Read Biblia Mixe de Quetzaltepec Éxodo 32 Bible Online

Éxodo 32 - Biblia Mixe de Quetzaltepec bible

Éxodo 32

¹Ko ja Israel ja'ayëty t'ijxtë ko ja Moisés nëkooyë pyoxnë jam kopkëjxm, ënät ojts jam nyämyukëtë ma ja Aaronkën ets t'ënëmaaytyë: Jotëkoy ets xy'oytyunëty tu'uk yë nwintsënëtyës mëti'ipës xytyu'uwinwowtëpën, jä'ä ko yë Moisés ka'ap y'ëkyajnija'awënë pën tii të jyätyë, mëti'ipë ojts ëëtsëty xyjyuutën jap Egiptë.

²Tä ja Aarón ojts y'ëtsoy: Amëtowtë yë mto'oxytyëjkëty ets m'u'unk m'ëna'këty yë pyu'tspujxn tatsktëy etsës yaa xytyuknimintëty.

³Ënät ja ja'ayëty t'amëtoowtë ja tyo'oxytyëjkëty ja pyu'tspujxn tatsktëy ets ojts tukninëjkxtë ja Aarón,

⁴ets t'ëxajëy ja pu'ts pujxn ets jap tyajwin'ë'tsy jëënjoty, yë'ë ojts mëët tyajkojy tu'uk yë awinax, jëtu'unpë kyëxë'ëkyën tä tsajpkaajën. Ënät ja mayjyä'äy y'ënaantaaytyë: Israel ja'ayëty, ya'atë jëtu'un mwintsën'ajtëp, mëti'ipë ojts jap mjuutëtën Egiptë.

⁵Ko yë Aarón jëtu'un t'ijxy, ënät tu'uk yë wintsë'këntyakn tyaj'o'oyëy, ma ja awinax tpëjkta'aka'anyën, jëtu'unpë kyëxë'ëkyën tä ja tsajpkaajën ets ojts mëk jyänty yujk'ëna'any: Jëpom yë mëj xëëw ntu'unmëty ma Wintsën nmëjja'aw nkënu'kxyjya'awëmëtyën.

⁶Ko kyomjëpom'ajty, janty ju'unëm ojts myä'äypyëtë'kojtë ets ja wintsë'kën ojts tkë'ëyajkojtë, kanaak tyajnitooytyë ja jëyujk, tuntë jëtu'un ja nämyë''ëëw'oy näymyëkajpx'oyë, wäänë y'ijty tä ojts ja mayjyä'äy tyëkëtë kääpyë ukpë. Ko jëtu'un y'ëkkaaytyääy y'ëk'uktaaytyë tääts tyëjkëtyë äjtspë pujtpë.

⁷Ënät ja Tios t'ënëmaay ja Moisés: Jotëkoy ets mjëjpta'akëty jap ëpa'tkë'p, jä'ä ko ja mnaax mkajpn mëti'ipë jap myajpëtsëëmën Egiptë, tëë ja nyäyajtu'utëkoyëtë.

⁸Ka'ap ninu'un të tyimpo'oxy ets të t'ëxmatstë ja oytyu'u, mëti'ipës të ntuk'ënä'ämtën ets yë'ë tye'eytyëty. Tëë tyajkojtë tu'uk yë awinax, jëtu'umpë kyëxë'ëkyën tsajpkaajën, aak pu'ts pujxnpë mëët y'oytyunyëtyën, tam tmo'otë kanaakpëky yë wyintsë'kën, tam tmëjjaw tjaantyjawëtë ets y'ëna'antë: Israel ja'ayëty ya'atë jëtu'un mwintsën'ajtëp, mëti'ipë ojts mjuutëtën jap Egiptë.

⁹Ënät yë Tios t'ënëmaay yë Moisés: Tëës tyam yajxon n'ixy ko tääpë ja'ayëty ka'ap ninu'un kyäjpxyjä'äykyukëtë.

¹⁰E tyam ëxmajtskës atu'uk. Yajxonës yë joot'an të xytyuktëkë mëët yë'ëjëty, ëjts jëtu'unës yam n'ëna'any ko ntimyajkutëkoyantëpës yam. E mëët mijts nyajkojäämpyës tu'uk yë naax kajpn mëjpë këjääpë.

¹¹Yë Moisés ojts tjayajxäämanë mëktä'äky ja Wyintsën Tios ja jyoot'an mëët ya'atë aaw ayuk: Wintsën, ¿wi'ix ko nëkooyë xytyimtukjoot'anpëky yë mnaax mkajpn, mëti'ipë mijts kë'ëm mju'tën jap Egiptë mëët yë mmëjajtën, mëti'ipë jap myaj'ijxën mëj këjää?

¹²¿Wi'ix jëtu'un ko ënät xy'ëwa'atsa'any ets Egiptë ja'ayëty y'ëna'antëty: Tios tëkatsy ënäty yë wyinma'any, ko ojts yaa Egiptë yajpëtsëmëtë, paaty ojts yaa jyuutëtë, jä'ä ko jam yaj'ooka'anëtë muum kopkkëjxm ets jëtu'un'äämpy jyo'otsa'anëtë yaa naaxwiiny naaxkëjxy? Yajjëwa'ak jëtu'unpë winma'any ma mijtsën, ko m'ëna'any ko xyajkutëkoyä'äny yë mnaax mkajpn.

¹³Yë'ë ja'amyäts mëti'ipëjaty oy mmëtuunën tä yë Abraham, Isaac ets Jacob, mëti'ipës ojts kë'ëm xy'ënëëmë ma ja mxëëw kë'ëm xytyukkajpxpejtyën. Ëjts nyajnimayëjäämpyës yë m'u'unk m'ok, jëtu'un nyimay'atëty tä yë mëtsa'ajën, mëti'ipë jamën tsajpjotm ets ya'atë it naaxwiinyëtë, mëti'ipë yam ntukwinwa'anëtyëpën yë'ëjës nmo'ojantëp.

¹⁴Yë Tios, ojts jëtu'unpë ja winma'any tjantyajjëwä'äky ma yë'ëjën, ko jya'ënany ja nyaax kyajpn tyajkutëkoyä'äny.

¹⁵Tä ja Moisés ojts jam tsyo'onë kopkkëjxm, tam ja tsaatsetsy mäjtsk tkë'ëkë'ëy'äty, mëti'ipë aak tsaajën, ma ja ënä'ämën tëyajtën jam kyëxja'ayëtyën.

¹⁶Tios ojts kë'ëm ya'atë tsaatsetsy t'oytyuny ets kë'ëm tjaay ja ënä'ämën tëyajtën.

¹⁷Ko ja Josué tmëtooy ko nëkooyë ja mayjyä'äy yaxnëtë jyojknëtë, ënät t'ënëmaay ja Moisés: Jëtu'un yajmëtoy ja'ay yowë tsiptuuntëp ma Israel ja'ayëty jap tsyëënëtën.

¹⁸Tä ja Moisés y'ëtsooy: Tääpë xymyëtoyën xoontakën yowë, ka'ap yë'ëjëty ko myëta'aktë jam tsipjotm ets ka'ap yë'ëjëty ko të tyëkoytyë, ëjts wiinkxoontakënës yë nmëtoy.

¹⁹Ko yë Moisés jam jyä'äjty ma Israel ja'ayëtyën, ënät t'ijxy ja awinax mëti'ipë ënäty të tyajkojtën, jëtu'unpë kyëxë'ëkyën tä tsajpkaajën ets ja mayjyä'äy tjantywyin'äts tjantywyimputë; yë Moisés yajxon jyänty joot'anpëjky ets tnajtsjëpijpëy ja tsaatsetsy, mëti'ipë aak tsaajën mäjtskëty ojts tukpu'ujëtyääy jam kopk'ëjxm.

²⁰Ënät ojts jam amëjaaw tnëtexy ja awinax jëtu'umpë kyëxë'ëkyën tä tsajpkaajën ets piw nuuk tuuntaay mëët yë jëën, e ja waypyë ënäty të jyajta'ayën jap ojts nëëjoty tkuwëjëtyä'äy; tääts ja Israel ja'ayëty t'ënëmaay ets ya'atë ja nëë t'uuktëty.

²¹Tä ojts t'ënëëmë ja Aarón: ¿Tii jëtu'un ya'atë naax kajpn të mtukmëtuuntëkoyë ets jëtu'un xyajpokytyunëty mëjwiin këjää?

²²Ets ojts yë Aarón y'ëtsoy: Wintsën këtiis xytyukjoot'anpëkëty. Mijts wa'ats xynyijawë ko ya'atë naax kajpn yë'ë tyäty tyunantëp yë ëxëëkpë.

²³E yë'ëjës të xy'ënëëmëtë: Oytyun tu'uk ëëts yë nwintsënëty mëti'ipës xytyu'uwinwowtëpën, jä'ä ko ja Moisés ka'ap y'ëkyajnija'awënë tii të jyätyë, mëti'ipë ojts xyajpëtsëmtënës jap Egiptë.

²⁴Ënätës ojts n'ëtsoy: Pën yë pu'ts pujxn myëët'ajtyp wä'än ëpëky tmëminy. Ënät të xymyo'otës yë maypyu'tspujxn etsës të nyajwin'ëëtsy, jëtu'un ya'atë awinax të kyojy, mëti'ipë jëtu'un yaj'ijxpën tsajpkaajën.

²⁵Tä ja Moisés t'ijxy ko ja naax kajpn niwi'ixtsow tkajëkyep wi'ix y'ëmontëtyën ets yajxon tjëkyäjpnë wi'ix ja myëtsiptëjk poj'am tyukja'tëtëtyën, jä'ä ko ja Aarón ka'ap ënäty të myäyë wi'ix tyaj'ëmonëtyën,

²⁶tä ja Moisés ojts jam nyijkxy ma ja kajpn yajnitëkën ets y'ënäny: Pën yë Tios y'oyjya'ap, wä'än yaatsow tminy maas ëjtsën. Ja Leví ja'ayëty jä'ä ojts jam nyaxtë ma ja Moisesën.

²⁷Ënät ja Moisés ojts y'ënë'ëmxëtë: Jëtu'un y'ënä'äny yë Wintsën, mëti'ipë yë Israel ja'ayëty Tyios'ajtëpën: Kajpë'ëktë yë mpujxnëty nitu'ukjaty ets mnëjkxtëty jam ma ijtakn yajmëët'atyën ets mtëkëtëty winjëën wintëjk xyaj'ooktëty tu'ukjaty ja ja'ay ma ja ijtaknën, oy yë'ëjëty yë m'ajtyëty, m'utyëty, mjëëkyëty mëku'ukëty ëkë mëtëjkëty.

²⁸Ja Leví ja'ayëty ojts jëtu'un tpatuntë tä ënäty ja Moisés të tni'ënä'ämën, jä'ä ojts ja ye'etyëjktëjk y'ooktë jä'ä xëëw, naxy nitëkëëk mil.

²⁹Ënät ja Moisés y'ënäny: Tyam jëtu'un miitsëty xy'ëxajëtë yë kutujkën mëti'ipë yë Tios tyam mooyëtëpën, mëët ko miitsëty ka'ap yë wyinma'anyëty të xymyëpëjkëtë ja mmaankëty ëkë ja mëkä'äxëty. Paaty jëtu'un miitsëty mëj këjää yë Tios mkënu'kxa'an mjëkyäpa'anëtë.

³⁰Ënät komjëpom ja Moisés t'ënëmaay ja mayjyä'äy. Miitsëty mëj këjää ja poky mëti'ipë të xytyuntën. E ëjts tyamtsës jatëkok nëjkxa'an ma ja kopkën ma Tios jam yajpaatyën etsës nnijawëja'any pën n'ëkyajjotujkpyës yë Tios ets jeexyë myajpokmyä'kxtë.

³¹Tä ja Moisés jatëkok jam pya'tëjkëy ma ja Tios ijty jam kyëtä'äkyën ets t'ënëmaay: Janty tëy jëtu'un ko yë naax kajpn mëj këjää të pyokytyuny ko të tyajkojtë tu'uk yë awinax aak pu'ts pujxn jëtu'unpë kyëxë'ëkyën tsajpkaajën.

³²E tyam mijts mëj këjää nmënu'kxtä'äky ets xypyokymyä'kxëty, e pën kajts xypyokymyä'kxa'any, ni'ik oyës yë nxëëw xytyimjo'tsëty japë ma mnokyën këxja'ay y'ityën.

³³Ënät ojts ja Tios y'ëtsoyë: Ëjts yi'iyës yam njo'otsäämpy, mëti'ipës xymyëtuuntëkoopyën.

³⁴E paaty, nëjkx yë naax kajpn ënëëmë wä'än jam tnëjkxtë ma të ntuk'ëwaanën; yë nkutënääpyës yë'ë mijts mtu'uwinwowanëp. Ko ënäty të tpaaty ja xëëw jëmëjt jëna'a ntukumëtowa'antës ja pyokyëty, yë'ë kopkpëkyë ko nëjkx tjanty kyumëtowtë.

³⁵Ënät ja Tios tkejxy jam ja ëyo'on ma ja naax kajpnën, mëët jä'ä ko ja wiink wintsën ënäty të t'ëwtatë. Jä'ä ja awinax jëtu'unpë yaj'ixyën tä tsajpkaajën, mëti'ipë ënäty ja Aarón të tyajkojyën.