Read Biblia Mixe de Quetzaltepec Job 41 Bible Online

Job 41 - Biblia Mixe de Quetzaltepec bible

Job 41

¹¿Mxuyëp yë Leviatankë? ¿Jyëkyejpyën xytsyumëty yë yyä'än mëët tu'uk yë tejpxyë?

²¿Jyëkyejpy jap jyëjpjoty xytyijnaxëty yë tejpxy ëkë jap xytyijnaxëty yë xu'uny mëti'ipë ajo'knën ma y'äjkyënë?

³¿Ëkë m'ëwxijtypyën mënu'kxta'akëtëty ets xypya'ëyowëty, ëkë oy'aaw oy ayuk mtukmëkajpxëtëtyë?

⁴¿Ëkë m'ënë'ëmxëtëty ko jyëkyejpy mmëtunëtëty kë'ëyxyëëw kë'ëyjyëmëjt oy ka'ap xymyëjuyëty mapaat jyuuky'atyënë?

⁵¿Jyëkyejpy xytyuk'ëyë'ëk xytyukkëyätëty tä tu'uk joonënë? ¿Jyëkyejpy xyo'ktsumëty tä yë mnëëx yë y'i'k xytyuumënë?

⁶¿Jyëkyejpy mëktä'äky xy'amëtowëty jënu'un tsyowën jap ma tyookyënë? ¿Jyëkyejpy wäänjaty xytsyujkta'akëty ets xytyookëtyë?

⁷¿Jyëkyejpy xytyukti'pxnaxëty, ëkë xykyuti'pxë'ëkëty ma kyëpajkën mëët yë ti'pxnë?

⁸Ko xykyë'ënixajëty ëxëëk mtunëtëty ets ka'ap xyjyä'äytyëkoyëty ets m'ëna'anëp ko ka'ap nijëna'a xy'ëktoonëty.

⁹Yë Leviatán je'eyë yaj'ixy tääts ntsë'këmëty.

¹⁰Ko nëkooyë pën myëmayëty, ëxëëk yë jyoot'anpëky; ka'ap tjëkyepy pën wyinkuwa'akëtëty.

¹¹¿Pën juuky ë'kwë'ëmëp, ko pën tmatsy? Ni pën.

¹²Ka'apës yam nikäjpxy yë tyeky ets jyot myëjaaw.

¹³¿Pën ëkmayëtëp tuknipëjktu'utëty yë y'ak mëti'ipë nyiwits'ajtypyën, ëkë ko pën tukuumnaxa'anëty yë mäjtsk nipätpë nyi'ak?

¹⁴¿Pën yë y'aaw y'ëk'yajwa'kxëp mëët ijxtëm yë tyëts jyëjpëtyën?

¹⁵Yë kyejky jëtu'un yë'ë tä jeexyë waatswitsy tmëët'atyën mëti'ipë nätyuk'akëëytyujkëpën, mëti'ipë tso'otsyën ets juunëty tä tsaajën.

¹⁶Yajxon juun nyämyätsyë, ka'ap maa poj nyäxy.

¹⁷Ta'tspëky yajxon, tsip ets pën tijwa'kxëty.

¹⁸Ko jyä'äntyixy jëtu'un yaj'ixy wëtsujkp yowë; yë wyiin jëtu'un yaj'ixy xëëw yowë pëtsëëmp ko xyiinyë.

¹⁹Ma y'aawën jëënyä'änkën kyëxë'ëky ets jëënpixkën jap pyëtsimy.

²⁰Ma jyëjpën jëënën jap yaj'ixy, jëtu'un tä jëënjut jyokyën ma jap winë nyi'ëëtsyën.

²¹Ko xyejy mëpaatëp yë jëën tyajmëjë, ma y'aawën jëënyä'änk jap pëtsëëmp.

²²Nëkooyë yë yo'k'uun jyuun'ajnë, aak tsë'ëkëyëp oypyënëty.

²³Yë'ëpaat yë nyini'kx mëti'ipë yaj'ijxpën aak xixy juun yajxon ets ka'ap tii tyuktëkëty, jëtu'un jyuunëty tä pujxnën tëëpë tsyooywyatsnën.

²⁴Yë jyuuky jot juun yajxon tä tsaajën, jëtu'un jyuunëty tä mëjtsaajën mëti'ipë ja'ay winë tyukmeepyën.

²⁵Ko pyëti'iky, yë'ëpaat yë tiostëjkëty tsyë'ëkëtë ets kyä'äktë.

²⁶Ka'ap ntukyaj'o'kmëty yë ku'umën, ti'pxn ets ka'tsn mëti'ipë pujxnën.

²⁷Jëtu'un t'ixy yë pujxn tä tu'ktëjy yë matsën ets tsuxkpujxn tä yë kepypyu'utyën.

²⁸Yë ti'pxn ka'ap tkuke'eky; ko yë tsaa yajtuknika'atsy jëtu'un tjawë pën yowë aaykyëta'ak tuknixijtëp.

²⁹Ko yë juunpujxn yajtukwopy, jëtu'un tjawë tä jeexyë tsajpkäpyny yajtuktijyu'kxyën; je'eyë tukxi'iky ko yë pujxn y'amu'uy.

³⁰Ko nyaaxwinpajëxoxy, tyim yajtukwatsyp yë naax, jëtu'un yaj'ixy tëë yowë nyaaxwooky këkpaat.

³¹Jap mejyjoty yaj'ë'tsyp yajkoompy yajmëtoy yë mejy; jëtu'un yajmëtoy yë mejy tyaj'ëëtsy tä jap jëënjoty tii nyi'ëëtsyën mëti'ipë ja'ay yajtukja'axpën.

³²Jëtu'un yaj'ixy jap mejyjoty poopëm y'atë'kxy tä yë ja'ay yë pyo'o kyëxë'ëkyën.

³³Ka'ap maa naaxwiiny naaxkëjxy jëtu'unpë jëyujk ets nitii jää kyaka'ty jëtu'unpë tä yë'ëjën; yë'ë jëtu'un ojts tyimkojy ets ka'ap tii tsë'ëkëty.

³⁴Wyinkuwa'këp mëti'ipë amëk jotmëk näjya'awëyëpën, yë'ë y'ënä'ämtääpy oy tyimmëti'ipë jëyujkëty ëwa'anëtypë.