Read Biblia Mixe de Quetzaltepec Job 30 Bible Online

Job 30 - Biblia Mixe de Quetzaltepec bible

Job 30

¹Tyam je'eyës xytyukxi'iktë yë ëna'ktëjkëty mëti'ipës ka'ap mëët ntu'knaxëtyën, mëti'ipës jeexyë ka'ap të nkupëkyën ets jam yë tyeety yajpaatëty maa ja uk tkëwent'atyën ja nkupixynyës.

²¿Tiis nyajwa'anëty, oy jënu'un yë mëjaaw tjamëët'atëty ma kyë'ëjëtyën? Yë'ëjëty tëë ënäty y'ënu'kxëtyääynyëtë

³mëët ja yuu xëëw ets ja amay jotmay. Ko ijty kyoots'aty jää ijty nyëjkxtë jam të'ëts'itjotm ets tjë'kxtë yë ujts tikts mëti'ipë tëë tyëtsnën;

⁴yë'ëpaat ijty yë ta'am ujts tjë'kxnëtë äämjyotypë yonyën ets yë'ëpaat yë ujts tikts.

⁵Ka'ap ijty tääpë ja'ay pën tsyokëtë, je'eyë ijty yaj'ixjëtit yajpajëtitë, jëtu'un tä ja'ay mä'tspë tpapo'oyën;

⁶jam ijty nëjkx nyäyu'utsëtë aankjoty, jam muum ja'awjoty ets tsaajoty;

⁷jëyujkën ijty ya'axtë jyoktë aayjoty ujtsjoty, ma yajpaatën yu'utsy kë'ëy.

⁸Ka'ap tii tuntë, ka'ap pën tyeety tyaakëty, ka'ap pën tsyokëtë ma naax kajpnën.

⁹Tyam je'eyë xynyëxi'ik xytyukxi'iktës, je'eyë tyajxi'iky kyojtë yë njuukyajtënës.

¹⁰Je'eyës xyëëk'ajnëtë ets mëpaatëpës xywyintsujjë'knëtë.

¹¹Tyam maas nyajpaatyën ëyoop jotëkoopy ets jëtu'un tä tu'uk yë tsiptuunpën mëti'ipë tëë yajpëjkën mëti'ipë myëtsiptuunpyën, tyam ka'apës xy'ëkwinkutsë'kënëtë.

¹²May nyämyukëtë npë'aayës etsës xynyajtstijëtë, etsës xy'ëtuktë, ja ënantëp jeexyë n'ookyës.

¹³Xyajtu'u'ëtujktëpës, etsës xyaj'atëkoya'antë, ni pën tka''akajpxtuky këtiipë jeexyë jëtu'un y'ëtë'ëtstë.

¹⁴Jëtu'un muum xynyipëtsëmtës tä jeexyë muum potsyjutjoty myäypëtsëmtën amuup.

¹⁵Tëës ja ëyo'on jotmay xytyukja'ty; ja njuukyajtënës mëti'ipë tsoowpatpën jëtu'un të wyimpapojy pu'uxmën; ja njotkujk'ajtënës, jëtu'un pyojnaxy yootsën.

¹⁶Ëjts tëëjës n'ënu'kxënë mëët ya'atë juukyajtën; ja ëyo'on jotmay yë'ëjës të xymyëmëtä'äky.

¹⁷Yë'ëpaatës nja'awënë pyëjkë'knë yë nwaay npajkës, tu'ktsu'um yajxon pyiky.

¹⁸Yë'ëjës yë Tios të xyo'kmëmatsë ets amëjaawës yë nwit të xymyajtsë.

¹⁹Tëës xymyo'onts kujëpipy, jëtu'un tä yë naaxway ets jaam nyëëkuxityën.

²⁰Nja''amëtoopy yë näypyutëkë mijts Tios ets ka'apës xy'ëtsoy, njamënu'kxtäkpy ets ka'apës xytyunyë këwentë.

²¹Ëwa'an të m'awinpijnë mëët ëjts, amëjaawës xypyajjëtijnë.

²²Mijts myajkutujkpy etsës yë mëkpoj xyajpojjë'ëkëty, etsës xywyinxitëty yë mëktuupoj.

²³Nnija'apës ko mijts xyaj'ookaanpës, ma kyukëxëtën mëti'ipë juuky'ajtëpën.

²⁴¿Ti këtiis të nputëkë yë ëyoowpë ja'ayë ets të mputëkës mëti'ipë ëxëëk jajtp këpäjtpënë?

²⁵¿Ti këtiis të niyä'äxy mëti'ipë o'ktëy jajtpënë ets ka'apës të npa'ëyoy mëti'ipë winë yajmëyäjtypyënë?

²⁶Ëjts xoontakënës ënäty n'ëwxijtyp, ëyo'onës të xytyukkëtä'äky; të'kxën jajën ënäty njëjp'ijxypyës, kootsajtën të xynyija'tyës.

²⁷Xijt xijtnë yë njuukyjotës y'ëti'itsy, ka'ap pyo'kxy; jëpom jëpomës je'eyë një'ëy nyä'äxy.

²⁸Mon tukës njuuky'äty, ka'apës n'ëkxëëwnijajnë; aak nja''amëtoopyës ja'ay näypyutëkë.

²⁹Jëtu'unës ëjts nyaj'ijxnë, wax yowë mëët ntu'kä'äxëtyës, ëkë paatutk yowë mëët oy nämyäyës.

³⁰Yëkëm je'eyë yë nini'kxës të jyajnë, je'eyë tyooynyë jyäämnë yë njot nkëpajkës mëët yë mëk jëën.

³¹Yë ëëpë koopë ets xuxën wojpën, jë'ëyën yaxën të y'awinpijnë maas ëjtsën.