Read Biblia Mixe de Quetzaltepec Job 8 Bible Online

Job 8 - Biblia Mixe de Quetzaltepec bible

Job 8

¹Job, ¿wi'ix ko xëmë jëtu'un mtimy'ënä'äny? Jëtu'un mtimkyäjpxy tä jeexyë myëktuupojyën.

³Yë Tios, mëti'ipë maaytyääyëpën winë, ka'ap nijëna'a tëyajtën tyajma'aty ets ka'ap nijëna'a tuny ka'apë myëpaatëtyën.

⁴Wä'änxyëp yë m'u'unk m'ëna'k yë Tios të tmëtëkoytyë, paaty të tyiytyunëtë.

⁵Nikë yë'ë Tios tim ixta'a mëti'ipë maaytyääyëpën winë ets xymyëpëjktsowëty, wä'än mpa'ëyoyë.

⁶Pën mijts oymyës mjuuky'äty ets mëtëy mtu'uye'ey, yë'ë mnijootwinpitanëp ets mmo'ojanëp yë mjëën mtëjk mëti'ipë mpatëpën.

⁷Yë mwit mmeeny mëti'ipë ijty mmëët'ajtypyën wäänë yë'ë, ni'ikëjaanp ja mëti'ipë mpaatäämpyën.

⁸Yë'ë mëmay mëtaj ja aptëjk mëti'ipë të jyuuky'atën ets jam ja ijxpëjkën xyajtsoonëty ma ja'ayëtyën mëti'ipë jap ja jyot wyinma'anyëtyën.

⁹Ëëtsajtëm tyaanëm nmëxu'unk'ajtëmë, ka'ap tii njajtëm nnija'awëmë; yë njuukyajtën'ajtëmë jëtu'un yë'ë tä tu'uk yë äpkën.

¹⁰E yë aptëjkëty mayëtëp myaj'ijxpëkëtëty ets winë mtukni''ixëtëty.

¹¹Yë nëë aweky ets nokykyepy jämyë yony nëë'ëkë'ëm;

¹²e yë'ëjëty, tamnëm tsyuxk'atë ets ka'anëm yajpuxtënëm ko tyëtskojnë jëyëjp ma ja wiinkëtypë ujtsën.

¹³Näyjyëtu'un jyatë kyëpätë yë ëxëëkja'aytyëjk mëti'ipë Tios të tja'atyëkoytyën; oy tii të tjajëjp'ixtë, ka'ap t'ëkpatnëtë.

¹⁴Mëti'ipë të tuk'ijxpätën ets mëti'ipë të tukjotkujk'atën jëtu'un yë nyäxy tä piityën ëkë tä poxmtä'äkyën.

¹⁵Oy jënu'un jam jyanäkyumatsëtëty poj'am pyojtuka'any; wi'ix nyäkyumatsa'anyë ma tu'uk yë poxmtä'äkyën.

¹⁶Yë ëxëëkja'aytyëjk, jëtu'un yë'ëjëty tä yë tsuxk ujts nyi'anyën mëti'ipë yoontëpën kamjoty;

¹⁷ja tiktskäktëp tsaajoty ets jyanäkyumatsyë tsaakëjxy,

¹⁸e ko pën wyijxë'ëkyë, ka'ap yaj'ixy pën jamën ujts të yony ets ni pën tkanijawë tii jam të y'ity.

¹⁹Jëtu'un kyukëxëtë yë jyotkujk'ajtënëty ets wiink ujts jam jatëkok yoonp.

²⁰Yë Tios ka'ap nijëna'a t'ëxmatsy ja'ay mëti'ipë oy ja'ay'ajtpën ets ka'ap tputëkë ëxëëkja'aytyëjk.

²¹Yë'ë yajkutukäämpy ets jatëkok mxi'ikëty m'ëwë'ëkëty ets mya'axëty mjokëty akujk jotkujk;

²²e yë mmëtsip wintsëtyu'un jëjptsëtyu'un wyë'ëma'antë ets ja ëxëëkja'aytyëjk ja jyëën tyëjkëty, nëjkxëp yajijta'ay.