Read Biblia Mixe de Quetzaltepec Job 14 Bible Online

Job 14 - Biblia Mixe de Quetzaltepec bible

Job 14

¹Yë naaxwiinyëtë ja'ay mëti'ipë to'oxytyëjk të yajminy të yajke'exyën, wäänë jyuuky'äty ets ko jyuuky'äty, je'eyë amay jotmay tmëët'aty.

²Jëtu'un tä pëjyën mëti'ipë pëjwa'kxpën ets poj'am xyootsy; najxp ets tëkoopy yë'ë tä äpkën.

³Tääpë ja'ay yë'ë ëxëëk xy'ixy ets tëë xynyi'ëën xynyipëjktsowë.

⁴Ni pën tkayajpëtsëmëty yë wa'atspë ma mëti'ipë ëxëëkën.

⁵Pën mijts myajkutujkpy jënu'un yë ja'ay xyajjuuky'ata'any ets tëë xypyëjktä'äky tu'uk yë tsëpa'an mëti'ipë ka'ap tniwa'knaxëtyën,

⁶këtii xyajjotkëxy wä'än tjuuky'äty ijxtëm mëpaat jyotkujk'atyën; wä'än tukxoontä'äky yë juukyajtën mëti'ipë nyitu'un nyiye'eyëpën.

⁷Ko tu'uk yë kepy yajpuxy, tam käjpxy y'ënä'äny ko jiitsëp jatëkok ets ko yoonë'ëkëp wiinkpë mutskpë.

⁸Oy jënu'un yë tyikts të myëjaawnë ets tëë jya'ixpu'tutnë,

⁹ko ënäty nyëëpa'tpëyë'ëkë, jotkujk nyäjyawëja'anyë ets jatëkok tsyuxkëja'any; jëtu'un jyiitsa'any tä jeexyë y'u'unk'atyën.

¹⁰E yë naaxwiinyëtë ja'ay ko y'ooky, tii y'ëktsooy'atëp; ko y'ooky ¿maa nyijkxy?

¹¹Oy yë mëjmejy pyuxykyë'ëkëty ets oy yë mëjnëë tsyë'ëtsëty;

¹²ma jyää'atynyëmën yë tsajp, yë o'kpë ka'ap tjëkyepy jap pyëtsëmëty jyutjoty ets ka'ap nijëna'a myä'äywyijëty.

¹³Ja'ënaanpës jeexyë jap näyu'utyës ma o'kpë y'itën etsës jeexyë jap n'ëwxity, koonëm yë mtsip m'äkë nyaxëty ets kë'ëm xynyikajpxëty jëna'a jatëkok xyjyä'ämyätsa'any.

¹⁴Ko tu'uk yë ja'ay y'ooky, ¿wä'än jëtää jatëkok jyuuky'ajtwinpityë? ko jeexyë y'ëkjëtu'unëty, n'ëwxijtypyës jeexyë mapaat xytyukka'ayës tsyo'okëty ja mpëjkënës n'ijxënës.

¹⁵Koos jeexyë xymyëkäjpxy etsës n'ëtsowëty; mëëtës jeexyë tsojkën ja'awën xynyi''ijxkëtä'äky, jä'äxë ko mijts të xyajkojyës.

¹⁶Tyam maas je'eyë xy'ix'ixy xypya'ixyën wi'ixës nnaxy ntëkën, ko jeexyë y'ëkjëtu'un'aty ka'apës jeexyë nnëë mpoky xy'ijxë;

¹⁷mja'atyëkoopy jeexyë yë nnëë npokyës ets myajwatsyp jeexyë njot nwinma'anyës.

¹⁸Yë'ëpaat yë tun kopk jyity ets tsaatun jyijtma'aty.

¹⁹Jëtu'un tä yë nëë tjepyën yë tsaa ets tuu tyajwinpajë'ëtyën yë naaxway, jëtu'un xytyuny yë naaxwiinyëtë ja'ay yë jyuukyajtën.

²⁰Wa'ats xyjyijtë'kta'ay ets xëmëkyëjxm jëtu'un wyi'imy, myajjëwä'kpy jam ma y'ityën ets ëtyä'äkyë'äämpy myä'äty.

²¹Ko yë y'u'unk y'ëna'k mëj'äämpy ja'ay myëët'atëtë yë'ë ka'ap t'ëknija'awënë; ko yë y'u'unk y'ëna'k y'ëyo'onpaatë näy ka'ap tnijawë;

²²yi'iyë jyaak ja'awëp yë pyëjkën y'ato'onën ets wi'ix yë jyot wyinma'any y'ëyoy jyotëkoyën.