Read Biblia Mixe de Quetzaltepec Job 36 Bible Online

Job 36 - Biblia Mixe de Quetzaltepec bible

Job 36

¹Wäänë mjaakmä'kxtukëty, tyam nyaj'ijxpëka'any, tyamnëmës yë aaw ayuk njaakmëëtëty mëti'ipës yë Tios ntukpukajpxëjäämpyën.

³Yë'ëjës yam nyajtuunkpaatäämpy yë n'ijxpëky'ajtënës ets nyajnikëxë'ëka'anyës ko yë Kojpë Ma'kxpë myëët'ajtyp yë tëyajtën.

⁴Tyam yajxon n'ënëëmë ko ka'apës yam yë'ëjëty nikajpxa'any ka'apë tyiyëtyën; yë'ë yam të mwinkuwa'akëty yë ja'ay mëti'ipë ixpëkyën ets tëë ixpëkyajtën nyitëjkëyënë.

⁵Tios maaytyääyëp winë, ixpëky ets ka'ap t'ixtijy mëti'ipë ka'ap tii të tuuntëkoyën.

⁶Ka'ap tnimä'kxë yë jyuukyajtën yë ëxëëk ja'ay, nyipaye'epy yë ëyoopëja'ay;

⁷xëmë tkuwa'any yë ja'ay mëti'ipë mëtëy juuky'ajtëpën; yë'ë pyëjktäkpy yë yajkutujkpë jam ma kutujktaknën ets yë'ë jeky yaj'ëne'empy.

⁸E pën yë'ëjëty kutsumy kuxotsy y'itë mëët yë pujxntejpxy ets y'ëyowtë mëët yë pa'am ëyo'on.

⁹Yë Tios tuk'ijxëtëp wi'ix muum tii tëkatsy të tuntën ets wi'ix amëj akëjxm të nyäyajnaxëtën.

¹⁰Yë'ëkyëjxm myëkajpxëtë ets tyaj'oyëtëty yë wyinma'anyëty këtiipë ëxëëkpë t'ëktuunëtëty.

¹¹Pën yë'ëjëty ja'akyujkëtëp ets pën mëtoowtëp, oy xoontä'äky jyuuky'ata'antë.

¹²E ko yë'ëjëty ka'ap jyä'äkyukëtëty ookantëp yë'ë ets ka'ap nëjkx tnijawëtë wi'ix ënäty të jyuuky'atën.

¹³Yë ëxëëkja'aytyëjk nëkooyë jyänty jyoot'anpëktë, oy jyayajtsumy jyayajmatstë ka'ap t'amëtowtë putëjkën.

¹⁴Ëna'knëm y'ooktë; wintsëtyu'un jëjptsëtyu'un yë jyuukyajtën kyëxtë.

¹⁵Mëët yë ëyo'on jotmay Tios tyajtso'oky yë ja'ay mëti'ipë ëyoopën; mëët yë pëjkën ijxën tyajja'akyukë.

¹⁶Mijts ojts myajtso'okyë o'kënjëjp'am, may'äämpy winë mmooyë ets myaj'ëwaatsëpëtsëëmë; ujts të tyaj'ity yë mkaaytyakn mëët yë jë'kxy pëky.

¹⁷E mijts ni'ikyë yë ëxëëk ja'ay të xypyukajpxë, tä jeexyë mijts m'ëna'anyën ko kopkpëky ko yë ëxëëkja'aytyëjk yajtëytyuntëty.

¹⁸Mëk yë mjuukyajtën xykyëwent'atëty ets këtii nëkoo wit meeny mnätyukwin'ëënëtëty, këtii yë wit meeny yë'ë may xytsyojkën'atëty.

¹⁹Ka'ap kyëwentëtëkë oy jënu'un mya'axëty mjokëty ma jam mpëkyë m'atonyën ets oy jënu'un mëk'ajtën kutujkën xyjyamëëtëty.

²⁰Këtii yë kootsajtën xy'atsokëty, ma ja kajpnën mëti'ipë atëkoopyën.

²¹Näkyëwent'atët këtiipë xy'ëkniwinpijtnëty ja ëxëëkpë, mijts ma të myajtuk'awijtsë'ëkyën ja ëyo'on jotmay.

²²Ix, wi'ix yë Wintsën yë myëj'ajtën kyutujkën kyëjääjëty. Nitu'uk yë ja'ay mëti'ipë yaj'ijxpëjkpën kyajëtu'unëty tä yë'ëjën;

²³ka'ap tjëkyepy ni pën tyuk'ëwaanëtëty tii tyunëpën, ka'ap tjëkyepy pën tyukwinmëtowëtëty tii tëkatsy tyuunpyën.

²⁴Tëkokyë yë ja'ay aak'oy nyänyikäjpxyë winë të tuny; ja'amyäts näjyëtu'un ko mijts oy ijty mnänyimëtyä'äkyë.

²⁵Yë'ë aak y'ijxtääpy yë ja'ay, oy jënu'un jyëkämëty.

²⁶Tios nëkooyë myëj'ajnë, tsip ets nja'akyujkëmëty; ka'ap tjëkyepy nmëtyo'owmëty yë jyëmëjt.

²⁷Maajëty yë muum twinpëjkmuky yë nëë tu'ktsunyjyäty ets tyajtu'uy.

²⁸Yë nëë tuu ëtyä'äkyë'äämpy jam yootsjotm tsyoony, ko kyëtaknë ma ja'ayën nëkooyë kyomtuunë.

²⁹¿Pën y'ëkja'akyujkëp wi'ix yë yoots ye'eyën ets wi'ix yë ënääw y'ëti'itsy y'ënä'änyën?

³⁰Yë'ë Tios yajja'ajtäkpy yë wëtsuk ma mëjmejyën ets tyajkootsë juuky myejy'itkujky.

³¹Jëtu'un yë naax kajpn tyajjuuky'äty tyajtsuxk'aty ets tmo'oy yë kyä'äyën y'ukën yë ja'ay mëjwiin këjää.

³²Jap kyë'ëjoty tmajts'ity yë wëtsuk ets ko tnajtsmatsë tëyë jam tyajja'ty ma të tuknipëjktaakën.

³³Yë wëtsuk yë'ë nyikäjpxyp ko jyääjëty yë Tios ets tuupoj yë'ë nyikäjpxyp ko yë Tios joot'anpëjkp yë'ë.