Read Biblia Mixe de Quetzaltepec Salmo 103 Bible Online

Salmo 103 - Biblia Mixe de Quetzaltepec bible

Salmo 103

¹Winë'aaw winëjotës yë Wintsën nkënu'kxyjyawëja'any, nkënu'kxyjyawëjäämpyës yë myëjxëëw.

²Tu'ukyë aaw tu'ukyë jot yë Wintsën nkënu'kxyjyawëja'anyës, ka'apës nijëna'a nja'atyëkoyä'äny yë y'oyjyot y'oywyinma'any.

³Yë'ëjës xypyokywyinmä'kxp maas winë oy nkatunyën ets yë'ëjës xyajtsokp koos jëna'ajëty npëkyë n'ixyë.

⁴Mëti'ipës yë njuukyajtën yajtsokpyën muum o'këntuuy, ets mëti'ipës jotkujk xyaj'ijtpën mëët yë tsojkën ja'awën,

⁵mëti'ipës ku'uxyë xyaj'ijtpën mëët yë oyajtën, etsës xyaj'ëna'kë witsnën.

⁶Yë Wintsën wa'ats ets tëyajtën winë tnipaye'ey ma ja'ayëtyën mëti'ipë ëxëëk jajt këpäjtëpën.

⁷Ojts tuk'ixy ja Moisés ets ja Israel kajpn wi'ix ja nyë'ë tyu'u y'ixëtyën ets wi'ix tii tuny tkäjpxyën.

⁸Yë Wintsën oy tsuj yë jot winma'any tmëëtëty, ets pa'ëyoop najts'ëyo'owëp, ëwxijtp mä'kxtujkp yë'ë ets tsojkp ja'ap.

⁹Yë'ë ka'ap xëmë xy'ojmëty, ets y'ëwa'an'ajtën ka'ap jeky y'ity;

¹⁰yë'ë ka'ap jëtu'un të xytyiytyu'unëmë ijxtëm të ntuuntëko'oyëmën winë;

¹¹mëjwiin këjää tsoky tjawë ja'ay mëti'ipë mëjpëjktakëpën, jëtu'un myëjwiin kyëjääjëty tä tsajpën.

¹²Tëë yë npoky'ajtëm xytyukmëjëkämkäkëmë, jëtu'un tä yë xëëw tmëjëkämke'ekyën ma pyëtsimyën ets ma kyëtä'äkyën.

¹³Yë Wintsën jëtu'un Tyios'aty tä tu'uk u'unkteetyën ma ja'ayëtyën mëti'ipë mëjpëjktakëpën,

¹⁴yë'ë wa'ats tnijawë tii ëëtsajtëm mëët n'oytyuny'ajtëmë; wa'ats tnijawë ko naaxway ëëtsajtëmë.

¹⁵Yë naaxwiinyëtë ja'ay yë jyuukyajtën, jëtu'un yë tä aay ujtsën, jëtu'un pyëjwä'kxy tä pëjyën mëti'ipë kamjotm yajpatpën.

¹⁶Ko pyojy jëtu'unyë kyuka'anaxy ets tyëkoy, ni pën tka'ëkja'amyäjtsnë pën wi'ixtëm të y'ixë'aty.

¹⁷Yë Wintsën yë tsyojkën jya'awën xëmë y'ity ma ja'ayën mëti'ipë mëmëtoowëpën ets wiinkutsë'këyëpën; yë tyiyajtën ka'ap nijëna'a kyixy ma ja'ayëtyën jënu'un nyajtsmin nyaskä'äxëtën.

¹⁸Ma ja'ayëtyën mëti'ipë kuuytyu'unxëtëpën ja kyäjpxytyu'unën ets tmëmëtowtë ja y'ënä'ämën tyiyajtën.

¹⁹Yë Tios tëë yë y'ënyääypyäjn tpëjktä'äky jam tsajpjotm ma yajkutukëtyën, ets y'ënä'ämën kyutujkën yë'ë tyam ijtp ma tëkokyë winë y'ityën.

²⁰Mëjjaw kënu'kxyjyawëtë yë Wintsën miitsëty Tios kukäjpxy ninu'un myaj'ënä'äm myajmëkajpxtën; ninu'un jëjp'ixy myajpaatën ets xymyëmëtowa'antë.

²¹Mëjjaw kënu'kxyjyawëtë yë Wintsën, tëkokyë miitsëty jënu'un xymyëtuntën ets xymyëmëtowtën ijxtëm yë'ë tsokyën.

²²Mëjjaw kënu'kxyjyawëtë yë Wintsën naaxwiinyëtë apëtsëmy ets maajaty yë kyutujkën yajpaatyën. Nkënu'kxyjyawëjäämpyës yë Wintsën winë aaw winëjot.