Read Biblia Mixe de Quetzaltepec Éxodo 29 Bible Online

Éxodo 29 - Biblia Mixe de Quetzaltepec bible

Éxodo 29

¹Ko pën xykyënu'kxëty mëti'ipë teety'ataanpën, ya'atë mtunëp: tu'uk xy'ixëty yë tsajpkaayä'äy ayääkë ets mäjtsk yë kupixyny yä'äy ayääkë, oypyë mëkpë ets kä'pxypë,

²ets ja tsajpmokway mëti'ipë oyën, yajkoj ja tsajpkääky ets ma'atsy mëti'ipë ka'ap tmëët'atyën yë tsajpkääky tsyooy, yë'ë mëët xytyijëtitëty yë on ets tsajpmoktë'ëts ka'apë tmëët'atyën yë tsooy ets wäänjaty xytyuknixijkxëty yë on.

³Tääts jap katsyjoty xypyëjkta'akëty ets xymyënëjkxëty ma mëjtsajptëjkën, tu'ukyë mëët ja tsajpkaayä'äy ayääkë ets mäjtsk ja kupixyny yä'äy ayääkë.

⁴Tä ënät xywyoownëjkxëty yë Aarón mëët yë y'u'unk y'ëna'k jam ma yajnitëkën ja wit tëjk ma näpyaatë y'ityën ets xy'ënëëmëty, ko jam tsyi'iwtëty.

⁵Ko tsyiiwta'atëty tääts yë Aarón xyoxëty mëët ja tëyxyuypyë wit ets ja kejky yä'äp, ja nijän, ets näjyëtu'un ja kejky yä'äp ets ja katsyjyän ets xywyë'ënta'atsëty ja kejky yä'äp ja nyiwëën.

⁶Pëjkta'ak näjyëtu'un ja kupit jam ma kyëpajkën ets ja tsya'a mëti'ipë yajnikë'xë'kpyën ko tyeety'äty.

⁷Tääts xypyëjkë'ëkëty ja on mëti'ipë yajtukkënu'kxpën ets xykyënu'kxëty ja Aarón ko tyeetyëjkënë, jam kyëpajkëjxm jam ja on xykyëxtämëty.

⁸Ënëëmë näjyëtu'un ja y'u'unk y'ëna'k ets wyinkontëty. Tääts xytyukxoxtëty ja tëyxyuywyit.

⁹Jëtu'un tä yë Aaronkën ets ja y'u'unk y'ëna'këty yajxon xywyë'ënta'tsëtëty ets ënät xypyëjktakëtëty yë kyupitëty. Jëtu'un'äämpy xymyo'ojëty ja kutujkën ets tpa'atwa'akëtëty ja teety'ajtë. Ya'atë ënä'ämën xëmëkyëjxm y'itëty.

¹⁰Ok xymyënëjkxëty ja tsajpkaa ëna'k ma ja wit tëjkën ma ja näpyaatë y'ityën. Ets ja Aarón mëët ja y'u'unk y'ëna'k, ënät jam ja kyë'ë tkëxkontëty ma ja jëyujk këpajkën.

¹¹E jam Tios wintum ma ja wit tëjk yajnitëkën, jam ja tsajpkaa ëna'k xyaj'ookëty.

¹²Tääts wäänë xypyëjkëty ja ne'pny ets xytyukkuutsëty ja wintsë'këntyakn ja nyiwaj. E ja ne'pny mëti'ipë jaakwë'ëmpën jap xytyukpa'tä'ämëtya'ajëty ja wintsë'këntyakn.

¹³Ja tyiinty, ja jyot, ja myääts mjëpëjktaayëp ets ja y'on jam xynyino'okëty ma wintsë'këntyaknën.

¹⁴E ja nyitsu'utsy, ja nyi'ak ets ja tyi'iny, jëkäm nëjkx xynyino'oky, jä'ä ko ya'atë wintsë'kën yë'ë kyunajxyp ja nëë poky.

¹⁵Mëjwits tu'uk yë kupixyny yä'äy yä'kpetypë ma jam nimäjtsk tyänëtën ets xymyëjwowëty yë Aarón mëët ja y'u'unk y'ëna'k ets jam ja kyë'ë tkëxkontëty ma ja kupixyny ja kyëpajkën,

¹⁶tääts ënät xyaj'ookëty, e ja nyine'pny jam xyijkxjëtitëty ma wintsë'këntyaknën.

¹⁷Ets ënät xytyuktsukëty yajxon yë nyitsu'uty apot tukpotë, tääts xypyujëty xyjyä'ätsëty yë tyiinty ets kyë'ë tyeky ets tu'ukyë xypyëjktakta'ajëty ja nyitsu'uty mëët ja kyëpajk.

¹⁸Tääts ënät ya'atë kupixyny y'ooky xynyino'okëty ma wintsë'këntyaknën, mëti'ipë yë Wintsën mtukmëjjawëpën, yë'ë ya'atë wintsë'kën nino'oky nixämpyë oypyë xyuuky jyokyën.

¹⁹Mëjwits ënät näjyëtu'un ja wiinkpë ja kupixyny ets jam ja kyë'ëjëty tkëxkontëty ja Aarón mëët ja y'u'unk y'ëna'k, ma ja kupixyny ayääkë ja kyëpajkën.

²⁰Tä ënät xyaj'ookëty ets wäänë xypyëjkëty yë ne'pny ets xytyukkuutsëty yë Aarón mëët yë y'u'unk y'ëna'k ma tyatskpa'ajëtyën a'oy'äämpyë, näjyëtu'un ma kyë'ëkaajëtyën a'oy'äämpyë ets ma tyekykyaajën a'oypyë, e ja ne'pny mëti'ipë natëjkëpën xijkxjëtit jam ma wintsë'këntyaknën yë pya'a nyuxën.

²¹E ja ne'pny mëti'ipë jam wë'ëmpën wintsë'këntyakn nëkëjxm ets ja on mëti'ipë yajtukkënu'kxpën mëti'ipë natëjkëpën, mpëjkë'ëkëp ets xytyuknixijkxëty yë Aarón ets näjyëtu'un jam wyitkëjxm, ma ja y'u'unk y'ëna'kën nëjkxëp xykyënu'kxta'atë mëët tu'kë'ëyë ja wyitëty tyujkxëty.

²²Tëkokyë y'on xyajjënajktaayëty mëti'ipë myëët'ajtypyën ma pyi'ixyën, ma tyiintyën ets ma jyotën; pëjkë näjyëtu'un mäjtskpë yë myëjtiinty ets y'on mëti'ipë nëkëjxy nyijuux'ajtypyën, näjyëtu'un ma ja pyuuyën a'oypyë, paatykyëjxm yajyäky ya'atë kupixyny yä'äy mëët ko ja teetyëjk ënäty yajkënu'kxtë.

²³E ja tsajpkääky mëti'ipë jap ijtpën katsyjoty ka'apë tsyooymyëëtëtyën, mëti'ipë ja Tios të yajtukniyakën, koonë'ëk tu'uk yë pikpë ets koonë'ëk tu'uk mëti'ipë xëpinyën mëët yë on ets tu'uk mëti'ipë jëtu'un këxë'kpën tä yë tsajpkääkytsyë'ëtsën.

²⁴Pëjktakta'a ya'atë ma Aarón yë kyë'ëjën ets ma y'u'unk y'ëna'këtyën ets jëtu'un xytyukkë'ëwanëty ijxtëm tyuunk'atyën Wintsën wintum.

²⁵Tä ënät ok tu'ukyë xynyino'okëty jam ma wintsë'këntyaknën, mëët ja jëyujk'ooky mëti'ipë yajno'kpën, mëti'ipë ja Tios jä'ä të yajtuknipëjktaakën, jëtu'un tä tu'uk yë wintsë'kënën mëti'ipë oy xu'kp jojkpën. Ya'atë jä'ä yajyäky tä tu'uk yë ayajk ako'onën mëti'ipë nino'oky yë Tios yajtukwintsë'këpën.

²⁶Ko ënäty ja Aarón të yajkënu'kxy, yë'ë mnëtsukëp ja kupixyny ayääkë ja kyätyxyixy ets jëtu'un xytyunëty ja näkyënu'kxë jam Tios wintum, e ja katsy xyixy mëti'ipë jam mnëtsujkpyën, yë'ë mijts mjä'ä'atëp.

²⁷Ëpëky xypyëjkta'akëty yë katsy xyixy mëti'ipë ayajkën'ajtp ako'onën'ajtpën jä'ä xëëw, yë pyuuy mëti'ipë ëpëky yajyajkpën, ëpëky xypyëjkta'akëty, jä'ä ko tääpë yë'ë Aarón të yajtukniwë'ëmy ets y'u'unk y'ëna'k.

²⁸Tääpë yë'ë nëjkx tjä'ä'atë yë Aarón ets y'u'unk y'ëna'k, ya'atë ënä'ämën xëmë jëtu'un y'ijtëwëty ma Israel ja'ayëtyën. Ya'atë wintsë'kën yë'ë yajtukniyajkëtëp yë Israel ja'ayëty, ets Tios yajtukwintsë'ëkëp; ma jëtu'un ja nämyë'oyë y'ityën.

²⁹Yë wyit yë Aarón yë'ë nëjkx tmëwë'ëmtë yë y'u'unk y'ok, ko ënäty näjyëtu'un yajkënu'kxtë ets tyeety'atëty ets jëtu'un tpa'atwa'akëtë ja ënä'ämën kutujkën.

³⁰Ja teety mëti'ipë ja Aarón y'u'unk'ajtyp y'ok'ajtypyën, ko tyëkëty jap tëkoty ma ja wit tëjkën ma ja näpyaatë y'ityën ets jëtu'un ja tyuunk jap tuna'any ma ja Tios ja jyëën tyëjkën, myënëjkxëp ya'atë wit ets jëtu'un tmëët'atëty wëxtujk xëëw.

³¹Ja kupixyny ayääkë tsu'utsy mëti'ipë ënäty të wyintsë'kën'atyën, myajkë'ëwëp ma ja näkyënu'kxë y'ityën.

³²Yë Aarón mëët yë y'u'unk y'ëna'k tu'kmukyë nëjkx tsu'utstë ya'atë tsu'utsy kyë'ëw, näjyëtu'un ja tsajpkääky mëti'ipë jap ijtpën katsy u'unkjoty, nëjkxëp tu'knax tkaytyë jam ma yajnitëkën ja wit tëjk ma ja näpyaatë y'ityën.

³³Ya'atë kyäytyëp tsyu'utstëp, paatykyëjxm ënäty të yajtukwintsë'ëkë ja Tios ets ja nyëë pyokyëty nyiwa'ats kyuwa'atsëtëty ma ënäty të yajkënu'kxtën ets ma t'ëxajëtën ja kutujkën ets tpa'atwa'akëtë ja teety'ajtën. E tyaapë tsu'utsy ka'ap tjëkyepy oynyapënëty tsu'utsëty, jä'ä ko yë'ë ëpëky të yajkënu'kxy.

³⁴E pën jaaknatëjkëp ja tsu'utsy ets ja tsajpkääky, mëti'ipë kënu'kxyën, mtimnyino'oktëp, jä'ä ko tääpë ni pën mëpaat tkajë'kxy ko kyomjëpom'atëty, jä'ä ko kënu'kxy ënätynyë.

³⁵Mtunëp jëtu'un tu'kë'ëyë ya'atë mëët yë Aarón ets y'u'unk y'ëna'k, ijxtëm yam të ntukni''ixën. Wëxtujk xëëw xytyuunk'atëty ets xyajwatsta'ajëty winë,

³⁶winjëpom xyaj'ookëty tu'uk yë tsajpkaa ets yë'ë wyintsë'kën'atëty ets jëtu'un xypyaatëty ja pokymyä'kxën, myajwa'atsëp yë wintsë'këntyakn winjëpom ma xypyëjkta'akëtyën yë wintsë'kën mëëtkyëjxm ja mpoky ets jam xyijkxëty yë on ets xykyënu'kxëty.

³⁷Wëxtujk xëëw y'itëty, xyakëty ja wintsë'kën jam ma ja wintsë'këntyaknën mëëtkyëjxm ja mpoky mkëtyeyëty; jëtu'un kënu'kxy ets wa'ats xyajwë'ëmëty ma Tiosën ets ya'atë wintsë'këntyakn ni'ik wa'ats y'itëty ets oy tyimtiijëty pën tii jam ja'ajtp ma ja wintsë'këntyaknën, wa'ats nëjkx wyi'imy.

³⁸Xëmë winjëpom xyakëty yë wintsë'kën, jam ma wintsë'këntyaknën. Yë'ë myakëp yë kupixyny mäjtsk mëti'ipë tu'ukjatynyëm yë jyëmëjtën.

³⁹Tu'uk jopyëp xyakëty ets jënäkxyëëw wiinkpë.

⁴⁰Ja mëtu'ukpë ja kupixyny yë'ë mëët xyakëty yë tsajpmokway mäjtsk tsim, olivë on ets xypyikëty tu'ktsim yë tsatym nyëë.

⁴¹Näyjyëtu'un xytyunëty ko ja wiinkpë ja kupixyny xyaj'ookëty jënäkyxyëëw, mëët yë tsajpmokway ets mëët yë tsatym nyëë ets xynyino'ok xynyixamëty; jëtu'un ja wintsë'kën xyakëty ja oypyë xyuukyën jyokyën.

⁴²Ya'atë yojxën mëti'ipë myajktëpën nino'oky nixämpyë, u'unk ok nyëjkxëty ets jëtu'un tkë'ëyaktëty ëjts nwintuuyës jam ma yajnitëkën yë wit tëjk ma näpyaatë y'ityën, maajës näpyaata'anyë mëët mijts ets nmëkajpxa'any.

⁴³Jamës näpyaata'anyë mëët yë Israel ja'ayëty ets ja it kënu'kxy wyë'ëmëty mëët koos ënäty ëjts jap nyajpaaty.

⁴⁴Nkënu'kxäämpyës ya'atë wit tëjk ma ja näpyaatë y'ityën ets näjyëtu'un ya'atë wintsë'këntyakn, nkënu'kxäämpyës näjyëtu'un yë Aarón mëët yë y'u'unk y'ëna'k ets yë'ë tyeety'atëty ets xymyëtuntëtyës.

⁴⁵Ëjtsës kë'ëm jam timyajpaataanp ma Israel ja'ayëtyën ets ëjtsës xyTios'atëp.

⁴⁶Jëtu'un nijawëtëty ko ëjts Wintsën, mëti'ipë yë'ëjëty Tyios'ajtëpën, mëti'ipë ojts yajpëtsëmëtën jap Egiptë ets ntsëënëja'anyës ma yë'ëjëtyën. Ëjts Wintsënajtp mëti'ipë yë'ëjëty Tyios'ajtëpën.