Read Biblia Mixe de Quetzaltepec Salmo 108 Bible Online

Salmo 108 - Biblia Mixe de Quetzaltepec bible

Salmo 108

¹Tios mëti'ipës nTios'ajtypyën, yë njot nwinma'anyës janty a'ijxp janty jëjp'ijxp yajpaaty, janty jëtu'un tyim'ëwxity ets mwin'ëwa'any mwinya'axa'anyë. Jot anëmë mëti'ipës nmëët'ajtypyën, ëkwij ëkkäj;

²wijtë käjtë miitsëty koowpë xuxpë; jëtu'un janty'oy nkuxëënytyak nkujajtakmëty.

³Wintsën, mijts nmëjpëjkta'akäämpy mëët yë ëy yä'äxy, ma naax kajpnëtyën mëjpë mutskpë.

⁴Yë mtsojkën mja'awën ni'ik yë myëjëty këtiinëm jyëtu'unëty yë tsajp. Ko mijts winë tëyajtën xytyuny, jampaat jyä'ty ma tsuxk tsajpën.

⁵Tios, mëti'ipës nTios'ajtypyën tsajpkëjxy myajpaaty; yë naaxwiinyëtë jä'ä yajpaaty nituky mëët yë mmëj'ajt m'oyajtën.

⁶Yajtsoktëk ëëtsëty mëët yë mëk'ajtën, ets jotkujk wyë'ëmtëty mëti'ipë mtsojkpy mja'apën. Ëtsoowtëk ëëtsëty.

⁷Tios tëë jam kyäjpxy ma jyëën tyëjkën: Janty wi'ixpëm akujk jotkujk nyajwa'kxa'anyës yë it naaxwiinyëtë mëti'ipë jamën Siquem ets Sucot.

⁸Galaad ets Manasés ëjts yë njä'ä, Efraín yë'ëjës jëtu'un nyajnajxyp tääjës yë nkujupën mëti'ipës yë nkëpajk ntuk'ëtujkpyën, e yë Judá yë'ëjës ntukmëët'ajtyp yë nkutujkën.

⁹Moab yë'ëjës jëtu'un nja'ap tä pujxn kë'ëpujtaknën maas yë nkë'ë nkupujën; jam ma Edomën, jamës yë nkë'ëk nnajtsjänë; etsës ntukxoonta'aka'any koos të nmëmëtakta'ay yë Filistejë ja'ayëty.

¹⁰¿Pën jëtää jam xy'ëkyajnëjkxëp ma ja naax kajpn ja napotsypyën? ¿Pën jëtää xy'ëktu'uwinwowëp etsës xywyoowja'tëty jam Edom?

¹¹Mijts Tios, ijxtëkoy ja'atyëkoyës xyaj'ijnëtë; tyam ka'ap mijts m'ëk tso'onë mëët ëëts yë ntsiptuunpëtëjkëty.

¹²Putëjk pupäjtëk ëëtsëty ets ja nmëtsiptëjkëtyës nmëmëta'aktëty, jä'ä ko yë naaxwiinyëtë ja'ay oy jënu'un jyaputëk jyapupätëty, ka'ap nimaa tsyowpaaty.

¹³Yë'ë tëy mëët yë Tios yë pyutëjk pyupäjtën, jëtu'unmëp winë mëj këjää; yë'ë nëjkx kë'ëm tyajkutëkooytyä'äy tëkokyë mëti'ipë xymyëtsip'ajtëmën.