Read Biblia Mixe de Quetzaltepec Salmo 111 Bible Online

Salmo 111 - Biblia Mixe de Quetzaltepec bible

Salmo 111

¹Tukxoontä'äky mëjjawë yë Tios yë xyëëw nyaxëty. Nmëjpëjkta'akäämpyës yë Tios winë aaw winëjot ma ënäty tyu'ukmuktën yë ja'ay mëti'ipë oy juuky'ajtëpën, ets ma ënäty tëkokyë ja naax kajpn të nyiye'eypyetyën.

²Mëti'ipë yë Tios të tyajkojy të tpëjktä'äkyën janty mëj janty këjää yë oy; ets pën yë jëtu'unpë tsyojkpy jya'apën, yajxon t'ijxpëky ets t'ixy tuny.

³Tëkokyë mëti'ipë të tyajkojy të tpëjktä'äkyën janty'oy janty tsujëty yaj'ixtë, ets y'ënä'ämën tyiyajtën oypyë, xëmëkyëjxm y'ita'any.

⁴Yë myëj'ajtën mëti'ipë të tyaj'ixyën ka'ap tjëkyepy nijëna'a yaja'atyëkoyëty. Yë Wintsën yujy tëtä'äky yë'ë ets pa'ëyoop najts'ëyo'owëp.

⁵Myoopy yë kyä'äyën y'ukën mëti'ipë wintsë'këyëpën. Yë'ë, xëmë tja'amyetsy wi'ix yë käjpxytyu'unën të tunyën.

⁶Ojts yë nyaax kyajpn tuk'ixy wi'ix yë mëj'ajtën tmëëtëtyën ko ojts myo'ojëtë ja it naaxwiinyëtë mëti'ipë ënäty jyä'ä'ajtëpën ja ja'ayëty mëti'ipë wiink tios y'ëwtajtëpën.

⁷Mëti'ipë yë'ë tyuunpyën aakyë'ë mëti'ipë oyën ets mëtëyën, yë'ë, jyëkyejpy ntuk'ijxpäjtmëty yë y'ënä'ämën tyiyajtën,

⁸jä'ä ko xëmëkyëjxm ta'tspëky y'ity, yë y'ënä'ämën jä'ä y'oytyunyëty mëët yë tëyajtën jaanty'ajtën.

⁹Ojts yë nyaax kyajpn tyaj'ëwaatsëpëtsëmy ma ënäty yajpaatyën pokyjyotm ets ojts ja kyäjpxytyu'unën tnikäjpxy mëti'ipë ojts tyajwë'ëmyën ets y'itëty xëmëkyëjxm. Tios wa'ats yë'ë ets kutsë'ëkë.

¹⁰Yë wijyajtën ets nija'awën, jam yaj'ixy ma ënäty yë Wintsën yajwinkutsë'ëkën. Pën yë Tios wyinkutsë'këpën myëët'ajtyp yë wijyajtën. Tios mëj'äämpy y'ita'any.