Read Biblia Mixe de Quetzaltepec Éxodo 25 Bible Online

Éxodo 25 - Biblia Mixe de Quetzaltepec bible

Éxodo 25

¹Ënät ja Tios ojts tmëkäjpxy ja Moisés ets t'ënëmaay:

²Ënëëmë yë Israel ja'ayëty wä'än tyajmuktë yë ayajk ako'onën mëti'ipës xymyo'otëpën. Ko xyaktëty ya'atë ayajk ako'onën yam n'amëtoyësën, jä'ä xyaktëty kë'ëmtsojkën ets winë aaw winëjot.

³Ya'atë myajmuktëp: yë pu'ts pujxn, poop pujxn, ukypyujxn;

⁴ukywyit, tsu'unk wit, tsaptswit; linë wit, tsajppax ak,

⁵yë yä'äypyë kupixyny ak yë'ë mëti'ipë tëë wyatsnën tsapts ets po'o oyëtypë ets pejywyijtsnëtypë ets acacië kepy.

⁶Näyjyëtu'un yë on mëti'ipë mëët tyunyën yë kutë'kxn ets nyi'on yë pa'akxu'kpë mëti'ipë winë mëët yajtukkënu'kxyën ets janty oypyë xyuuky jyokyën;

⁷näjyëtu'un yë oytsyaa ets oyjyätyëtypë yë tsaa mëti'ipë jam yajpëjkta'akëpën ma ja kejky yä'äp kyoja'anyën ets näjyëtu'un ma ja katsyjyänën, mëti'ipë ja teety wintsën yajtuumpyën.

⁸Ets xy'oytyuntëty tu'uk yë tsajptëjk, maas ëjts nyajpaatëtyën etsës mëët yë'ëjëty ntsëënëtyës njuuky'atëtyës.

⁹E tääpë wit tëjk maas ntsëënëja'anyën ets tëkokyë mëti'ipë jap tëkotsyow itaanpën, timjëtu'un xy'oytyunëty tä mëti'ipë ntuk'ixäämpyën.

¹⁰Oytyun tu'uk yë kaaxëë, yë'ë mtuk'oytyunëp yë acacië kepy, jä'ä y'ayeny'atëty mäjtsk kë'ënux ja kujkm ets myëjwiin'atëty tu'kkë'ënux ja kujkm ets kyëjxm'atëty tu'kkë'ënux ja kujkm.

¹¹Mtuknikoyëp yë wa'ats pu'ts pujxn, jootjoty, nëkëjxy ets ma tyekyën; mpa'akooytya'ajëp näjyëtu'un mëët yë pu'ts pujxn.

¹²Oytyun taxk yë nyijäänë'ëk, aakyë'ë pu'ts pujxn ets xypyëjkta'akëty jää mëtëy ma taxk ja tyeky yajpaatyën, mäjtskjaty xypyëjkta'akëty pa'a pa'ajëty.

¹³Oytyun näjyëtu'un yë nyikepy, mëti'ipë yajtukëëyë'ëkëpën, yë'ë myajtunëp yë acacië kepy ets xytyukniwitsëty yë pu'ts pujxn.

¹⁴Jap xytyijnaxëty ma ja nyijäänë'ëkën ënäty të xykyëxwopyën mäjtsk'atu'umëty ets yë'ëts mëët yajtukëëyë'ëkëty.

¹⁵Ko ënäty të xypyëjktä'äky jam, këtii xy'ëkju'tnëty ma ja nyijäänë'ëkën mëti'ipë ënäty të xypyëjktä'äkyën jam ma ja kaaxën.

¹⁶Jap kaaxëjoty xypyëjkta'akëty ja ënä'ämën tëyajtën mëti'ipë yam nmo'ojäämpyën.

¹⁷Oytyun yë y'akë'ë, aak pu'ts pujxn mëët xy'oytyunëty, jä'ä y'ayeny'atëty mäjtsk kë'ënux ja kujkm ets myëjwiin'atëty tu'kkë'ënux ja kujkm,

¹⁸jam nimäjtsk xyajkëxkojëty jëtu'unpë kyëxë'ëkëtyën tä yë tsajpjotmëtë kukajpxpën ets aak pu'ts pujxn mëët xy'oytyunëty, yë'ë mëët yë kuwojpën xytyuunk'atëty.

¹⁹Yë kaaxëë akë'ë ets ja tsajpjotmëtë kukäjpxyëty mëti'ipë ënäty jam të kyëxkojyën tu'ukyë nyämyatsëtëty. Tu'uk y'itëty jamtsow ets tu'uk y'itëty yaatsow maa ja kaaxën.

²⁰Jëtu'un nyäwyinku'ixëtëty, ja wyiin jyëjpy jam tyajkëx'ixtëty ma ja kaaxë'akë'ëjën ets ja kyäkn jä'ä tyuknijuuxtëp ja kaaxë'akë'ë.

²¹Ënät ok xytyuk'ajupëty ja kaaxë'aaw ets jap kaaxëjoty tëë ënäty jap xypyëjktä'äky ja tsaa ma ja ënä'ämën tëyajtën myinyën këxja'ay, mëti'ipë nmo'ojäämpyën.

²²E jam ëëtsajtëm näpyatëmëty, jam këjxm ma ja kaaxëni'kxën ma ja tsajpjotmëtë kukäjpxy këxkojy y'itën, jam ntuknijawëty tëkokyë ja ënä'ämën tëyajtën mëti'ipës ja Israel ja'ayëty ntuknikäjxtëpën.

²³Oytyun tu'uk yë kaaypyäjn yë'ë mtuk'oytyunëp yë acacië kepy, jä'ä y'ayeny'atëty mäjtsk kë'ënux ets myëjwiin'atëty tu'kkë'ënux, tu'kkë'ënux ja kujkm kyëjxm'atëty.

²⁴Ets ënät xytyuknikoyëty yë wa'ats pu'ts pujxn, mpëjkta'akëp näjyëtu'un yë pya'a, aakyë'ë myajtunëp yë pu'ts pujxn.

²⁵Oytyun näjyëtu'un yë nyipa'twopë, wëxtujk kë'ë'u'unk myëjwiin'atëty ets tyäk näjyëtu'un xypya'akooyëty mëët yë pu'ts pujxn.

²⁶Oytyun taxk yë nyijäänë'ëk aakyë'ë pu'ts pujxn ets xypyëjkta'akëty tu'ukjaty ma ja tyekyën, majktaxkpë.

²⁷Ja jäänë'ëk aakjam xykyëxwopëty maajaty ja kepy nyätyukjänëtyën ets jap yajtijnaxëty ja nyikepy mëti'ipë yajtukëëyë'ëkëpën.

²⁸Ko ya'atë nyikepy ënäty xyaj'o'oyëyë, yë'ë myajtunëp yë acacië kepy, yë'ëts yajtukëëyjyëtitëp yë kaaypyäjn, ko ënäty muum yajmënëjkxa'any. Ko xyajkojta'ajëty, tääts xytyukniwitsëty yë pu'ts pujxn.

²⁹Ma nyitekyën nän pu'ts pujxn jam mpëjkta'akëp, näjyëtu'un ja tu'ts ets ja a'ukën mëti'ipë mëët tyuna'anyën, ma yaj'atämën ja ayajk ako'onën mëti'ipë nëëjëtyën.

³⁰Xëmë jam xypyëjkta'akëty ma kaaypyäjnën yë tsajpkääky ëjts nwintuuyës, mëti'ipës të nyajtuknipëjktaakën.

³¹Oytyun tu'uk yë mëj jëëntooytyakn mëti'ipë aak pu'ts pujxn mëët y'oytyunyëtyën, yë'ë pujxnkuwojpën mëët yajtuunk'aty. Yë y'ëjx, yë tyeky, yë y'a'ukën ets y'ääy tu'ukyë mëët nyämyatsëtëty.

³²Tëtujk xypyëjkta'akëty yë kyë'ë, myoxkëjxy pyëtsëmëty, tëkëëkjaty pë'aay pyëtsëmëty.

³³Tu'ukjatyëty aakjam pyëtsëmëty myoxkëjxm ma ja mëj jëëntooytyaknën ets mëët ja nyi'a'ukën nitu'ukjaty, ya'atë a'ukën jëtu'un y'ixë'atëty tä tu'uk yë pëjyën mëti'ipë yajtijpën almendrë, mëët yë y'ëjx ets mëët yë y'ääy.

³⁴E ma ja nyitekyën taxk ja nyi'a'ukën jam xyajkëxkojëty, näjyëtu'un y'ixë'atëty tä tu'uk yë almendrë pëjyën, mëët yë y'ëjx ets mëët yë nyi'aay.

³⁵Ma ënäty pyëtsëmtën tu'ukjaty ja kyë'ë ja mëj jëëntooytyakn, yë'ë tyukpa'tnë'ëxëp tu'uk yë y'ëjx.

³⁶Yë y'ëjx mëët yë nyikë'ë tu'ukyë mëpaat nyämyätsyë mëët ja mëj jëëntooytyakn, aakmëët y'oytyuny'atëty yë pu'ts pujxn ets pujxnkuwojpën yë'ë yajtuk'oytyunëp.

³⁷Oytyun wëxtujk yë nyikutë'kxn, jam xypyëjkta'akëty këjxm ma naje'eyë kyutë'kxëtyën wintuuytsyow,

³⁸ets ja mëti'ipë yajtijtëpën jëënmä'tn ets ja pujxn aye'epy, aak pu'ts pujxn mëët xy'oytyunëty.

³⁹Jä'ä jam xyajtunëty oy na'i'px majktëkëëk tsimën yë wa'ats pu'ts pujxn, jëtu'un xy'oytyunëty yë mëj jëëntooytyakn ets tëkokyë jënu'un mëët tyunyën.

⁴⁰Jëtu'un xyajkojëty tä të ntuk'ixyën ja nyi''ijxpät jap kopkëjxy.