Read Biblia Mixe de Quetzaltepec Job 5 Bible Online

Job 5 - Biblia Mixe de Quetzaltepec bible

Job 5

¹Mijts Job, oy jënu'un mya'axëty mjokëty. Yë'ëpaat yë tsajpjotmëtë kukäjpxy ka'ap m'ëtsowa'anyë.

²Ko xëmë je'eyë nmo'onmëty ntujkmëty ets nmä'ämyëty ntajmëty, nëkoopë yë'ë, tsojk nän yi'iyë nätyukyaj'o'këmëty.

³Tëës n'ixy wi'ix yë tsuuja'ay, kupoj ja'ay nyäpyutëkëtyën, je'eyëp ko jyëën tyëjk poj'am myä'äty.

⁴Yë y'u'unk y'ëna'k ni pën kyaputëkëty. Ko yë yajkutujkpëtëjk pyaye'exyëty yë pyoky, ni pën kyapukajpxëty.

⁵Jam ma kyam tyu'ujëtyën, oy tii tjayaj'itë, yë'ë jyë'kxtaaytyëp mëti'ipë yuu'o'këtëpën ets jap muum äpnyjoty pyëtsëmtë, mëti'ipë tëtsëtëpën ëxëëk y'ixëtë ko kyuwit kyumeenyëty.

⁶Yë ëxëëktu'un ëxëëk kajpxën ka'ap jyëtu'unëty myuxy tä aay ujtsën; yë ëyo'on jotmay ka'ap nyaaxjotyëty pyëtsimy,

⁷yë naaxwiinyëtë ja'ay kë'ëm ëyo'on jotmay nyätyukpaatyë, jëtu'un tä yë jëënpixk pyëtsimyën jëënjoty.

⁸Kooxyëp jeexyë ëjts jëtu'un n'ëkjaty, yë'ëjës jeexyë Tios ntukë'ëtëjkëp yë n'ëyo'on njotmayës;

⁹yë'ë tyuunpy winë mëjwiin këjää ets yaj'ijxëp yë myëj'ajtën tsipë nja'akyujkëmëtyën.

¹⁰Yë'ë yajtuupy yajpojpy ets tyajxooky yë naaxwiinyëtë;

¹¹yajmëjnajxyp yë ja'ay mëti'ipë yu'unk naxym yajpatpën, yajjotkujkëp yë ja'ay mëti'ipë moonp tujkpën;

¹²yë'ë yajma'tääpy yë ëxëëkja'aytyëjk yë jyot wyinma'any, oy ënäty tii të tjatuknipëjktaakëtë tuuntëkoya'antë, jëtu'unyë tyajtukjijtëtyä'äy.

¹³Kë'ëm yë ëxëëkja'aytyëjk ëxëëk nyätyuktunyë yë y'ëxëëkjot y'ëxëëk winma'any, yë'ë yajma'tääpy yë winma'any mëti'ipë yë ëxëëkja'aytyëjk të tjamay të tjatajtën.

¹⁴Ko xyiiny'äty, jëtu'unyë yaj'ixy tyontë xyajtë akootstuuypyën, jëtu'un jyuuky'atë tä jeexyë akootstuuy xëmë yajpaatën.

¹⁵Tios yajpëtsëëmpy yë ëyoopëja'ay ma ëxëëkja'aytyëjk yaj'ëyoyën;

¹⁶yëë yajjotkujkëjäämpy yë ja'ay yun këtawpë yajpaatyën, yë'ë amë'pxy yajwë'ëmpy yë ëxëëkja'aytyëjk.

¹⁷Jotkujk ets xoontä'äky yë ja'ay yajpaaty mëti'ipë Tios ojëpën; këtii xy'ëxëëkjawëty ko m'ojëtëty yë Tios mëti'ipë maaytyääyëpën winë.

¹⁸Ko pën tyajtsëtyuty, pojën jatëkok tyajtso'oky; ko pën tkoxy, pojën jatëkok tyajjotkujkë.

¹⁹Yë'ë, xëmë myajtso'oka'anyë, janaam jatsojk, ka'ap wi'ix mjata'any.

²⁰Ko ënäty yuu xëëw y'ity, nëjkxëp myajtso'okyë këtiipë myuu'ookëty; ko ënäty tsip y'ity, myajtso'okanëp ma ënäty pën mkupuxa'anyën.

²¹Yë'ë nëjkx mkuwa'anyë ko pën ëxëëk mnikajpx mnimëtya'akëtëty, mijts ka'ap nëjkx mtsë'ëkë oy tii ëyo'on jyamin jyakëta'akëty.

²²Je'eyë nëjkx xytyukxi'iky ko ënäty yuu y'ity ets ko ënäty yuu pa'am jyää'aty; oy tii jëyujk jyaminëty, ka'ap nëjkx mtsë'ëkë.

²³Ka'ap nëjkx yë tsaa m'atsipyë ma mkam mtu'ujën, yë jëyujk ëwa'anëtypë oy nëjkx mëët mnäjyawëty.

²⁴Ma mjëën mtëjkën nëjkxëp winë xypyääty xy'ixy, ko ënäty xymyëtyoy yë mjëyujk mtsajpkaa, kä'pxy nëjkx xypyääty.

²⁵May nëjkx xymyëët'aty yë m'u'unk m'ok, jëtu'un yaj'ixëty aay ujtsën kamjotypë yajpaatën.

²⁶Oy mëk nëjkx mmëjja'ayë, jëtu'un tä tsajpmok majën.

²⁷Yë jot winma'any mëti'ipë yajpatpën ko njuuky'ajtmëty, yë'ë yajkajpxp niwijy nikujk; ja'akyukë mijts kë'ëm ets xymyëpëkëty ko tëy mëti'ipë myajtukmëmëtyakpën.