Read Biblia Mixe de Quetzaltepec Job 4 Bible Online

Job 4 - Biblia Mixe de Quetzaltepec bible

Job 4

¹Job, yajnija'ap ko mijts wiink jëtää xyjyawë ko pën m'atsipyë ets mne'emyë, je'eyëp ko yë'ë ntuk'ënëëmëjäämpy ko ka'ap tjëkyepy amonyë n'ijtmëty xëmë.

³Mijts myaj'ijxpëjkpy ijty yë ja'ay ets mjotkujkmooyp ijty mëti'ipë mon tuk yajpatpën,

⁴mijts myajpëtë'kpy ijty ja mëti'ipë këtaap këpijpën ets mëti'ipë këtawaanpën ka'ap ijty xy'a'ixë ets kyëtawëty;

⁵e tyam, ¿tii ko ënät ja mjot mwinma'any xyajtëkatsy, tii ko mtëkë kuma'ay kutajëpë ma të mtuka'ayën ja pëjkën ijxën?

⁶Mijts oy yë Tios xymyëtuny ets mëtëy winë të xytyuny, ¿wi'ix ko ënät xyajtëkoy ja mmëpëjkën?

⁷Mmëmay mmëtaj ets ja'amyäts pën tëë xypyanijawë ko yë wa'ats ja'aytyëjk o'ktëy jyatë kyëpätë.

⁸Ëjts yë'ëjës nija'ap, ko yë ja'ay mëti'ipë winë ëxëëk tyuunpy kyäjpxypën, nän ëxëëk jyäty kyëpety.

⁹Ko Tios tyukjoot'anpëkëtë, jëtu'un tyukëta'akëtë tä myëkpojyën ets yajkutëkoyëtë.

¹⁰Oy jënu'un jyamu'u jyaniitstë kaajën, Tios yë'ë yaj'ëmonanëtëp ko ënäty yë y'aaw tyëts mya'ta'atë.

¹¹Ets kaajën y'ooka'antë mëët ko ënäty të kyajë'kxypyaatë, jëtu'unyë ye'eytyëkoya'antë ja y'u'unkëty.

¹²Tëës yë aaw ayuk xynyija'ty ame'tsyë; oynu'unënës të nmëtoowkukë.

¹³Koots, tim je'eyës të nmanaxy täätsës të nwinkuma'ay etsës të n'amëkë.

¹⁴Yajxonës të ntsë'ëkë, jëtu'unës të nnäjyawëty tëëjës yowë yë npajk tsyëtyuuypyëjkta'ay.

¹⁵Jëtu'unës yë nwiin njëjp të njawë myëkë ets yajxonës yë ni'u'kxy të pyëtë'ktaaynyë.

¹⁶Ënätës tu'uk yë ja'ay të n'ixy jamës xywyintänë. Ka'apës oy të n'ijxwa'atsy, yi'iyë y'äpk të n'ijxës, wiink yaj'ixy. Amonyë y'ity etsës të nmëtoy tu'uk yë mëto'owën:

¹⁷¿Wä'än jëtää tu'uk yë naaxwiinyëtë ja'ay wa'ats y'ëkjuuky'atëtyë, wä'än jëtää ka'ap tii poky tuuntëkoyëty Tioswintuuyë?

¹⁸Yë'ëpaat yë tsajpjotmëtë kukäjpxy ka'ap oy tukjotkujk'aty, yë'ëpaat yë tsajpjotmëtë kukäjpxy tyëkoytyë,

¹⁹¿wi'ixpëm jëtää tu'uk yë naaxwiinyëtë ja'ay mëti'ipë ka'ap tii tkëjxmëtyën, mëti'ipë jëtu'un kojy mä'kxy ijtpën tä jëën tëjkën mëët yë mo'onts naaxwayjotypë kyojyëtyën ets kyutëkoyëty tä waanyën?

²⁰Ko jyopëp'aty oy yajpaaty e ko jyënäkyxyëëw'aty tëë nyajijnë; ko y'ooky xëmëkyëjxm tyëkoy ets ni pën kya'ëkja'amyäjtsënë.

²¹Jëtu'un yë jyuukyajtën jyäty tä tu'uk yë piity pyojtukyën; ko të jyuuky'äty oy jëtää winë të tjanijawëja'any, ko të y'o'knë ka'ap t'ëkpatnë ja nija'awën.