Read Biblia Mixe de Quetzaltepec Éxodo 40 Bible Online

Éxodo 40 - Biblia Mixe de Quetzaltepec bible

Éxodo 40

¹Ënät yë Tios ojts tmëkäjpxy yë Moisés ets t'ënëmaay:

²Ma tyu'uk anyën mëtu'kpo'opë jää nëjkx xymyä'kxy ja wit tëjk ma ja näpyaatë y'itëtyën mëët ja Tios.

³Jap xypyëjkta'akëty ja kaaxë, mëti'ipë myë'ijtypyën ja käjpxytyu'unën ets ënät xy'atëëytyukëty mëët ja wit'atëëytyuk.

⁴Jap xypyëjkta'akëty tëkoty ja kaaypyäjn ets ja mëj jëëntooytyakn, yajxon oy xynyipëjktaakëty ma kaaypyäjn y'itëtyën ets ja mëj jëëntooytyakn pëjktaktaayë ja nyikutë'kxn.

⁵Pëjkta'ak näjyëtu'un ja poom ja wyintsë'këntyakn, pu'ts pujxn myajtunëp, winkon xypyëjkta'akëty mëët ja kaaxë mëti'ipë ja käjpxytyu'unën myë'ijtypyën ets xykyëxtëyëty ja wit'atëëytyuk ma yajnitëkën yë Tios yë jyëën tyëjk.

⁶Tä ënät näjyëtu'un xykyiiytya'akëty ja wintsë'këntyakn ma jëyujk nyitoytyëtyën, winkon xypyëjkta'akëty ma ja tsajptëjk yajnitëkën, jä'ä ja wit tëjk ma ja näpyaatë y'ityën.

⁷Pëjkta'ak ja kë'ëpujtakn, itkujky xypyëjkta'akëty ma yajpaatyën ja wit tëjk ma ja näpyaatë y'ityën mëët ja wintsë'këntyakn ets xy'atääm'utsëty mëët yë nëë.

⁸Tä ënät näjyëtu'un xyaj'oyëty ja nyitëja'aw ets xypyëjkta'akëty ja nyiwit'atëëytyuk jam ma yajnitëkën.

⁹Tääts ja on, mëti'ipë winë mëët yajkënu'kxyën xytyuknixijkxta'ajëty ja Tios ja jyëën tyëjk ets jënu'un jap winë y'ityën, aakjëtu'un xykyënu'kxta'ajëty ja apëjk atu'unën jënu'un jap tyuna'anyën ma ja Tios ja jyëën tyëjkën, jëtu'un'äämpy tääpë ja it naaxwiinyëtë wyë'ëmëty kënu'kxy ets wa'ats.

¹⁰Tuknijaax yë kënu'kxy on yë wintsë'këntyakn ma jëyujk yajnino'oktën ets tëkokyë yë apëjk atu'unën jënu'un mëët tyunyën, jëtu'un xykyënu'kxëty ets wa'ats wyë'ëmëty yë wintsë'këntyakn.

¹¹Tuknixijkx näjyëtu'un yë pujxn akë'ëpujën ets nyi'ëjx ets jëtu'un'äämpy kënu'kxy wyë'ëmëty.

¹²Woownëjkx ënät yë Aarón mëët yë y'u'unk y'ëna'k jam ma yajnitëkën ja tsajptëjk ets jam xy'ënëëmëty ets tsyi'iwtëty.

¹³Ko tsyiiwta'atëty tääts ja Aarón ja wyit tpëjkta'akëty mëti'ipë të yajtuknixuyën ets ja on xytyukkujaaxëty ets xykyënu'kxëty, jëtu'un'äämpy tpa'atwa'akëty ja teety'ajtën ma ëjts xymyëtunëtyën.

¹⁴Mëjwoowëp näjyëtu'un ja y'u'unk y'ëna'k ets xytyuknijänëty ja wit mëti'ipë myëteety'atëpën.

¹⁵Ets xytyukkuja'axta'ajëty ja on mëti'ipë yajtukkënu'kxpën winë, jëtu'un ijxtëm ja Aarón të xytyukkujaaxyën ets jëtu'un'äämpy tpa'atwa'akëtëty ja teety'ajtën etsës xymyëtuntëty.

¹⁶Moisés ojts tuunta'ay winë tä ënäty ja Tios të tyuk'ëne'emyën.

¹⁷Paaty ko mäjtsk jëmëjt y'apejty, ma ënäty të tsyoontën jap Egiptë, ma tyu'uk'anyën ja mëët tu'ukpë ja po'opë, jää ojts ja Tios ja jyëën tyëjk ëka'any yajpëjktä'äky.

¹⁸Moisés ojts tpëjktä'äky ja Tios ja jyëën tyëjk ets tpëjktaktaay ja nyi'ëjx, ojts tmä'kxta'ay ja kepyjyiity ets tmooytyääy ja witsë ets tyajwa'akë'ktaay ja xeny.

¹⁹Ojts twijtstëëwta'ay ja wit ma ja Tios ja jyëën tyëjkën ets ojts tpëjktä'äky ja nyiwits nyijuux jëtu'un tä ënäty ja Wintsën të tni'ënä'ämën.

²⁰Ojts ja Moisés t'apëkë ja tsaatsetsy ma myinyën ja ënä'ämën tëyajtën jap kaaxëjoty mëti'ipë myë'ijtypyën ja käjpxytyu'unën ets ja kaaxë ojts ja nyiwitsë tpëjktäky, näjyëtu'un ja nyi'akë'ë mëti'ipë yajtuk'ajupëpën ets tmënëjkxy jap ma ja Tios ja jyëën tyëjkën, ojts tkutëëytyä'äy ja wit'atëëytyuk ets t'atëëytyujky ja kaaxë, jëtu'un ijxtëm ënäty ja Wintsën të tni'ënä'ämën.

²²Ojts ja kaaypyäjn näjyëtu'un tkëëytyä'äky jap ma ja wit tëjkën ma näpyaatë y'ityën mëët ja Tios, tëja'ptsow tpëjktäky ma ja wit'atëëytyukën, anëkëjxy'äämpy ma ja tsajptëjkën.

²³Ets tpëjktäky näjyëtu'un ja tsajpkääky ma ja nyikaaypyäjnën, jam ma ja Tios jam kyëtä'äkyën, jëtu'un ijxtëm ënäty ja Tios të tni'ënä'ämën.

²⁴Ojts tpëjktä'äky ja jëëntooytyakn jap ma ja wit tëjkën ma ja näpyaatë y'ityën mëët ja Tios, jëtu'un mëët nyäwyinku'ixëty ja kaaypyäjn, ëpa'tkë'ëy'äämpy ma ja tsajptëjkën.

²⁵Ets tyajmëjëtyääy ja kutë'kxn jam ma ja Tios ijty kyëtä'äkyën, ijxtëm ënäty ja Tios të tni'ënä'ämën.

²⁶Ja pu'ts pujxn wintsë'këntyakn ojts tpëjktä'äky jap ma ja wit tëjkën ma ja näpyaatë y'ityën mëët ja Tios, wiintuuytsyow ojts tpëjktä'äky ma ja wit'atëëytyukën.

²⁷Ojts tyajtoopyiky ja mëti'ipë oy xu'kp jojkpën, jëtu'un ijxtëm ënäty ja Tios të tyuk'ëne'emyën.

²⁸Ënät ja Moisés ojts tkëxtëy ja wit'atëëytyuk, jam ma ja Tios ja jyëën tyëjk yajnitëkën.

²⁹Ets ja wintsë'këntyakn tkëëytyäky ma ja jëyujk yajnino'oktëtyën, jam winkon tpëjktäky ma ja wit tëjk yajnitëkën ma ja näpyaatë y'ityën, ojts ja jëyujk kanaak tjantyajnitoy ets näjyëtu'un ja aaytyëëm ujtstëëm tkë'ëyäjky jam ma Tiosën, tä tu'uk yë ayajk ako'onën, jëtu'un tä ënäty ja Tios të tyuk'ëne'emyën.

³⁰Ja kë'ëpujtakn itkujky ojts tpëjktä'äky ma ja wit tëjkën ma ja näpyaatë y'ityën ets ja wintsë'këntyakn, tääts tyaj'ujtsy mëët yë nëë ets jëtu'un jap ja teetytyëjkëty kyë'ëpujtëty.

³¹Yë Moisés ets Aarón mëët yë y'u'unk y'ëna'k, jap ijty ja nëë tjuutë mëti'ipë kyë'ëpuj'ajtëpën ets mëti'ipë tyekpyuj'ajtëpën.

³²Näpyujëtëp ijtyëty ko jap tyëkëtë ma ja wit tëjkën ma ja näpyaatë y'ityën ets ko twinkuwa'akëtë ja potsy ma ja wintsë'këntyaknën, jä'ä ko jëtu'un ënäty ja Wintsën të tuk'ëne'emy ja Moisés.

³³Ko ojts jyëjpkëjxtaaynyë, tä ja Moisés yi'iyë tjaakyaj'o'oyëtyääy ja nyitëkja'aw ja wit tëjk ma ja näpyaatë y'ityën ets ja wintsë'këntyakn, ojts ja wit'atëëytyuk tkëxtëy jam ma yajnitëkën ja tëja'aw. Ko ja Moisés tkojtaay ja wit tëjk,

³⁴ënät ja yoots nëma'a ojts tyajnituky ja wit tëjk ma ja näpyaatë y'ityën mëët ja Tios ets tyajtuktujktaay mëët ja myëj'ajt y'oyajtën.

³⁵Jëtu'un'äämpy ojts ka'ap t'ëkjëkyäjpnë ja Moisés jap tyëkëty ma ja wit tëjkën ma ja näpyaatë y'ityën, jä'ä ko ja yoots nëma'a jä'ä ënäty jam të nyäkyo'ktaayënë tëjknëkëjxm ets ja Tios ja myëj'ajt y'oyajtën yë'ë ënäty të tyajtuktujkta'ay ja tëkot.

³⁶Ko ja yoots ijty pyëti'iky, mëti'ipë jam ko'knääpyën ma ja tëjk kopkën, yë Israel ja'ayëty ënätyë ijty näjyëtu'un tyajpëtë'ëktë ja tsyënaaytyaknëty.

³⁷E pën ja yoots ijtp jam jeky, näjyëtu'un ja tsyënaaytyaknëty ka'ap nëkoo tyajpëtë'ëktë; jä'änëm y'ëwxijtëp ja yoots koonëm pyëti'iky.

³⁸Jëtu'un ojts nyë'ëye'eytyë tyu'uye'eytyë ja Israel ja'ayëty, t'ijxtë tkoowtë winë mëj këjää, ko ijty xyiiny'äty ja Wintsën ja yoots ijty nyitëëynyääpy ja Tios ja jyëën tyëjk e ko kyoots'aty jëtu'un jam kyëxë'ëky ma ja tëjk kopkën, ma ja Tios ja jyëën tyëjkën, tä tu'uk yë mëj jëënyä'änkën.