Read Biblia Mixe de Quetzaltepec Éxodo 35 Bible Online

Éxodo 35 - Biblia Mixe de Quetzaltepec bible

Éxodo 35

¹Ënät ja Moisés ojts tmëkajpxmujkta'ay ja naax kajpn ets t'ënëmaay: Yë Tiosës të xytyuk'ëne'emy ets ya'atë yajkuuytyunëty:

²Jyëkyejpy tëtujk xëëw mtuntëty mye'eytyëty e kom wëxtujk xëëw po'kxënxëëw jäänë, wa'ats mëpaat ya'atë xëëw y'ity, jää mpo'kxtëty ets yi'iyë yë Tios jää yaj'ëwtatëp. Pën jää tiituunk tyuunpy, kopkpëky ko y'ookëty.

³Oy maa mtimyyajpaatëty, ko ya'atpë'atëty nijëën mëpaat xykyayajmëjëtë.

⁴Ënät ja Moisés ojts tmëkäjpxy ja mayjyä'äy ets t'ënëmaay: Ya'atë yë Tios nyi'ënä'ämëp ets yajtunëty.

⁵Pënjaty ja y'ayajk y'ako'onën kyë'ëyakäämpyën ma Tiosën, mëët ko jëtu'un ja jyot wyinma'any tyajja'ty ets ko jëtu'un tuknipëjktaakë winë aaw winëjot. Ya'atë mëpaat xyaktë: pu'ts pujxn, poop pujxn, tsuxkpujxn,

⁶wit mëti'ipë yë y'ujkën tsu'unkën, uky, tsapts ets linë wit, jyëkyäpëp näjyëtu'un tmëminëty yë tsajppax'ak,

⁷kupixyny yä'äy yë y'ak, aakyë'ë mëti'ipë tsapts të wyatsnën, oyëtypë jëyujk ak, ajë kepy,

⁸on mëti'ipë tuunpën ma kutë'kxën, yë pa'akxu'kën mëti'ipë mëët tyunyën yë on mëti'ipë yajtukkënu'kxpën, poom mëti'ipë oy xu'kp jojkpën,

⁹tsuxktsaajëty ets wiinkëtypë oytsyaa mëti'ipë tunaanpën ma kejky yä'äpën ets ma katsyjyänën, mëti'ipë teety wintsën yajtuumpyën.

¹⁰Tëkokyë miitsëty mëti'ipë mtukjajtëpën wi'ix tii oy xyaj'oyëtëtyën, mëpaat mintëty ets xytyuunk'atëty mëti'ipë Wintsën të tni'ënä'ämën.

¹¹Yë tsajptëjk mëët yë nyiwittëjk, yë nyiyä'äp ja wit tëjk, yë jyo'knëty, yë nyikepy, yë nyikepyëty mëti'ipë yajtukpakë'ëtëpën, yë nyixeny, yë nyi'ëjx,

¹²ja kaaxë mëët ja nyikepy mëti'ipë yajtukpakë'ëjëpën, ja nyi'akë'ë, ja nyiwit mëti'ipë nyijuux'atëpën,

¹³ja kaaypyäjn, ja nyikepy mëti'ipë yajtukpakë'ëjëpën ets tëkokyë jënu'un mëët tyunyën, yë tsajpkääky mëti'ipë ja Tios yajmoopyën,

¹⁴ja mëj jëëntooytyakn mëti'ipë kutë'kxëpën, mëët tu'kë'ëyë jënu'un mëët tyunyën ets nyikutë'kxn, yë on mëti'ipë tuunpën ma kutë'kxnën,

¹⁵ja poom ja nyiwintsë'këntyakn, mëët näjyëtu'un ja nyikepy mëti'ipë yajtukëëyë'ëkëpën, ja on mëti'ipë yajtukkënu'kxpën, ja poom mëti'ipë oy pa'akxu'kpën, ja wit mëti'ipë yajtuk'atëëytyukëpën ja tsajptëjk ma yajnitëkën,

¹⁶ja wintsë'këntyakn ma ja jëyujk yajnino'oktën, mëët ja atënaayë'ëk mëti'ipë oytyunyën mëët yë tsuxkpujxn, ja nyikepy mëti'ipë yajtukëëyë'ëkëpën ets tu'kë'ëyë jënu'un mëët tyunyën, ja pujxn'kë'ë pujtakn mëët ja nyi'ëjx ma këxkë'ëy y'itëtyën,

¹⁷ja wit'atëëytyuk mëti'ipë tuunpën ma ja tëja'awën, mëët tëkokyë ja nyixeny, ja xeny ja nyi'ëjx, ja wit'atëëytyuk mëti'ipë tuunpën ma yajnitëkën ja tsajptëjk tëja'aw.

¹⁸Ja nyikupë mëti'ipë tuunpën ma ja Tios jyëën tyëjkën ets ma ja tëja'awën mëët ja nyitejpxy,

¹⁹ja wit tä'äky mëti'ipë ja teety yajtuumpyën jap ma ja Tios ja jyëën tyëjkën ets ja wit mëti'ipë ja teetyëjk yajtuknikojëtëpën, mëti'ipë yë Aarón yajtunëpën ets näjyëtu'un mëti'ipë pyëjkta'aktëpën ja y'u'unk y'ëna'këty.

²⁰Tä ja mayjyä'äyëty ojts jam tsyo'ontaaynyëtë ma ja Moisésën.

²¹E mëti'ipë ojts ja jyot wyinma'any y'ëna'antë ets winë tyaka'antë, kanaakpëky ojts winë tjantymyëmintë ma ja Tiosën, ja mëti'ipëjaty ënäty tunaanpën ma kyoja'anyën ja wit tëjk ma ja näpyaatë y'itëtyën ets tëkokyë mëti'ipë mëyajtpën, näjyëtu'un ja wit tujkxy.

²²Yä'äy to'oxy winë tmëmiintë winë'aaw winëjot, ojts tmëmintë kë'ëjiits, kë'ëjän, tatsktëy, nantsëm ets wiinkëtypë, aak pu'ts pujxn mëët y'oytyunyëty. Tu'uktu'uk yë ja'ayëty ojts tmëmintë yë pyu'tspujxn, jëtu'un ijxtëm ënäty pyaat'atyën ja Wintsën yajmo'ojëty.

²³Mëti'ipë myëët'ajtëpën ja wit mëti'ipë ja y'ujkën tsu'unk, uky, tsapts ets mëti'ipë yajtijpën oywyit, näjyëtu'un mëti'ipë myëët'ajtëpën ja tsajppaxni'ak, kupixyny ayääkë ak mëti'ipë ënäty tëë wyatsnën tsapts, ojts tmëmiinta'atë.

²⁴Mëti'ipë myëmiintëpën ja poop pujxn ja tsuxkpujxn, yë'ë ja Tios ënäty tyukë'ëtëjkëtyëp e ja mëti'ipë myëmiintëpën ja kepy mëti'ipë yajtijpën ajë kepy, yë'ë tyukniyajkëtyë, ma ënäty winë yaj'oytyuna'anyën aak kepyë.

²⁵Ja to'oxytyëjkëty mëti'ipë witjo'ktëpën, oyëty ja wit tmëmiintë, ojts ja wit tmëmintë, mëti'ipë ja y'ujkën tsu'unk, uky, tsapts ets ja linë wit.

²⁶Näyjyëtu'un ja to'oxytyëjkëty mëti'ipë ënäty janty'oy winë yajkojtëpën ojts ja jyot wyinma'any y'ëwa'atstë ets tpi'të ja kupixyny jëmk.

²⁷Ja ja'ayëty mëti'ipë ënäty mëj'äämpy ijtëpën, yë'ë ojts tmëmintë ja tsaa oyëtypë tä ja tsuxktsaajën ets ja wiinkëtypë ets yë'ë jam yajpëjkta'akëty ma ja kejky yä'äpën ets ma ja katsyjyänën mëti'ipë yajtuumpyën ja teety wintsën.

²⁸Yë'ë ojts näjyëtu'un tyajmintë yë pa'akxu'kën, on mëti'ipë tuunpën ma ja kutë'kxnën, ja on mëti'ipë yajtukkënu'kxpën ets näjyëtu'un ja poom mëti'ipë janty'oy xu'kp jojkpën.

²⁹Tëkokyë yë ja'ayëty ye'etyëjk to'oxytyëjkpë ojts ja jyot wyinma'any y'ëwa'atstë ets pyutëkëja'antë ma ja tuunk jam y'ityën, mëti'ipë ja Moisés ojts ja Tios tyuk'ëne'emyën, mëët ja ayajk ako'onën mëti'ipë myëmiintën, jëtu'un ojts tyaktë tä ënäty ja jyot wyinma'any y'ëna'antën.

³⁰Ënät ja Moisés t'ënëmaay ja Israel ja'ayëty: Ëk'ixtë ma Judá yë jyä'äyën, yë'ë jam yë Tios të twin'ixy yë Besalel, yë myaank yë Urí, yë y'ok'u'unk yë Hur.

³¹Tëë tmo'oy yë Tios yë myëk'ajtën y'oyajtën ets wijyajtën kujk'ajtën, ixpëkyajtën, nija'awën, wi'ix winë oy tyajkojëtyën,

³²wi'ix tuunk'atëtyën yë pu'ts pujxn, poop pujxn ets tsuxkpujxn;

³³wi'ix yë tsätsëty ets wi'ix muum tii oy tyajkëxkojëtyën, näjyëtu'un wi'ix yë kepy tëywyijtsnë txääwëtyën ets wi'ix winë oy tyajkëxë'ëkëtyën.

³⁴Tëë näjyëtu'un tmo'oy yë wijyajtën, wi'ix yaj'ixpëkëtyën, jëtu'un yë'ë ets näjyëtu'un yë Oholiab, yë myaank yë Ahisamac, yë jyä'äy yë Dan.

³⁵Tëë tmo'oy yë wijyajtën, wi'ix winë oy tyajkëxë'ëkëtyën, wi'ix tii winë tsätsëty oy ets tmo'ojëty ja y'ijxën; wi'ix oy yë wit tujkxy tjo'okëtyën, tä yë witën mëti'ipë yë y'ujkën tsu'unk uky, tsapts ets ja linë wit ets tyukjajtyp wä'än timmyëti'ipëty wi'ix tyajkëxë'ëkëtyën oy.