un ijxtëm yam n'ënëëmën, ëjts nmëtsip'atëpës ja mëti'ipë mmëtsip'ajtëpën ets njëjpkuwa'akëjäämpyës ja mëti'ipë mjëjpkuwa'këyëpën.

²³Yë nkukexyës yë'ë mwinye'eyanëp ets yë'ë nëjkx jam myajja'tyë ma ja y'itëtyën nyaaxëtyën ja Amor ja'ayëty, Hit ja'ayëty, Ferez ja'ayëty, Canaán ja'ayëty, Heve ja'ayëty ets Jebús ja'ayëty; mëti'ipës nyajkutëkooytya'ajantëpën mëët tu'kë'ëyë yë tyikts y'aatsëty.

²⁴Këtii näjyëtu'un winë ëxëëkjaty xytyunëty ijxtëm yë'ëjëty y'ëtë'ëtstën y'ëna'antën. Këtii xywyinkoxtänëty mëti'ipë yë'ëjëty tyios'ajtëpën ets ni xykya'ëwtatëty, ni'ikyë mëpaat xytyukwop xytyukka'atsë yë nyaaxpotsyëty mëti'ipë y'ëwtajtëpën.

²⁵Yë'ë jëtu'un m'ëwtatëp yë mWintsën ets yë'ë mo'ojanëp yë mka'ayën m'ukën. Nëjkxëpës näjyëtu'un njëpëky njëtuny yë pa'am ëyo'on ma miitsëtyën.

²⁶Ëjts näjyëtu'un kë'ëm ëna'anëp këtiipë m'ookëty ma ënäty ka'ap tpaatynyëmën ja xëëw. Ma mnaax mkajpnën ka'ap nëjkx jyam'aty yë to'oxytyëjk mëti'ipë ka'ap ja u'unk maay tjëkyepyën tpaatëty t'ixëty, ëkë mëti'ipë u'unk'ookëtëpën.

²⁷Ëjts nyajkutukëp ets oypyënëty nëjkx mtsë'ëkëty mjawëty, oy ënäty maanaax maakajpn mtimnyäxy, yë mëtsiptëjk jëtu'unyë mkukä'äk mkuputëtëty.

²⁸Ëjts nyajkutukäämpyës ets ëyo'on jotmay jam mëj këjää y'itëty ma Heve ja'ayëtyën, Hit ja'ayëtyën ets Canaán ja'ayëtyën; tääpë ëyo'on yë'ë nëjkx yajkä'äkëtë.

²⁹Ëjts ka'apës kom jëmëjt n'ixkäxa'any ma jam y'itën, këtiipë yë naax kamtëjk nëkoo mya'atëty, ëkë nyimayëtëty nëkoo jëyujk ëwa'anëtypë ets nëkoo myajtsëtyut myajwintëkoyëtëty.

³⁰Ëjts ëtyä'äkyë'äämpyës jam nyajtsoona'antë, koonëm miitsëty ja m'u'unk m'ëna'këty nyimayëtëty yajxon ets ënäty ya'atë it naaxwiinyëtë të xynyiwa'kta'atë.

³¹Yë mtsëpa'anëty jam tsyoonëty ma mëjnëë jyënäkyën mëti'ipë xyëëwajtypyën Tsaptsmejy ets jam jya'tëty ma myëjnëë nyaxtën yë filistejë ja'ayëty; jam tsyoonëty yë wiinkpë ma të'ëts'itjotmën ets jam jya'tëty ma Éufrates mëjnëëjën. Ëjts nkë'ë'ëjotyës tääpë ja'ayëty të mpëjktakta'atë, mëti'ipë jam tsënaaytyëpën ma tääpë it naaxwiinyëtën ets mijts nëjkx jam xy'ëxkäjxtaaynyë.

³²Nitiiwinma'any mëët yë'ëjëty xykyamëët'atëty ets ni yë tyiosëty.

³³Yë tyiosëty këtii jam xy'ijxta'aktëty ma mkajpnën këtiipë myajpokytyunëtëty maas ëjtsën, jä'ä ko mijts tsojk xy'ëk'ëwtajtnëty ets nëjkx yë'ë myajtu'utëkoyë.