Read Biblia Mixe de Quetzaltepec Job 38 Bible Online

Job 38 - Biblia Mixe de Quetzaltepec bible

Job 38

¹Ënät ja Tios t'ëtsoowinpijty ja Job mëët ja mëktuupoj.

²¿Mpën mijts ets xyajnipäxëtëkëty ja nmëj'ajtënës ets xyajnikëxë'ëkëty ja mtsuu'at ma ja m'aaw m'ayukën?

³Tuk'ijxkës mijts ja mjotmëk'ajtën ets ëtsoowinpit ya'atë yajtë'ëwën mëti'ipës yam ntunäämpyën:

⁴¿Maa ënäty mijts myajpaaty koos ojts yë naaxwiinyëtë nyajkojy? Tuk'ëwa'anëkës, pën mijts mjanty nyija'ap winë.

⁵¿Mnija'ap pën ojts t'a'ixë jënu'un myëjwiin'atëty ets pën ojts tnikijpx nnitsa'atë?

⁶¿Maa wya'kta'atsyën? ¿Pën ojts tpëjktä'äky ja tsaa ma kyëxmëta'akëtyën,

⁷ma ënäty y'ëwtën mëët ja xoontakën ja maymyëtsa'a ko xyiinyë ma jam yajpaatën ja ntsajpjotmëtë kukexyës?

⁸Ko ojts nyiku'ëwa'atsy yë mëjmejy naaxwiinyëtë, ¿pën y'a'ijxëy mapaat nyaxëtyën?

⁹Yoots ojts ntukxoxyës ets nëma'a ojts ntuk'ixpityës.

¹⁰Ëjts ojts npëjktä'äkyës mapaat nyaxëtyën etsës nyaj'ëtujky mëët yë ëwatsn këtiipë tninaxëty ma të yajtuk'ënëëmën jya'tëty.

¹¹Etsës t'ënëmaay: Yaapaat mja'tëty ets ka'ap xynyinaxëty ma yam ntukni''ixën; yaa jëtu'un ye'etyëëwta'ajëty yë mnëë'o'pky mëti'ipë ëtëtsp ënaanpën.

¹²¿Tëë ja ënä'ämën xy'ëkyajkpë ma mjuuky'ätyën ets jyajjë'ëkëty ets xyiinyëtyë?

¹³¿Ets të'kxën jajën tukjajëtya'ajëty yë naaxwiinyëtë ets ëxëëkja'aytyëjk nyäyu'utsëtëtyë?

¹⁴Ënät ja tun kopk kyëxë'kta'ay ets tsaptsëm jyajtä'äky tä tu'uk yë tsaptswitën;

¹⁵ma ëxëëkja'aytyëjk ka'ap yajkutë'kxyën ets kyixy nyäxy ma je'eyë y'ëtsu'uxya'axtën.

¹⁶¿Tëë jap m'ëk ojtspë ma yu'utsy y'ityën ja jut, ma mëjmejy pyëtsimyën ja nyinëëjë?

¹⁷¿Tëë xy'ëk'ijxpë maa yajpaatyën ja nyitëjk'aaw ja akootstuuyajtën ma y'ityën ja o'kën tëko'oyënë?

¹⁸¿Mnija'ap jënu'un myëjëtyën yë naaxwiinyëtë? Tuk'ëwa'anëkës pën mnija'ap.

¹⁹¿Ma yajpëjkë'ëktë yë xëënyajtën ets kootsajtën?

²⁰¿Mnija'ap wi'ix xyajja'tëtyën mapaat jyëjpkëxyën yë naaxwiinyëtë? ¿Mnija'ap wi'ix jatëkok xyajwinpitëtyën ma y'ijtaknënë?

²¹Mijts kopkpëky yë xynyijawë, jä'ä ko tëë jeky mjuuky'äty, jä'ä ko mijts tëëyëp yë miinë naaxwiiny.

²²¿Tëë xy'ixy'ätyë maas npëjkë'ëkyën yë tsajp o'pky ets tëtsntuujë

²³mëti'ipës nkejxypyën koos yë ëyo'on nyaj'ity ets ko yë tsip käjpxy y'ityë?

²⁴¿Mëti'ipë tu'u nyëjkxtëp yë të'kxën jajën ko yajkäjxwa'kxtë? ¿Wi'ix yë poj ye'eywyä'kxy mëti'ipë tso'onpën ma xëëw pyëtsimyën?

²⁵¿Pën yajniku'ëwatsyp yë mëk komtuu ets tukni''ixë yë në'ë tu'u mëti'ipë kyuuynyëjkxëpën yë mëktuupoj,

²⁶ets jam të'ëts'itjotm tyu'ujëty, ma ka'ap pën tsyëënën,

²⁷ets tyu'ujëty ma y'anë'ëk tyëëtsë'ëkëtyën ets jam yë ujts myuxëty?

²⁸¿Pën yë nëë tuu ets maanik tyeety'äjtyp?

²⁹¿Pën yë tsajp o'pky ets tip tyaak'ajtyp?

³⁰¿Pën yë nëë yaj'awinpijtyp juun tä tsaajën ets tyajju'unta'ay yë mëjmejy?

³¹¿Mijts tu'ukyë myaj'ijtyp yë mëtsa'ayä'ämn ets xyajwä'kxy yë mëtsa'akë'ëk?

³²¿Mijts myajpëtsëëmpy yë jaayxyëëw ko xyiinyëjanë? ¿Mijts mtu'uwinwoopy yë maymyëtsa'a mëti'ipë yajtijpën Mëj osë ets Mutsk osë?

³³¿Mnija'ap yë ënä'ämën tëyajtën mëti'ipë tuunpën jam tsajpjotmë? ¿Mijts myajtuunpy ya'atë ënä'ämën naaxkëjxyë?

³⁴¿Mayëtëp xy'ënä'ämëty yë yoots ets myajnitukëtëty mëët yë komnëëjë?

³⁵Ko xy'ënä'ämëty yë xëëw awaxk ets muum nyasjajëty, ¿m'ëtsowëtëp, tyaajës jä'ä, tuk'ënä'ämkës tii mtsojkpy ntunëtyësë?

³⁶¿Pën të tmo'oy yë wijyajtën yë joon jëyujk?

³⁷¿Pën ni'ik wijy näjya'awëyëp ets nijawëty jënaak yë yoots yajpaaty? ¿Pën mayëtëp tyajtukwa'atsëty yë yoots ets tyajtu'ujëty,

³⁸ets naaxway y'awinpitëty mo'onts ets naaxmaj jyajta'ajëty?

³⁹¿Mijts yë kaataak m'ixtaayëp yë tsyu'utsy ets tsyu'utstëty yë y'u'unk ku'uxyë,

⁴⁰ko jap nyäyu'utsëtë ma y'ijtaknëtyën ets t'ëwxitë jap ujtsjoty jëna'a tii jëyujk y'ëknaxy mëti'ipë myatsäämpyënë?

⁴¹¿Pën yë wëëky yajë'kxyp ko yë y'u'unk y'ëna'k t'a'ixtayë ets je'eyë ya'axtë nyä'ämtë etsës nyajjë'kxtëtyë?