Read Biblia Mixe de Quetzaltepec Éxodo 36 Bible Online

Éxodo 36 - Biblia Mixe de Quetzaltepec bible

Éxodo 36

¹E paaty jëtu'un yë Besalel, yë Oholiab ets nitëkokyë yë ja'ayëty jënu'un ja wijyajtën tmëët'atën, wi'ix winë oy t'oytyuntëtyën; pënjaty ja Tios ja wijyajtën të myo'ojëtë ets t'oytyuntëty mëti'ipë jap tunaanpën ma ja tsajptëjkën, yë'ë ja tuunk yajtu'uye'eytyëp mëti'ipë yë Tios të tni'ënä'ämën.

²Ënät ja Moisés ojts tyaxtsoy ja Besalel, ja Oholiab ets nitëkokyë ja ja'ayëty, jënu'un ënäty tukjatën winë oy tyaj'oyëtëtyën, mëti'ipë ja Tios të myo'ojëtën ja wijyajtën kujk'ajtën ets ixpëkyajtën; ma ënäty kë'ëm të nyäy'ëwaanëtën ko pyutëkëja'antë ma ya'atë tuunk tyu'uye'eyën.

³Ënät ojts jä'ä ja Moisés myooytya'ajëtë ja ayajk ako'onën mëti'ipë ja Israel ja'ayëty të tmëmintën ets tyajtso'onta'aktëty ja tuunk ma ja tsajptëjk kyoja'anyën. E ja Israel ja'ayëty ni'ikyë tmëmiin'ëtë'ëtstë ja ayajk ako'onën winjëpom.

⁴Ja tuunpëtëjkëty mëti'ipë yaj'o'oyëtëpën tiijaty jam tunaanpën ma tsajptëjkën ojts ja tyuunk t'ëxmatstë ets ojts tninëjkxtë ja Moisés,

⁵ets t'ënëmaaytyë: Yë ja'ayëty ni'ikyë tmëmiin'ëtë'ëtstë yë ayajk ako'onën ets tëë y'anajxnë ja kyijpxyajtën mëti'ipë ja Wintsën të tni'ënä'ämën ets ja tuunk tyu'uye'eyëty.

⁶Ënät ja Moisés ojts ja aaw ayuk tkäjxwä'kxy ets ja ja'ayëty ka'ap ja ayajk ako'onën t'ëkmëmiinëtëty mëti'ipë tunaanpën ma ja tsajptëjk kyoja'anyën, jëtu'un'äämpy ojts yaj'akajpxtujknë ets ja ja'ayëty ka'ap tii t'ëkmëmiinëtëty.

⁷Jä'ä ko ja mëti'ipë tunaanpën tam ënäty myäyjyajtënë ets ni'ikyë nyatëjkënë.

⁸Ja ja'ayëty mëti'ipë ni'ik tyukjajtëpën wi'ix winë oy tyajkojtëtyën, këtiinëm jëtu'un ja myëku'ukëty mëti'ipë mëët tyuunmuktën, yë'ë ojts ja Tios ja jyëën tyëjk tkojtë. Majk ja wit'atëëytyuk tyaj'o'oyëtyë mëti'ipë ja y'ujkënën taxkpëky, ojts tyajtuntë ja linë wit awiity tsu'unkpë, ukpyë ets tsaptspë ets ojts jam tyajkëxkojtë mäjtsk ja tsajpjotmëtë kukäjpxy.

⁹Tu'ukjatypë ja wit'atëëytyuk jä'ä y'ayenyëty tuktujk xajpk ja tu'kkë'ënux ets jä'ä myëjwiinëty tu'kxajpk ja tu'kkë'ënux, aak tu'knax kyijpxyëty.

¹⁰Mäjtsk ojts yë wit'atëëytyuk mëjpë tyaj'oyëtë, mëkoxk t'axuuymyujktë ja mutskjatypë.

¹¹Ma mëët tu'ukpën ja wit axuuymyuky ojts jam pë'am tkëxuytyë ëtsi'itjut mëët yë ukypyiity ets näjyëtu'un ma ja mëmäjtskpë ja wit axuuymyukyën.

¹²Ma mëët tu'ukpë ja wit axuuymyukyën ets ma ja mëmäjtskpën, wëxtyikxy myajkjaty ojts tpëjktakëtë ja nyi'ëtsi'itjut, ma yaj'ajë'pmukëtyën.

¹³Ojts näjyëtu'un tyajkojtë yë jo'kn, aakyë'ë mëti'ipë pu'ts pujxn mëët y'oytyunyëtyën, wëxtyikxy majk ojts tyajkojtë ets jä'ä mëët ja Tios ja jyëën tyëjk tu'ukyë tukpëjktë.

¹⁴Besalel ojts näjyëtu'un majktu'uk yë wit atëëytyuk tyajkojy, aakyë'ë yajtuun yë tsajppax po'o ets ojts yë'ë tuknikemy ja Tios ja jyëën tyëjk.

¹⁵Tu'ukjaty ja wit'atëëytyuk jä'ä y'ayenyëty taxtujk xajpk ets myëjwiinëty tu'kxajpk ja tu'kkë'ënux, tu'knax kyijpxy'atë.

¹⁶Tääts ojts mäjtsk t'axuuymyuky ja wit'atëëytyuk mëti'ipë mëjjatyëtyën, tu'uk t'axuuymyujky mëkoxk ja wit'atëëytyuk ets tu'uk atëtujk.

¹⁷Tu'k'it tukpa'axu'uyëy wëxtyikxy majk ja atsi'it jut ma ja wit'atëëytyuk ja mëtu'ukpë y'axuuymyukyëtyën. Näyjyëtu'un ojts tukpa'axuyë ja atsi'it jut ma ja mëmäjtskpë ja wit'atëëytyuk, mëti'ipë të yaj'axuuymyukyën.

¹⁸Ojts t'oytyuny wëxtyikxy majk yë jo'kn, mëti'ipë oytyunyën mëët yë tsuxkpujxn ets jä'ä mëët yajtuk'ajo'kmukëty ja wit tëjk.

¹⁹Yë Besalel ojts tu'uk yë nyiwit'atëëytyuk tyajkojë ya'atë wit tëjk, yë'ë ojts t'ajo'kmuky yë kupixyny ayääkë ak, mëti'ipë ënäty tëë wyatsnën tsapts ets jap nëkëjxy tpëjktäky yë po'o oyjyätyëtypë.

²⁰Ojts näjyëtu'un kanaak t'oytyuny yë acacië kepyjyiity mëti'ipë tunaanpën ma ja Tios ja jyëën tyëjkën, aak kujkyë tpëjktäky.

²¹Tu'ukjatypë ja kepyjyiity jä'ä y'ayenyëty tëkëëk xajpk ets jä'ä myëjwiinëty tu'kkë'ënux ja kujkm.

²²Mäjtskjaty tmëëtëty, mëti'ipë mëët ja myëku'uk nyämyajts'ityën. Tu'kë'ëyë ja kepyjyiity mëti'ipë jap yajtuunën tsajptëkoty, aakjëtu'un ojts t'oytyuunta'ay aakmëët ja nyikepy ajë'tk.

²³I'px tpëjktäky ja kepyjyiity ëpa'tkë'ëy'äämpy,

²⁴wëxtyikxy ojts ja nyi'ëjx tpëjktakë, aakyë'ë poop pujxn. Tu'ukjaty ja kepyjyiity mäjtsk ojts ja y'ëjx tpëky ets ja nyikepy ajë'tk yajxon ojts yajtukni'oytyunë.

²⁵Ojts näjyëtu'un i'px tpëjktä'äky yë kepyjyiity anëkëjxy'äämpy ma ja Tios ja jyëën tyëjkën.

²⁶Ets ja nyi'ëjx ojts tpëjktakë näjyëtu'un wëxtyikxy, tu'ukjaty ja kepyjyiity mäjtsk ojts ja y'ëjx tpëky.

²⁷Ma ja a'oytsyowpë wyi'imyën, jä'ä tpëjktäky ja kepyjyiity tëtujk,

²⁸mäjtsk ojts tyajni'ikë, mëti'ipë pyëjktakën ma ja tyatskën.

²⁹Mäjtsk ya'atë kepyjyiity awojpmuky y'itë jam anëkëjxmtsow ma mëët tu'ukpë ja jo'knën, ya'atë ojts mäjtsk ja kepy jyiitsy tyaj'oyë mëti'ipë tuunën ma ja mäjtskpë ja tyäkën.

³⁰Paaty ja kepyjyiity jä'ä ënäty ëmukë nyäpyata'ayë tuktujk, mëët majkmokx tu'uk ja nyi'ëjx aakyë'ë poop pujxn ets tu'ukjaty ja kepyjyiity mäjtsk ojts ja y'ëjx tpëky.

³¹Yë Besalel ojts näjyëtu'un t'oytyuny mëkoxk yë witsë mëti'ipë mëët tyunëtyën ja acacië kepyjyiity yaatsowpë pë'aay wyi'imyën ma ja tsajptëjkën.

³²Mëkoxk ojts wiinkpë t'oytyuny ja witsë mëti'ipë mëët tyunëtyën ja kepyjyiity, jamtsowpë wyi'imyën ma ja tsajptëjkën ets ëpëky ja wiinkpë nän mëkoxk mëti'ipë mëët ja kepy jyiitsy tyunëtyën anëkëjxytsyowpë ma tsajptëjkën mëti'ipë xëëwkëtä'äkytsyow wë'ëmpën.

³³Ya'atë witsë yenyëty ojts t'oytyuny ets tjëkyäpëty wi'ix yajxon yajkëëyë'ëkëtyën, najxp jam yeny jëjp'am ma ja kepyjyiityën.

³⁴Yë kepyjyiity ojts tuknikooytyä'äy yë pu'ts pujxn ets ojts t'oytyuunë yë nyitëëyë'ëk aak pu'ts pujxn ma yajjëëpëtyën ja witsë, mëti'ipë näjyëtu'un ënäty tëë yajnikoyën.

³⁵Ënät ojts t'oytyuny näjyëtu'un ja mëjwit, mëti'ipë ja tëkot yajtuk'atëëytyujkpën, yë'ë ojts txuuymyuky yë wit mëti'ipë yë y'ujkën tsu'unk, uky, tsapts ets ja linë wit awiity ets ma ya'atë witën jam ojts tyajkëxkojy mäjtsk yë tsajpjotmëtë kukäjpxy.

³⁶Tääts jam tkëxtëëy yë pu'ts pujxnjo'kn ma ja taxkpë ja acacië kepy xyenyën, mëti'ipë nikoyën mëët yë pu'ts pujxn ets yë'ë y'ëjx'ajtyp yë poop pujxn, aakjëtu'un taxkëty.

³⁷Ma ja wit tëjk yajnitëkën ma ja Tios jam kyëtä'äkyën, ojts t'oytyuny yë nyi'atëëytyuk, yë'ë mëët t'oytyuuny ja wit, tsu'unkpë, ukpyë, tsaptspë ets ja linë wit awiity, jëtu'un tjo'ktë tä oy yaj'ixëtyën.

³⁸Mëkoxk ojts t'oytyuuntë ja nyixeny mëët yë nyijo'kn ets tpëjktäky mëkoxk yë nyi'ëjx aakyë'ë tsuxkpujxn yajtuun, ja xeny ojts tukniwijtsta'ay ja pu'ts pujxn mëët tëkokyë ja nyijo'kn.