Read Biblia Mixe de Quetzaltepec Job 13 Bible Online

Job 13 - Biblia Mixe de Quetzaltepec bible

Job 13

¹Tëkokyë ya'atë mëti'ipës yam nikäjpxypën aak tëëjës n'ixta'ay kë'ëm ets aak tëëjës kë'ëm nmëtoowta'ay.

²Mëti'ipë miitsëty mnija'awëtëpën, nija'apës näjyëtu'un; ka'ap tjëkyepy miits m'ëna'antëty ko ni'ik winë xynyijawëtë këtiinëm ëjts.

³Je'eyëp ko ëjts yë'ëjës mëët yë Tios kë'ëm nmëtya'aka'any, yë'ëjës mëët njanäwyintänëja'anyë mëti'ipë maaytyääyëpën winë.

⁴Miitsëty ni'ikyë xynyipä'äntë ja tëyajtën mëët ko je'eyë mwin'ëëntë; jëtu'un mnäyajnaxëtë tsooyëpën ets ka'ap nijëna'a pën xyajtso'oktë.

⁵Tim yi'iyë ko jeexyë amonyë m'itë, nikë wä'än jeexyë wijy mjaakyajtijtë.

⁶Tuntë mëyajtën mëtoow'itë ya'atë aaw ayuk mëti'ipës yam nikajpxäämpyën.

⁷¿Miitsëty jëtu'un mmaytyë mtajtë ko Tios mkuwantëp ko mwin'ëëntë ets ko oy xymyëtuntë ko ka'ap tii mëtëy xynyikajpxtë?

⁸Miitsëty je'eyë Tios ëëwpäjn kajpxpäjn xywya'antë ets yi'iyë mkë'ëmjot mkë'ëmwinma'any mëjpëjktaktëp,

⁹je'eyëp ko tii jëtää tunëtëp jatëtëp ko Tios m'ëk winma'any ixa'anëtëty. ¿Jyëkyejpy jëtää yë Tios xywin'ëëntëtyë?

¹⁰Pën yë'ë y'ijxyp ko ënäty miitsëty tii wiinkë'ëy akë'ëy xynyikajpxtë, ëxëëk yë mtunëtëty.

¹¹Je'eyë nëjkx tsë'ëkë ets tsëtyuyë xymyënax xyajnaxtë ko ënäty xy'ijxëtë myëj'ajtën.

¹²Miitsëty yë m'aaw m'ayukëty jëtu'un nyäxy tä naaxjokën; jëtu'un m'ëtë'ëtstë tä jeexyë yë'ë mnätyukuwa'anëtën yë mo'onts potsy.

¹³Tyam amonyë itë, amontë, ëjts yam kajpxaanp, oyës tii xytyim jat xytyim këpätëty.

¹⁴Njuukyajtënës yam kë'ëm npëjktäkpy atsë'ëkëtuuy ets wä'än t'ixy tiijës xyjyajtp xykyëpäjtp.

¹⁵Oy yë'ë jyatimy'ënaanpë koos xyaj'ooka'any, ëjts ka'apës yë n'ayuk ntukxi'ika'any, nëkoo ko n'ëktuk'ëwaanës wiinxë jëjpxë ko ëjts ka'apës tii poky të ntuny.

¹⁶Nikë wä'änxyëp ntso'okëtyës koos jëtu'un nwina'anypyaatëty; jä'ä ko tu'uk yë ja'ay, mëti'ipë janty pokymyëëtën ka'ap jëtu'un y'ëna'ana'any.

¹⁷Paaty yam n'ënëëmëtë: yajxon mëtoow'itë mëti'ipës yam nikajpxäämpyën.

¹⁸Yë'ëjës yam nikajpxäämpy mëti'ipës nätyuknikajpxtu'utanëpën ets wa'atsës nijawë ko mëtëyës yam winë nikajpxa'any.

¹⁹Pën jam pën xytyukwinmëtowa'anyës mëti'ipës të ntuuntëkoyën, wä'än tnikäjpxy tyamës n'ëmonëty etsës n'ookëty.

²⁰Tios, mäjtskës yam je'eyë n'amëtoy ma mijtsën ets ntsojkpyës etsës xymyo'ojëty, ënätës ka'ap näyu'utsëtëty koos ënäty mijts xy'ixa'any.

²¹Mëtu'uk: ntsojkpyës etsës xyajtso'okëty ets këtiis nëkoo xy'ëk'ëtsë'k xy'ëk'aja'awënëty.

²²Mëmäjtsk: mëkajpxkës ets n'ëtsowëty, ëkë oyës jëyëjp nkajpxëty ets mijts m'ëtsowëty.

²³Tuk'ëwa'anëkës, ¿tiijës npoky'äjtyp ets tiijës të ntuuntëkoy? ¿maas të nyajja'ay'ooky?

²⁴¿Wi'ix ko je'eyë mnäyu'ts mnäkyiiyënë? ¿Wi'ix ko jëtu'un mnäpyëjktakënë mëët ëjts tä jeexyë xymyëtsip'atyënës?

²⁵Ëjts jëtu'unës tä tu'uk yë aaykyëta'akën mëti'ipë pojjëtijtpën, ¿wi'ix ko ënät xyajkutëkoyä'änyës? Ëjts aay pu'uxmës yë'ë, ¿wi'ix ko xy'ixjëtity xypyajëtityës?

²⁶Ëxëëkëm yë aaw ayuk mijts xytyuknipëtsëmyës; yi'iyës janaam jatsojk xy'amëtoop wi'ixës të ntuuntëkoyën winë koos të n'ëna'k'aty.

²⁷Atsumy teky tsyumyës xyaj'ijtnë mëët yë pujxntä'äky, koos muum nnëjkxy, jëtu'unës xy'ix'ixy xypya'ixy ets je'eyës xy'ixy xytyuny maas muum najtswa'akë.

²⁸Wäänjaty yë njot nini'kxës nyëjënuunë ko të pyutsta'ay, jëtu'un tä witën mëti'ipë tëë pyu'tnën.