Read Biblia Mixe de Quetzaltepec Salmo 109 Bible Online

Salmo 109 - Biblia Mixe de Quetzaltepec bible

Salmo 109

¹Mijts Tios, këtii amë'pxy mwë'ëmy ko nmëwaantsow nmëpëjktsowëty,

²yë aaw yä'än mëti'ipë je'eyë kyajpxtëpën yë ëxëëkajtën ets win'ë'ënën, ëxëëkjatyës xynyikajpx xynyimëtya'aktë ets koos xynyimëtya'aktë, aakjä'ä kyajpxtëp mëti'ipë ka'ap tyiyajtënëtyën.

³Ëxëëkjatyës xynyikajpx xynyimëtya'aktë xii yaa, nanëkoo je'eyë xy'ojtës xya'axtës.

⁴Mëët yë'ë koos yë tsojkën ja'awën nmëëtëty, paaty xynyipëtë'ëktës; e ëjts je'eyës nwa'antä'äky nnu'kxtä'äky.

⁵Koos winë oy ntuny nkäjpxy, yë'ëjëty wiinkjaty tuunwinpitë; koos yë tsojkën ja'awën nmëëtëty, xytyuk'ëxëëk'ijxtëpës je'eyë.

⁶Paaty nikë pëjkta'ak tu'uk yë ja'ay ëxëëkpë jyä'äy'ätyën ma yë'ëjëtyën ets tpaye'eyëty ijxtëm të tyëkoytyën, kyë'ëm ja'ay nëjkx tyukwinmëtowëtë ja pyoky;

⁷ets yë'ë nyikajpxëtëty ko pyokymyëët'atë ma ënäty ja poky yajnipaye'eyën; wä'än ja nyipaye'epyë yë'ë yajpokykya'ajëtë.

⁸Wä'än tjuuky'äty ets wiink ja'ay tjä'ä'aty mëti'ipë të tnitunën.

⁹Wä'än yë y'u'unk y'ëna'k twë'ëmy ku'ooky u'unk ets tyo'oxytyëjk ku'ookytyo'oxy.

¹⁰Wä'än yë y'u'unk y'ëna'k jëtu'unyë t'antë tpojtë ets t'amëtowtë yë wit meeny muum. Wä'än tyaj'ëxwoptë ma ja tyëjkëtyën mëti'ipë tëë xit ko'ow jyajtaaynyën.

¹¹Wä'än yë yajnu'kxpë tmënëjkxta'ay mëti'ipë jyä'ä'ajtypyën, wä'än yë wiink ja'ay tjä'ä'ajta'ay mëti'ipë të tnitunën.

¹²Ka'ap pën pya'ëyowëtëty jëtu'un yë'ë ets näjyëtu'un yë y'u'unk y'ëna'k mëti'ipë të wyë'ëmtën ku'ooky.

¹³Wä'än timkyixy timnyäxy yë y'aptëjk, ets wä'än timy'atëkoy yë xyëëw.

¹⁴Wä'än yë Wintsën tja'amyetsy wi'ix yë tyeety ojts tyuuntëkoy kyajpxtëkoyën, ets ka'ap nijëna'a tjo'tsëty ja tyaak ja nyëë pyoky.

¹⁵Yë Wintsën yë'ë xëmë jyot'atëp ets yaa naaxwiiny naaxkëjxy ja'atyëkoy y'itëty tëkokyë mëti'ipë jeexyë yajtukja'amyäjtspën.

¹⁶Jä'ä ko yë'ë ka'ap ojts nijëna'a tmëmay tmëtajy yë pa'ëyo'owën najts'ëyo'owën. Yë ja'ayëty mëti'ipë ënäty mon tuk yajpatëpën ets jë'ë ya'ax, je'eyë ojts t'ixjëtity tpajëtity ets koonëm tyaj'o'ky tyajtëkooy.

¹⁷Mëët ko yë'ë ojts tsojkën'aty yë näpyokë, wä'än ënät näjyëtu'un tyajpoky. Ka'ap tsojkën'ajty ja näkyënu'kxë, paaty wä'än tyajpoky.

¹⁸Wä'än tyajtuknikäjpxy ja ëxëëkpë tä jeexyë yë wit yajtukxoxyën, ets tyuktëkëtëty jyootjoty pyajkjoty tä nëëjën ëkë onën,

¹⁹wä'än jëtu'un tnipëk'aty tä nijänën, ets myoxtsumyë tä wëënën.

²⁰Jëtu'un ja Tios nëjkx tukëpety ja nmëtsiptëjkës, ets tëkokyë mëti'ipë wiinkjaty xynyikajpx xynyimëtyaktëpësën.

²¹E mijts Wintsën, yajmëjnax yë mxëëw, oyës mmëët'ajtk. Yajtsokës ets kuwaankës mëët yë mtsojkën mja'awën.

²²Ëjts janty ëyoopës nyajpaaty ets mon tuk. Tëës njawë yë njuukyjot tsyëtyujta'ay.

²³Jëtu'unyës nnäjyawëty ntimkyixy ntimnyäxy tä äpkën, ets jëtu'unës näjyawëty nwinpapojy tä mu'ujën.

²⁴Koos nkakay, ënätyë njawës tyimnatsëyuuypyiky yë nkoxës; ets koos tii nkajë'kxy, ënetyës njawë ntëtskëtä'äky.

²⁵Ëjts je'eyës nyajja'ayxyi'iky. Koos muum xy'ixtë, tääts yë kyëpajk tkoowmin tkoowxëptë.

²⁶Putëjkëkës, Wintsën mëti'ipës nTios'ajtypyën. Yajtsokës mëët yë mtsojkën mja'awën.

²⁷Wä'än tnijawëtë ko mijts jëtu'un mWintsën'ajtp, mijts winë të xytyuny të xykyäjpxy mëët yë mmëkajtën.

²⁸Ka'ap wyi'ixëty oyës të xypyoktë, nëkoo ko mijts xykyënu'kxyës. Wä'än yë'ë tsëtyuntë e ja mtuunpë wä'än jotkujk näjyawëty.

²⁹Wä'än yë nmëtsiptëjkës tsëtyu'unpata'atë. Wä'än tsëtyu'unmëët twë'ëmta'atë jëtu'un tä jeexyë wit mëët wyë'ëmtën.

³⁰Mëëtës yë n'aaw nkukajpxëja'any yë Wintsën xëmë. Nmëjpëjkta'akäämpyës ma mayjyä'äyën.

³¹Jä'ä ko yë'ë pyutëjkëp yë ëyoopëja'ay ets yaj'ëwaatsëpëtsëëmpy mëti'ipë ja tëytyu'unën jyëjp'ijxypyën.