Read Biblia Mixe de Quetzaltepec Job 2 Bible Online

Job 2 - Biblia Mixe de Quetzaltepec bible

Job 2

¹Ko tpaty ja xëëw po'o jëna'a ja tsajpjotmëtë kukäjpxy myina'antën jam ma ja Wintsënën, ojts näjyëtu'un jam myiny ja tsajpjotmëtë kukäjpxy mëti'ipë ni'ë'ënëpën.

²Tä ja Wintsën yajtëëwë: ¿Maa mtsoony? Tä ja tsajpjotmëtë kukäjpxy mëti'ipë ni'ë'ënëpën y'ëtsooy: Naaxwiinyëtë ojts të n'aye'eyës.

³Ënät ja Wintsën y'ënëmaayë: ¿M'ixy'äjtyp yë Job mëti'ipës ntuunpë'ajtypyënë? Nimaa ja'ay jëtu'unpë kyaka'ty tä yë'ëjën naaxwiiny naaxkëjxy, mëti'ipës oy xymyëtuunpën ets mëti'ipë tëy tëtä'äky juukyajtpën, mëtëy winë tuny ets nitii tëko'oyën tkamëëtëty, aak'oy jyiiky myëku'uk tjawë. Oy ëxëëk të xyjatuny ets të xyaj'ëyo'onpaaty ets ka'ap tii poky tmëëtëty, yë'ë mëk yë wyinma'any tmajts'ity ets ka'ap maa tyëkoy.

⁴E ja tsajpjotmëtë kukäjpxy mëti'ipë ni'ë'ënëpën jëtu'un ja Wintsën t'ëtsooy: Ko ja'ay ka'ap tii jyäty kyëpetyë oy xëmë nyäjyawëty. Yë ja'ay nyajts'ijxëtyääpy oytyiijëty mëti'ipë myëët'ajtypyën, nëkoo ko kë'ëm nyäyajtso'okyë.

⁵E yë'ë ko wi'ix xy'ëktunëty ma jyot nyini'kxën, tä xy'ëk'ixëty wi'ix mpokyën.

⁶Ënät ja Wintsën t'ëtsooy ja tsajpjotmëtë kukäjpxy mëti'ipë ni'ë'ënëpën: Oy xy'ëk'ixjmatsëty. Tun tii mtunäämpy mëët yë Job yë jyuukyajtën, je'eyëp tëy ko këtii xyaj'ookëty.

⁷Ënät ja tsajpjotmëtë kukäjpxy mëti'ipë ni'ë'ënëpën jam tsyo'ony ma Wintsënën ets tuknikejxy ja Job ja yuu pa'am. Ënätyë Job tyukpëtsëëmtaayë xi'ipyë pa'am.

⁸Ënät ja Job jam nyaaxwe'tsy ma pu'uxm niko'owpety y'ityën. Jam tpaty yë tu'ts apu'u, yë'ëts nätyukjäjpëp ko tyäty xyi'ipyë.

⁹E ja tyo'oxytyëjk jëtu'un y'ënëmaayë: ¿Wi'ix ko janty'oy mnäypyëjktä'äkyë ets oy ja'ay mnäyajnaxyë? Nikë tim pok yë Tios ets m'ookëty.

¹⁰Ënät ja Job y'ëtsooy: Mijts to'oxytyëjk, këtii nëkoo ëxëëkjaty m'ëna'any. Pën ëëtsajtëm nkupëjkëm mëti'ipë Tios xymyo'oyëmën, ¿wi'ix ko ënät ka'ap nkupëjkmëty ko ëxëëk xytyu'unmëty? Ëxëëk ojts jyäty kyëpety yë Job, e yë'ë kä'äpyëm tmëtëkooy yë Wintsën mëët yë myä'äyën tyajën ets mëët yë y'aaw y'ayuk.

¹¹Tam ijty yë Job tmëët'aty yë myëku'uktëjk mëti'ipë mëët oy nyämyäyën, jä'ä xyëëwajtëp: Elifaz, jam tsyëënë Temán; yë Bildad, jam tsyëënë Súah ets Sofar, jam tsyëënë Naamát. Ko tnija'awëtyë ko tëë Job ja yuu pa'am pyäätyë, ënät ojts tninëjkxtë ets tjämyëët'ata'antë ma jam pyikyë y'ixyën.

¹²Jëkäm t'ijxpatë ja Job ets tyëjkëtyë jëëpyë yaxpë, mëk tjawëtë ko ja Job yajpaaty yuujoty pa'amjoty, paaty ja wyit tkë'tstëëwtë ets nyätyukupëjkëtë ja naaxway.

¹³Jam näjyëtu'un nyaaxwä'tstë ma ja Job y'u'unyën. Wëxtujk xëëw wëxtujk tsu'um jam y'ënyääytyë. Ni tu'k aaw pën kyakäjpxy, jä'ä ko y'ijxtëp ko Job mëk pyikyë.