Read Biblia Mixe de Quetzaltepec Job 20 Bible Online

Job 20 - Biblia Mixe de Quetzaltepec bible

Job 20

¹Mijts ka'apës xyajjotkujk'aty ets jëtu'unës njawë myajkëjxyp yowë yë nmä'kxtujkënës; paaty yam n'ëtsoowinpita'any.

³Mijts je'eyës xynyipëtë'ëky, je'eyëp ko tëëjës yam winma'any npaaty wi'ix n'ëtsowa'anyën.

⁴Mijts mnija'ap ko xëmë jëtu'un jyäty kyëpety, maju'unëm tsyo'ontä'äkyën yë naaxwiinyëtë;

⁵yë ëxëëkja'aytyëjk yë xyoontakënëty wäänë pyo'oxy; tsojkyë yë jyotkujk'ajtkojtë.

⁶Oy jëtu'un jyakëjxmëty tä tsajpën ets jampaat yë kyëpajk jyatimjyä'ty yootsjotm,

⁷jëtu'un kyëxa'any të'ënyën, yë myëku'uktëjk mëti'ipë ënäty mëët të nyämyäyë ka'ap nëjkx tnijawëtë maa ënäty të kyukëxë.

⁸Jëtu'un yaj'ijxtëkoyä'äny tä kuma'ayën, tä tii koots yaj'ixyën ets ka'ap pën tpaaty.

⁹Pënjaty të tsyëënëtën mëët yë'ë ets të t'ixtë, ka'ap t'ëk'ixanëtë.

¹⁰Yë y'u'unk y'ëna'k kopkpëky ko nëjkx jatëkok tmooytya'atë ja ëyoowpëja'aytyëjk mëti'ipë ënäty yë'ë të tmeetsyën.

¹¹Ma ënäty yajxon të myëjaawtëkën ets y'ëna'k'atyën jää nëjkx jyëjptä'äky jap naaxpa'tkë'p.

¹²Janty xu'kx yë ëxëëkpë tjawë ets jëtu'un yë wyiin y'aaw twe'eynyë;

¹³jeky jap y'aawjoty tpu'uy'ity ets ëtyä'äkyë'äämpy tkujë'ënaxy.

¹⁴E ko jap jyootjoty kyëtä'äky jëtu'un jap y'awinpity tä yë tsa'any yë xyëwätën.

¹⁵Jëtu'un t'ix'ë'tsta'ay ja wit meeny mëti'ipë ja myëku'uk atsip të tpëjkën; Tios jap jyu'typ jyootjoty.

¹⁶Yë'ë tsa'any yë xyëwät të twinmu'kë ets yë'ë yaj'ookanëp.

¹⁷Ka'ap tukxoonta'aka'any oy ënäty may jyajää'aty ja tsi'tsknëë ets ja uuxpa'ak; oy ënäty jëtu'un jyatimpyëyë'kpë tä mëjnëëjën.

¹⁸Tëkokyë mëti'ipë të tjapaatyën nëjkxëp tyajkta'ay; ka'ap nëjkx tyajtuny ets ka'ap nëjkx tukxony tuk'ity ja wyit myeeny.

¹⁹Ojts nanëkookyëjxm tyajmëtuny tyaj'ëyoy yë ëyoopëja'ay; ojts tjä'äniwa'any ja jëën tëjk mëti'ipë ënäty ka'ap yë'ë të tkojyën.

²⁰Ka'ap ijty nijëna'a kyu'uxyë, ka'ap ijty tii tukjotkëtä'äky, ni'ikyë winë tmaytsyoky;

²¹Aak tyimwinpëjkmujktääpy ijty winë. Paatykyëjxm ka'ap pyoxa'any yë xyoontakën.

²²Ma ënäty nëkooyë ja wit meeny tpatnën, ni'ik jää kyëjääjëja'any ja jyotmay; jä'ä ko yë ëxëëkja'aytyëjk jää nëjkx ëxëëk tyunyë.

²³Ko ënäty y'ënä'äny tyaj'utsa'any yë jyot, jää nëjkx yë Tios tyukjoot'anpëkyë ets nëjkx ma yë'ëjën yë tsyip y'äkë tyajnajxta'ay.

²⁴Ko tjakukä'äkëty tu'uk yë juunpujxn, yë tsuxkpujxn nëjkx nyaspaatëty.

²⁵Yë ti'pxn nëjkx tyukjë'pnaxyë yë jyot nyini'kx ets jap nëjkx ja ti'pxn jëjp nyäxy ma xyo'otën. Yaxon nëjkx tsyë'ëkë;

²⁶akootstuuy wyë'ëma'any. Jëën nëjkx yajkëxyë mëët yë jyëën tyëjk ets y'u'unk y'ëna'k.

²⁷Tsajp nëjkx yë nyëë pyoky nyikajpxëty ets naax yë'ë nëjkx nyi'ëënëty.

²⁸Ko ënäty ja Tios ja tsyip y'äkë tyukëtä'äkyë tä nëëkomën, jää nëjkx y'atëkooytyä'äy yë wyit myeeny.

²⁹Yë'ë ya'atë Tios të tuknipëjktaakë yë ëxëëkja'aytyëjk; jëtu'un jyata'any kyëpäta'any.