Read Biblia Mixe de Quetzaltepec Salmo 112 Bible Online

Salmo 112 - Biblia Mixe de Quetzaltepec bible

Salmo 112

¹Tukxoontä'äky mëjjawë yë Tios yë xyëëw nyaxëty. Jotkujk yë ja'ay yajpaaty mëti'ipë wyinkutsë'këpën yë Wintsën, ets jotkujk nyäjyawëty ko tpatuny ja y'ënä'ämën tyiyajtën.

²Ja ja'ay ja y'u'unk y'ëna'k mëti'ipë wiinkutsë'këpën kënu'kxy y'ita'antë ets myëët'atantëp ja mëk'ajtën naaxwiiny naaxkëjxy.

³Ma jyëën tyëjkën ujts mëët yë wit meeny ets ja y'oyjyä'äyajtën xëmë tmëët'aty.

⁴Jëtu'un jyäjy tyi'kxy tä jëënën akootstuuy ets yajkutë'kxtë ja ja'ay mëti'ipë oy juuky'ajtëpën, mëti'ipë pa'ëyoopën, mëti'ipë oy nipaye'epyën ets mëtëy winë tuny.

⁵Ja ja'ay mëti'ipë oyjyä'äyën tyuk'ënu'kxyp ja jyiiky myëku'uk ja wit meeny ets mëtëy tyooky yäky

⁶jëtu'unpë ja'ay ka'ap wi'ix jyata'any. Yë wa'ats ja'ay xëmë ja'amyetsy y'ita'any.

⁷Ka'ap tsyë'ëkë ko tii aaw tii ayuk tmëtoy atsë'ëk ajawëpë; ja jyot wyinma'any mëk xëmë yajpaaty, jä'ä ko yë'ë Wintsën tyuk'ijxpejtyp.

⁸Ja jyot wyinma'any mëk xëmë yajpaaty, ka'ap tsyë'ëkë, ko t'ixy yë myëtsip je'eyë tukxi'iky.

⁹Yajwä'kxyp ja wyit myeeny ma ja ëyoopëja'ayën, ja y'oyjyä'äyajtën xëmë tmëët'aty; mëët ja y'ijxë'ëky kyoowë'ëky.

¹⁰Yë ëxëëk ja'ay ëxëëk nyäjyawëty ko muum y'ixyë, yë ëxëëk ja'ay ka'ap tjëkyepy tii tunëty paaty je'eyë tyëts t'akä'pmuky; yë ëxëëkja'aytyëjk oy tii tjatsojkën'atëty ka'ap tii tpaata'any.