Read Biblia Mixe de Quetzaltepec Job 42 Bible Online

Job 42 - Biblia Mixe de Quetzaltepec bible

Job 42

¹Ëjts nija'apës ko mijts mmaaytyääyëp winë ets ka'ap maa tii mëti'ipë ka'ap mmayëtëtyën.

³¿Ëjts pënës yë'ë, etsës n'ëna'anëty ko mijts ka'ap mmëjajtën xymyëëtëty ets nyajkëxë'ëkëtyës yë ntsuuwinma'anyës? Ëjts tëëjës winë nyajtëy mëti'ipës ka'ap oy të nja'akyukën, jä'ä ko jää yë winma'any mëj këjääpë mëti'ipë tsip yaja'akyukën.

⁴Mijts ojtsës xy'ënëëmë: Mëtoowit, tyam nmëmëtya'aka'any; yë'ë m'ëtsoowinpitëp ya'atë yajtë'ëwën.

⁵Ëjts je'eyës të nmëtoy ko mijts mjääjëty, tyamnëm ënät n'ixy mëëtës yë nwiin.

⁶Paaty yam ntukjootwinpity, maas yam n'u'unyën kuyjaamjoty ets naaxwayjoty.

⁷Ko yë Tios jëtu'un tmëkajpxtaay yë Job, ojts t'ënëëmë yë Elifaz: Tëës mijts xyajjoot'anpëky, tëëjës ntukjoot'anpëjkta'ay yë mëku'uktëjk mëti'ipë mëët oy mnämyäyën, jä'ä ko ka'ap tii tëy të xynyimëtya'aktë tääjës yë ntuunpën Job.

⁸Tyam yë'ë mënëjkxtë yë tsajpkaa, wëxtujk xymyënëjkxtëty ets wëxtujk yë kupixyny ayääkë jam ma Job yajpaatyën ets jam xyaktëty nino'oky nixämy tä tu'uk wintsë'kënën mëti'ipë mnatyukunaxëtëpën. Yë ntuunpës Job yë'ë mkënu'kxta'akanëtëp, nmëtoow'itäämpyës tä ënäty y'ënä'änyën ets ka'ap wi'ix ntuntëty; oy jëtää ka'ap mjanitëkëtë myajpokmyä'kxtëty jä'ä ko miitsëty ka'apës mëtëy të xynyimëtya'aktë, jëtu'un tä yë ntuunpënës Job.

⁹Ënät yë Elifaz, Bildad ets Sofar ojts jëtu'un tuntë tä ënäty yë Wintsën të tyuk'ënä'ämëtën, ja Wintsën ojts tmëtoow'ity wi'ix ja Job ojts Tios tmëkäjpxyën.

¹⁰Ko ja Job tkënu'kxtaay ja myëku'uktëjk mëti'ipë mëët oy nyämyäyën, ojts ja Tios myooywyimpijta'ayë ja jyotkujk'ajtën, ni'ik ojts myo'oyë, tëkëëkjëtu'un tä ja mëti'ipë ënäty të nmëët'atyën ko pya'tkë'p'ajty.

¹¹Ënät ja myëkä'äxtëjk, ye'etyëjkpë to'oxytyëjkpë, myëjëën myëtëjk ets mëti'ipë mëët nyäwyin'ixy'ätyën ojts nyimiinta'ajëtë, tu'uk ja xëëw tyaj'apatëtyë jam ma ja Job ja tyëjkën. Ojts myëmëtya'akëtë ets wyinxoon wyin'ijtëtë ko ënäty o'ktëy të jyäty të kyëpety, ko ënäty ja Wintsën ja ëyo'on jotmay të tyuknikexyë, tu'ukjaty ojts tmo'otë ja wit meeny ets pu'ts pujxnkë'ëjiits.

¹²Tios, ojts yë Job may winë tmo'oy ko jyaak jyuuky'äjty, ni'ik may këtiinëm tä ënäty të tmëët'atyën më''ëka'any. Majkmajkts mil ojts yë kupixyny tmëët'aty, tëtujk mil yë jëyujk jëku'ux, tu'uk mil yë tsajpkaa ets tu'uk mil yë krukts.

¹³Majkmajkts näjyëtu'un yë myaank y'ijty ets tëkëëk yë nyëëx.

¹⁴Ja mëjpë ja nyëëx Jemimá ijty xyëëwajtyp, ja mëmäjtskpë Quesiá ets ja mëtëkëëkpë Queren-hapuk.

¹⁵Yë Job janty'oy janty tsuj yë nyëëx kyëxë'ktë, kamaa ënäty jëtu'unpë to'oxytyëjk naaxwiinyëtë apëtsëmy y'oyëty tä yë'ëjëtyën. Yë tyeetyëty tu'knax ojts kyumayëtë tä ja yä'äy'ëna'këtyën.

¹⁶Jä'ä ojts yë Job ok jyaakjuuky'äty; mëko'px ja wëxtyikxy jyëmëjt ets ko ojts y'o'knë tëë ënäty yajxon myëjja'ayënë, ojts tjaak'ixy yë y'u'unk y'ëna'k, y'o'k u'unk y'ok'ëna'k ets ja y'u'unk y'ok.