Read Biblia Mixe de Quetzaltepec Éxodo 39 Bible Online

Éxodo 39 - Biblia Mixe de Quetzaltepec bible

Éxodo 39

¹Ja wit jo'oky mëti'ipë jap tunaanpën tsajptëkoty, yë'ë yajtuk'oytyuun yë tsu'unkpë wit, ukpyë ets tsaptspë, yë'ë wit mëët yaj'oytyuuny ja Aarón ja wyit, jëtu'un ijxtëm ënäty ja Moisés ja Tios të tyuk'ëne'emyën.

²Ko ojts yë kejky yä'äp y'oyë, pu'ts pujxn ojts tyuny, kanaak ja wit jo'oky tyuuny, tam tsu'unkpë, ukpyë, tsatptspë ets tam ja linë wit awiity.

³Ojts tyaj'oyëtë may ja tsya'a, pu'ts pujxn mëët t'oytyuuntë, yë'ë tyuka'tstëëwtë yë pujxnkuwojpën ets tsujktaktë piityën; ojts tukjo'oktë ja wit tä'äky, ja tsu'unkpë, ukpyë, tsaptspë ets ja linë wit awiity.

⁴Yë kejky yä'äp ojts mäjtsk yë nyitëëyë'ëk yajpëjktä'äky, jam ma ja tyatskën mäjtskpa'ajëty ets jam jëjp'am y'atsuumtukyëty.

⁵Ja nyiwëën mëti'ipë ënäty yajtukmajts'itaanpën ja kejky yä'äp, näjyëtu'un ojts yaj'oytyuny mëët yë pu'ts pujxn ja wit ukpyë, tsu'unkpë, tsatptspë ets ja linë wit awiity, jëtu'un ijxtëm ënäty ja Tios të tuk'ëne'emyën ja Moisés.

⁶Ja tsuxktsaa jam ojts yajpëjktakta'ay ma ja kyëxmëtakpäjnën ja pu'ts pujxnpë ets ma tu'ukjaty ja tsaajën jam ojts yajkëxtsa'ay ja Israel ja y'u'unk y'ëna'k ja xyëëwëty, jëtu'un tä yë noky yajtsa'ayën mëët yë tsa'ajën.

⁷Ënät ja Besalel jam tkëxtëëy ma ja kejky yä'äp ja nyitëëyë'ëkën ets yë'ë yajtukja'amyätsëty ja y'u'unk y'ëna'k yë Israel, jëtu'un ijxtëm ënäty yë Tios të tuk'ëne'emyën ja Moisés.

⁸Ja katsyjyän, janty'oy ojts yajjo'oky jëtu'un tä ja kejky yä'äpën näjyëtu'un, ojts yajtuk'oytyuny yë pu'ts pujxn ets wit tä'äky tsu'unkpë, ukpyë, tsaptspë ets ja linë wit awiity.

⁹Amäjtsk ënäty ets taxktatsk y'ixëty, i'px mäjtsk kë'ë'u'unk yë y'ok tmëëtëty pa'apa'a.

¹⁰Nëkëjxy yë'ë ënäty myëët'ajtyp yë tsaa oyëtypë, jëtu'un taxk waats tyimnaxy aak tsaa oyjyätyëtypë, tu'k waatspë nyäxyën yë'ë jam ijtp tu'uk yë tsapts tsaa, tu'uk yë të'kxy tsyaa ets tu'uk yë tsuxktsaa.

¹¹Ma ja mëmäjtsk waatspën yë'ë myëët'ajtyp tu'uk yë uky tsyaa, tu'uk yë tsuxk'uky tsyaa ets tu'uk yë yëktsuxk tsaa.

¹²Ma ja mëtëkëëk waatspën, yë'ë myëët'ajtyp tu'uk yë monytsyapts tsaa, tu'uk yë yëktsapts tsaa ets tu'uk yë nipyu'ts tsaa.

¹³E ma ja mëmajktaxk waatspën yë'ë myëët'ajtyp: tu'uk yë pu'ts tsaa, tu'uk yë uky tyapts tsaa ets tu'uk yë tsu'unk tsaa, ya'atë tsaa jam ojts yajpëjktakta'ay ma ja kyëxmëtakpäjnën aak pu'ts pujxnpë.

¹⁴Jä'ä wyinë'aty majkmäjtsk, jä'ä ko ja Israel ja y'u'unk y'ëna'k majkmäjtsk jä'äjëty; ma ya'atë tsaajën jam ojts kyëxkojtë yë Israel yë y'u'unk y'ëna'k yë xyëëwëty, tu'ukjaty ja xyëëwëty jam yajkëxpëjktë ma tu'ukpë ja tsaajën, jëtu'un yajkëxtsaaytyë jam tä tu'uk yë noky yajkëxtsa'ayën.

¹⁵Ma ja katsyjyänën ojts jam tpëjkta'aktë yë pujxnjo'kn u'unk, aak pu'ts pujxnpë, jëtu'un kyëxë'ëky xyäätyëty tä piityën.

¹⁶Ets ojts näjyëtu'un mäjtsk yaj'oytyuny yë kyëxmëtakpäjn aak pu'ts pujxnpë ets mäjtsk yë nyitëëyë'ëky nän aak pu'ts pujxn, jam tpëjktaktë ma ja katsyjyän ja pya'ajën mäjtskpëkyëty.

¹⁷Jamts ojts yajkëxtsumy ja pu'ts pujxn jo'oky ma ja nyitëëyë'ëkën.

¹⁸Tääts yajpëjktäky ja pu'ts pujxn jo'oky mäjtskëty ma mäjtsk ja kyëxmëtakpäjnën ets mëët tsuummujktë ja kejky yä'äp ja nyitëëyë'ëk wintuuytsyow.

¹⁹Ojts mäjtsk ëpëky tyajkojtë yë nyitëëyë'ëk aak pu'ts pujxn ets tpëjktaktë ma ja katyjyän y'ityën, je'eyëp ko jä'ä ja ëpa'tkë'ëy'äämpyë, pë'aaytsyow ojts tkëxtsumtë, mëti'ipë yajpatpën itkujky mëët yë kejky yä'äp.

²⁰Ojts yë wiinkpë nyitëëyë'ëky mäjtsk yaj'oytyuny aak pu'ts pujxnpë mëti'ipë ojts jam yajpëjktä'äkyën ma ja kejky yä'äp ja nyitëëyë'ëkën, pa'tkë'ptsow ojts tkëxuytyë ets yë'ë mëët nyäpyäätyë tu'ukyë ja kejky yä'äp ja nyiwëën.

²¹Tääts t'atsuumujktë ja katsyjyän ja nyitëëyë'ëk mëët ja kejky yä'äp ja jyä'ä, yë'ë tyuk'atsuumujktë yë uky tyejpxy ets ja katsyjyän ojts nëkëjxy wyi'imy ma ja kejky yä'äp ja nyiwëënën ets nijëna'a ëpëkyjyäty kya'itëty, jëtu'un ojts yaj'oytyuny tä ënäty ja Moisés ja Tios të tyuk'ëne'emyën.

²²Tu'kë'ëyë yë kejky yä'äp, ukywyit ojts yajtuknixuy.

²³Itkujky ma jyutëtyën, ojts tu'uk yë wit yajtukpa'axuyë, këtiipë nyajtskëëtsëty, jëtu'un ojts yajëjpxuuywyimpity tä yë po'o nijänën kë'ëtukpë xyuyëtyën.

²⁴Tä ojts jam tkëxuytyë yë piity tyä'äky kanaakjëjp ma ja wit ja pya'ajën, yë'ëjës mëët oy tyaj'ijxënkëxë'ëktë; ja piity tyä'äky yë'ë ukpyë, tsu'unkpë, tsaptspë ets linë wit awiity.

²⁵Ënät ojts näjyëtu'un t'oytyuntë yë pujxn u'unk aakyë'ë pu'ts pujxnpë ets ojts tukmëpëkëtë ja piity apity ets jam yajkëxuuytyë ma ja wit pa'ajën.

²⁶Jä'ä jëtu'un ja nijän mëti'ipë ja teety jap pyëjkta'aktëpën, ko jap tyuntëty tsajptëkoty. Xëpiny ojts tpëjkta'aktë ja pujxn u'unk mëët ja piity apity; tu'uk yajkëxuuy ja pujxn u'unk ets tu'uk ja piity apity, tu'uk ja pujxn u'unk ets tu'uk ja piity apity ets jëtu'un tkëxuuytyääytyë na'ëwtityëty ets ojts kyojy tä ënäty ja Wintsën të tuk'ëne'emyën ja Moisés.

²⁷Ja Aarón ja wyit tä'äky mëët ja y'u'unk y'ëna'k ja jyä'äjëty, mëti'ipë aak oywyitën, yë'ë ojts t'oytyuny tu'uk yë ja'ay mëti'ipë ënäty yajxon nyija'apën wi'ix yë wit yajo'okyën.

²⁸Näyjyëtu'un ja kupit, ja kutsum mëti'ipë yajtuktsuumwë'ëmpën ja kupit ets ja nyi'ëxmotspa'tk, aakyë'ë ojts tyuny ja linë wit awiity,

²⁹näjyëtu'un ja wëën mëti'ipë mëët y'oytyunyëtyën ja linë wit awiity ets ja wit tä'äky ukpyë, tsu'unkpë ets tsaptspë, yajxon ojts yajtä'äky oy, jëtu'un ijxtëm ënäty ja Tios të tuk'ëne'emyën ja Moisés.

³⁰Ojts näjyëtu'un tyaj'oyëtë yë tsya'a aak pu'ts pujxnpë, mëti'ipëjaty ënäty yajwa'atsnajxypyën ets ojts jam witkëjxm jëtu'un tyajkëxkojtë tä yë ja'ay muum tii tkëxtsa'ayën, jä'ä y'ënä'äny: Tios yajmoopy.

³¹Ënät ojts ja pu'ts pujn jam tkëxtsumtë ma ja wit këxtëy y'ityën, mëti'ipë xyëëwajtypyën kupit; yë'ë tyukëxtsuumtë tu'uk ja ukypyiity timnikojëpë, jëtu'un ojts wyi'imy tä ënäty ja Tios të tuk'ëne'emyën ja Moisés.

³²Ja wit tëjk ma y'ityën ja näpyaatë mëët yë Tios, ojts ja kyojta'ay ets y'apatëtyääy. Ja Israel ja'ayëty jëtu'un ojts t'oytyuntë tä ojts ja Tios tuk'ëne'emyën ja Moisés,

³³tääts ja Moisés ojts tkë'ëmooytyääynyëtë tëkokyë mëti'ipë ënäty të tyaj'o'oyëtya'atën jap ma ja Tios ja jyëën tyëjkën; ja wit tëjk ma ja näpyaatë y'ityën ets tëkokyë jënu'un ënäty jap tyuna'anyën: ja jo'kn, ja kepyjyiity, ja witsë ets ja xeny mëët ja nyi'ëjx tu'uktu'uk.

³⁴Ja nyiyä'äp mëti'ipë oytyunyën mëët ja kupixyny yä'äy ak, mëti'ipë ënäty të wyatsnën tsapts, ja oyjyätyëtypë ja po'o mëti'ipë näjyëtu'un yajtuknikäämën ets ja wit'atëëytyuk mëti'ipë yajtuk'atëëytyujkpën ja kaaxë;

³⁵ja kaaxë mëti'ipë myë'ijtypyën ja käjpxytyu'unën ets ja nyiwitsë, näjyëtu'un ja nyi'akë'ë;

³⁶ja kaaypyäjn ets tëkokyë jënu'un mëët tyunyën ja tsajpkääky mëti'ipë ja Tios yajmoopyën.

³⁷Ja mëj jëëntooytyakn mëti'ipë aak pu'ts pujxn mëët y'oytyunyëtyën ets ja nyikutë'kxn mëti'ipë mä'kxy yajpatpën ets tu'kë'ëyë jënu'un ënäty mëët tyuna'anyën, jëtu'un tä ja onën mëti'ipë mëët tyoyën ja kutë'kxn;

³⁸ja pu'ts pujxn wintsë'këntyakn, ja on mëti'ipë yajtukkënu'kxpën, ja poom mëti'ipë pa'akxu'kpën; ja wit'atëëytyuk mëti'ipë yajtuk'atëëytyujkpën ja tyëjkëtyakn ja wit tëjk ma ja näpyaatë y'ityën;

³⁹ja tsuxkpujxn wintsë'këntyakn ets näjyëtu'un ja tsuxkpujxn atënaayë'ëk, mëët ja nyiwitsë ets tëkokyë jënu'un mëët tyunyën; tä ja pujxn kë'ëpujtakn mëët ja nyi'ëjx.

⁴⁰Ja wit'atëëytyuk mëti'ipë tuunën ma ja tëja'awën, ja xyenyëty ets ja nyi'ëjx; ja wit'atëëytyuk mëti'ipë jam tuunën ma ja tëja'aw yajnitëkën, ja nyitejpxy ets ja nyi'akujpë'ëk mëti'ipë tuuntën ma ja tëja'awën, tëkokyë jënu'un winë tyuuntaayën ma ja Tios ja jyëën tyëjkën, ja wit tëjk ma ja näpyaatë y'ityën.

⁴¹Ja wit mëti'ipë jo'okyën, mëti'ipë jap tuunën ma ja tsajptëjkën, ja wit tä'äky mëti'ipë yajtukni'oytyu'unëyën ja teety Aarón ets ja wyitëty ja y'u'unk y'ëna'këty mëti'ipë myëteety'atëpën.

⁴²Yë Israel ja'ayëty jëtu'un ojts kä'pxy t'oytyuunta'atë tä ënäty ja Tios të tuk'ëne'emyën ja Moisés.

⁴³Ko ja Moisés t'ijxy, ko ja ja'ayëty mëj këjää të tyuntë, ënät ojts ni'ëmukë tkënu'kxta'ay.