Read Biblia Mixe de Quetzaltepec Salmo 106 Bible Online

Salmo 106 - Biblia Mixe de Quetzaltepec bible

Salmo 106

¹Tukxoontä'äky yë Tios yë xyëëw nyaxëty. Kukajpxëtë yë Wintsën, jä'ä ko oy yë'ë, jä'ä ko yë tsyojkën jya'awën xëmëkyëjxm y'ity.

²¿Pën ëkmayëtëp tnimëtya'akëty wi'ix yë Wintsën të myëtä'äkyën, ¿Pën ëkmayëtëp tmëjpëjkta'akëty ijxtëm pyaat'atyën?

³Jotkujk yë ja'ay yajpaaty mëti'ipë mëtëy tii nyipaye'epyën ets aakyë'ë tyuunpy oypyë wa'atspë.

⁴Wintsën, xyjyä'ämyätsëpës ko ënäty jatëkok ja mnaax mkajpn xyaj'oyë; jap xyjyot'atëtyës ko ënäty ja mnaax mkajpn xyaj'ëwaatsëpëtsëmy,

⁵etsës n'ixëty wi'ix ënäty jyuuky'atën ja mja'ay mëti'ipë të xywyin'ixyën, etsës jotkujk nnäjyawëtëty ets ntukxoonta'akëtyës ja naax kajpn mëti'ipë mijts mjä'ä'ajtypyën.

⁶Tëës näjyëtu'un npoky tyuntë tääjës ja nteety n'apëtyës; tëës ja njot nwinma'any kyëxtëkoytyë, ets ja ëxëëkpë të ntuntës.

⁷Yë nteety n'apëtyës ka'ap ojts jap Egiptë tmëj'ix tmëjpëjkta'aktë ja mmëjajtën, ojts tja'atyëkooynyëtë ja mëjpë këjääpë ja mtsojkën mja'awën, ets ojts kyäjpxykyumëtoownaxtë winkon ma Tsaptsmejyën.

⁸E yë Tios ojts yajtso'okëtë, tyaj'ixyë jëtu'un yë myëk'ajtën ets tyajmëjnajxy yë xyëëw.

⁹Ojts tmëkmëkäjpxy yë Tsaptsmejy ets tyajtëtsy. Tääts tyajnajxy mejyjoty ijxtëm jeexyë të'ëts'itjotm nyaxtën.

¹⁰Jëtu'un ojts tyajtso'oky ma ja myëtsiptëjkëtyën ma ja ja'ayëty mëti'ipë ënäty ëxëëk'ijxëtëpën.

¹¹Yë nëë yë'ë ojts nyikoompatëtë ja myëtsiptëjk ets nitu'uk ojts kyawë'ëmtë juukyajtën mëët.

¹²Ënätnëm ojts tmëpëktë ja Tios ja wyaantakën ets tkuuy'ëëw tkuuyyaxtë.

¹³E ka'ap nëkooyë pyoxy tääts ets jatëkok tja'atyëkooytyë mëti'ipë ja Tios ënäty të tjakäjpxyën, ka'ap ojts t'ëwxitë ets jeexyë tnijawëtë mëti'ipë ënäty ja Tios tyuknipëjktakëpën.

¹⁴Jam apaktum, të'ëts'itjotm, je'eyë ojts yë Tios twinma'any'ixtë, ets tuknä'ämtë tunëty mëti'ipë ënäty tsyojkën'ajtëpën.

¹⁵Yë Tios ojts jyänty myo'ojëtë mëti'ipë ënäty y'amëtoowtëpën, e kajts jëtu'unyë nyanajxy, yë Tios ojts tyuknikäxëtë pa'am ëyo'on mëti'ipë yaj'o'kp yajtëkoopyën.

¹⁶Jam ma ënäty të tsyënaaytyaknpëktën ojts tmëtsiptsoontë yë Moisés, ets Aarón, mëti'ipë ënäty yë Tios të kyënu'kxyën ets të wyin'ixyën.

¹⁷Paaty ojts yë naaxwiinyëtë y'ëwa'atsy ets ojts jap kyuka'anaxy yë Datán, ets ja jyä'äy ja Abiram.

¹⁸Jëën ojts nyo'kta'ajëtë, e yë jëënyä'änk ojts tëkokyë yë ëxëëkja'aytyëjk tyajtëkooytyä'äy.

¹⁹Jam ma ja Horeb kopkën, jam ojts tu'uk yë awinax t'oytyuntë mëti'ipë këxë'kpën tä tsajpkaajën, yë'ë mëët y'oytyunyëty yë pu'ts pujxn ets t'ëwtajtë;

²⁰ojts tjënaxtë yë Tios, ets ojts tyajtëkatstë yë myëj'ajtën ets xyoontakën mëët tu'uk yë awinax mëti'ipë këxë'kpën tä tsajpkaajën, mëti'ipë aay ujts y'ojkypyën.

²¹Ojts tja'atyëkooynyëtë ja Tios, mëti'ipë ënäty të yaj'ëwaatsëpëtsëmëtën, ets mëti'ipë ënäty jap Egiptë winë të tuny të tkäjpxyën,

²²mëti'ipë ënäty të tyaj'ixyën ja myëj'ajtën ma ja Cam y'itjotmën ets ma ja Tsaptsmejyën.

²³Ojts yë Tios tjanikäjpxy ko ënäty yajkutëkoya'anëtë, e yë Moisés mëti'ipë wyin'ijxën, yë'ë ojts tuktëkë ets ja Tios ja jyoot'an xye'emy, jëtu'un ojts ka'ap kyutëkooynyëtëpë.

²⁴Wäänë y'ijty, tääts tu'uk yë naax kajpn janty'oy janty tsujpë ojts t'ixtijtë, ka'ap tmëpëjktë mëti'ipë ënäty ja Tios të tyukwinwanëtën,

²⁵jap ma ënäty y'itën tsyëënëtën ëxëëkjaty ja Tios jap tnikäjpxy tnimëtyaktë ets ka'ap tmëmëtoowtë mëti'ipë jayajtuk'ënä'ämtën.

²⁶Ënät jyoot'anpëjky ets ojts tnikäjpxy ko yaj'ooka'an yajtëkoya'anëtë jam të'ëts'itjotm,

²⁷ko nëjkxëp tyaj'ooky tyajtëkoy ja y'u'unkëty y'okëty ets jëtu'unyë xit ko'ow tyajjata'any ma ja wiinkëtypë, ja naax kajpnën ma ja'ayëty ka'ap ja Tios t'ëwtatën.

²⁸Tä ojts tmëtuntë ja wiink tios mëti'ipë tyijtëpën Baal-peor, ets tkaaynyëtë tjë'kxnëtë ja ka'ayën ukën mëti'ipë të yajtukwintsë'ëkën ja tios ka'apë jyuukyëtyën.

²⁹Mëët ja y'ëxëëktu'un y'ëxëëk kajpxënëty yë'ë ojts mëët ja Tios tyajjoot'anpëktë, paatykyëjxm ojts tu'uk yë mëj ëyo'on kyëtä'äky ma yë'ëjëtyën.

³⁰Ënät yë Finees txajë'ky yë kyë'ë ets tyaj'o'ky ja mëti'ipë ënäty të pyokytyunyën. Täänëm ojts ja ëyo'on jotmay kyixy nyäxy.

³¹Yë Tios oy ojts tjawë ja jëtu'unpë ja tu'unën kajpxën, jëtu'un y'ënäny ko xëmë yaja'amyätsëty ni'u'unk ni'ëna'k, niteety ni'ap.

³²Ojts näjyëtu'un yë Tios tyajjoot'anpëktë jam ma ja Meribá mëjmejyën, Moisés ëxëëk ojts tkujatë jëtu'unpë ja ëxëëk jot ëxëëk winma'any,

³³ojts tyajkumon tyajkutukëtë ets y'ëëwnë kyajpxnë tëkatsy, ka'ap t'ëkmëmaay t'ëkmëtajnë tii kyäjpxyp.

³⁴Ka'ap ojts tyajkutëkoytyë ja kajpn mëti'ipë ënäty ja Tios të tyuk'ënä'ämëtën tyajkutëkoytyëty.

³⁵Ni'ikyë ojts mëët nyäxyëpiinënëtë ja ja'ayëty ka'apë ja Tios t'ëwtatën, ets ojts tyukjajtënëtë ja y'ëxëëktu'un y'ëxëëk kajpxënëty;

³⁶ojts t'ëwtajnëtë wiink tios mëti'ipë ok ëxëëk myëjajt myëkëpäjtën,

³⁷jä'ä ko ojts ja y'u'unk y'ëna'këty, ye'etyëjkpë, to'oxytyëjkpë tukwintsë'kënëtë ja ku'oypyë.

³⁸Ojts nanëkoo tyaj'o'knëtë mëti'ipë ënäty ka'ap tii poky tmëëtëtyën, ja jyot nye'pynyëty ja nyëëxëty ets ja myaankëty, ojts tukwintsë'kënëtë ja ka'apë tiosëtyën, jampë Canaán yajpaatyën. Jëtu'un'äämpy ja naaxwiinyëtë ojts tyaj'ëxëëkëtë mëët ja jot ne'pny.

³⁹Yë'ëjëty ojts nyäyaj'ëxëëkëtë, mëët ja y'ëxëëktu'un y'ëxëëk kajpxën.

⁴⁰Yajxon yë Wintsën ojts ja kyajpn tukjoot'anpëky, paaty ojts ka'ap tmo'oy mëti'ipë ënäty ja patëtëpën,

⁴¹ojts jam t'ëxmatsy ma ja ja'ayëty ka'apë ja Tios t'ëwtatën, ets ojts ja myëtsiptëjk myëmëtakënëtë,

⁴²ëxëëk ja myëtsip tyuunëtë, jëtu'unyë ojts y'atään tyuktäänëtë, mëët ja mëk'ajtën kutujkën.

⁴³Tios ojts jyayajtso'okëtë kanaak ok, e yë'ëjëty ka'ap ojts tkupëktë mëti'ipë ënäty ja Tios të tjatuknipëjktaakën. Tä ojts kë'ëm ëxëëktum nyäyajwë'ëmëtë mëët ja y'ëxëëktu'un y'ëxëëk kajpxënëty,

⁴⁴e ko ja Tios t'ijxy ko o'ktëy jyajnëtë ets jyiiynyëtë yaxnëtë,

⁴⁵ënäty ojts tja'amyetsy ja käjpxytyu'unën mëti'ipë ënäty mëët të tunyën, tää tyajtëkajtsy ja jyot wyinma'any, jä'ä ko yë tsyojkën jya'awën ni'ik myëj kyëjääjëty.

⁴⁶Ojts tyajkutuky ets ja naax kajpn mëti'ipë ënäty të myëmëta'akëtën, oy jyëkyäpëtëty ets myëët'atëtëty.

⁴⁷Yajtsoktëkës ëëtsëty, Wintsën, mijts mëti'ipës nTios'ajtëpën. Yajmujktëk ëëtsëty jënu'un nyajpaatënës naaxjoty kajpnjoty, ets ja mxëëw wa'atspë nwin'ëw nwinya'axtëtyës ets mëët yë xoontakën myajmëjpëjkta'akëty.

⁴⁸Kënu'kxy yë Wintsën yë xyëëw y'itëty, mëti'ipë yë Israel ja'ay Tyios'ajtëpën xëmëkyëjxm. Wä'än ni'ëmukë t'ënaanta'atë: Oy'atëp jëtu'un. Tukxoontä'äky mëjjawë Tios yë xyëëw nyaxëty.