Read Biblia Mixe de Quetzaltepec Job 16 Bible Online

Job 16 - Biblia Mixe de Quetzaltepec bible

Job 16

¹Ëjts tëëjës jëtu'unpë ntyäty myëtoowyujnë. Miitsëty je'eyës nëkoo xyajjotkëxtë, ka'ap yë'ëkyëjxmëty të mintë etsës xyajjotkujkëja'antë.

³¿Këtii jëtää tjëkyepy ëxëëkpë aaw ayuk nijëna'a kyutëkoytyë? ¿Tii winma'any tääpë xyajnätyijëtë? Ko aak wiink xymyëtowtë ja aaw ayuk mëti'ipës nkäjpxypën.

⁴Ko jeexyë miits jëtu'un m'ëk jat m'ëk këpätë tääjës yamën, näjyëtu'unës jeexyë nkäjpxy tä mkajpxtën; je'eyës jeexyë nkëpajk njëpipy etsës jeexyë n'axiktu'uty, nëkooyës jeexyë n'ëëwnë nkajpxnë,

⁵oypyë aaw ayuk mëti'ipë yajjotkujkëpën, mëti'ipë oy yajmëtoopën ets jeexyë njotmëkmo'otë ets jeexyë nyajjotkujkëtë.

⁶E ëjts oyës jënu'un nkajpxëty ka'apës yë npa'am myony ets oyës nja'ëmoonpë ka'apës yë npëjkën n'ijxën tsyo'oky.

⁷Tios të tyajkëxy të tyajnaxy yë nmëjaawës; tëëjës xypyëjkë ja nmëku'uktëjkës mëti'ipës ijty mëët oy nämyäyën

⁸etsës të xypyëjktä'äky pujxn tëkoty. Tëkatsyës të xynyi'ëënë; ka'ap myëtëyëty ijxtëmës yë npoky të xy'ixtaayën.

⁹Tiosës xy'ixjëtijtp xypyajëtijtp ets jëtu'unës xyjyatim tyuknukëja'any, jëtu'unës xynyipëtë'ëky tä kaajën, koos xywyintë'kxy jëtu'un yaj'ixy xytyimtsu'utsaanpës yowë tääjës yë nmëtsipën.

¹⁰Aak xynyipëtë'knëpës yë ja'ay, aak xytyuk'ijxtëpës yë wyiin jyëjpëty etsës xy'amëkoxëtë, nijënu'unës pën mëj xykya'ixy.

¹¹Tiosës të xypyëjktä'äky ma ja'ay ëxëëk jyä'äy'atën ets ma ja'ayëtyën mëti'ipë yajja'ay'o'ktëpën.

¹²Ëjts jotkujkës ënäty nyajpaaty koos të xyo'kmëmatsë; yajxonës yë nyo'kn të xyaj'anojkëyë, tëëjës xytyijy xywyexy. Ko të tyi'pxë'ëky jam të tnajtsti'pxë maas ëjtsën.

¹³Xiitsow yaatsow muum xytyi'pxtës; nijënu'unës xykyapa'ëyowtë oyës yë njot nini'kx xytyukjë'pnajxëtë, yë ntiintyës jëtu'unyë naaxkëjxy jyënaankëtä'äky.

¹⁴Xiitsow yaatsowës yë njot nini'kx xyajtsëtyujtëtë, jëtu'unës xynyipëtë'ëktë tä tu'uk yë tsiptuunpë tnipëtë'ëkyën yë myëku'uk.

¹⁵Mon tukës yë nwit të nätyukxoxyë, mëti'ipë kuump u'kxpën etsës të nkutijë yë nkëpajk jap naaxwayjoty.

¹⁶Ki'ix tsa'amës yë nwiin njëjp kyëxë'knë koos një'ëy nyä'äxy ets ka'apës oy n'ëk'ijxnë,

¹⁷oyës ka'ap pën të nmëtëkoy ets xëmës mëtëy të nyajnaxy yë nu'kxtakën.

¹⁸Mëët ijxtëmës yam o'ktëy njaty nkëpetyën, yë'ëjës n'amëtoopy etsës nyajnipaye'eyëty; naax, këtii jëtu'unyë xyajnitukëty yë një'ëyënës nyaxënës.

¹⁹Oy tyimtu'ukënëty jyam'atëty tsajpjotm mëti'ipës mëpaat xypyukajpxën,

²⁰mëti'ipë kyajpxwa'atsëpën ma Tiosën ëjts yë njot nwinma'any ets t'ixëty wi'ixës një'ëy nyä'äxyën;

²¹mëti'ipës xynyikajpxtu'utëpën, ijxtëm yë ja'ay nyänyikajpxtu'utyën ma muum të yajni'ëënën.

²²Ëjts wäänës yë nxëëw njëmëjt jyaak wë'ëmy, tyimpatyp maas ëjts yaa ntsoona'anyën.