Read Biblia Mixe de Quetzaltepec Job 10 Bible Online

Job 10 - Biblia Mixe de Quetzaltepec bible

Job 10

¹Tëës n'ënu'kxënë mëët yë juuky'ajtk. Je'eyës yam n'ëja'any ntu'uka'any ets jëtu'unës npa'am nyajnaxa'any, yë'ëjës yë npëjkën n'ijxën nmëjpëjkta'akäämpy.

²Mijts Tios, pokyjyä'äyës të xypyëjktä'äky. Tuk'ënëmaaykyës tiijës xytyukpoky'ijxp.

³¿Oy jëtää, ko mijts të xyajkojyës ets kë'ëm jatëkok xy'ëxëëk'ixyësë? Jëtu'unës xyaj'ëyoy tä ëxëëkja'aytyëjk tsoktën njatëtyës nkëpätëtyës.

⁴¿Wä'än jëtää mijts jëtu'un winë xy'ixy tä yë naaxwiinyëtë ja'ay winë t'ixtënë?

⁵¿Näyjyëtu'un yë mjuukyajtën kyonëty tä yë naaxwiinyëtë ja'ayënë?

⁶Pën ka'ap jyëtu'unëty, ¿tiixë ko yë'ë xy'ix'ixy xypya'ixy maas tii ntuuntëkoy nkajpxtëkoyën ets maas mpokytyunyën?

⁷¿Ets oy xyjyanija'apë ko ëjts ka'apës tii poky nmëëtëty ets ka'ap tjëkyepy ni pën xyjyuutëtyës mkë'ëjootjotyë?

⁸Mijtsës të xykyojy të xymyä'kxy mëët yë mkë'ë m'aaw; tyam, mijtsës ënät näjyëtu'un xyajkutëkoyaanp.

⁹Ja'amyäts ko naax mwinpëjkmujk etsës ojts xyajkojy, ¿e tyam näy naaxës jatëkok xyaj'awinpita'anyë?

¹⁰Mijts ojts xy'a'ixë etsës yë njot nini'kx jëtu'un kyojëty tä jyuunyën yë tsi'tsknëë ets tä myëjayën;

¹¹etsës ojts xytyukniwoony yë ni'akës ets nxixyës, ojts xypyëjktä'äky yë npajkës ets n'eemyës;

¹²tëëjës juukyajtën xymyo'oy ets tëëjës yë tsojkën ja'awën xymyo'oy, mijtsës të xykyëwent'aty, etsës oy të njuuky'äty,

¹³e tyamës ënät nnijawë ko jap mwinma'anyjoty taptëm xymyëëtëty yë tëkatsypë jot tëkatsy wyinma'any mëët ëjts;

¹⁴je'eyëtëmës ënäty xy'ixy xytyuny pën maas n'ëkpokytyuny ets jëtu'unës xytyiytyuna'any koos ënäty muum ntëkoy.

¹⁵Pën ëjts nmëët'ajtypyës yë poky, ¿tiijës natuunta'akëp? Pën ëjts ka'apës npokymyëëtëty, nëkoopës ntukxoonta'akëty, jä'ä ko mijts je'eyës xyajmony xyajtuky ets je'eyës o'ktëy xytyuny xy'ënëëmë.

¹⁶Koos ëjts njajoot'anpëka'any, jëtu'unës xynyipëtë'ëky kaajën ets yë'ëpaat yë mmëjajtën xyaj'ixyë koos xyajkutëkoyä'äny.

¹⁷Ka'ap xyaj'ëmaaytyä'äky mëti'ipës xynyi'ëënëpën; ni'ikyë xyajkëjääjë yë mjoot'an mëët ëjts; jëtu'un tä tsiptuunpëtëjk tsyiptuntën, jëtu'unës mijts xëmë xynyipëtë'ëky.

¹⁸¿Tii ko ojts xyajkutujkpë etsës nmëxu'unk'atëty? Nikë oy koos jeexyë ojts ntimy'ooky ets ka'apës jeexyë ni pën xytyim'ijxy.

¹⁹Nikë oy ko jeexyë ojts tëyë naxyës ets njëjptä'äkyës jap naaxpa'tkë'p, jëtu'un jeexyë timpyäty tä nkatimmyiinyënës naaxwiiny.

²⁰Yë njuukyajtënës wäänë yaa nyajxkojy, ëxmajtskës tu'ktsojkyë, wä'änës n'ëkjuuky'äty jotkujk. Minës wäänë n'ëkxoontä'äky

²¹ma ka'anëm ntsoonyëmës, maas ka'ap n'ëkwinpitanën, ma ja kajpn api'its akootspë yajpaatyën ets ma xëmë kyoots'ityën,

²²ma xëmë nik yajpaatyën ets ka'ap jap tii yaj'ijxpaaty, ma të'kxën jajën jëtu'un yaj'ixyën tä kyootsëtyën.