Read Biblia Mixe de Quetzaltepec Salmo 113 Bible Online

Salmo 113 - Biblia Mixe de Quetzaltepec bible

Salmo 113

¹Tukxoontä'äky mëjjawë Tios yë xyëëw nyaxëty. Tu'kë'ëyë jënu'un yë Wintsën tmëtuntën, mëjpëjkta'aktë Tios yë xyëëw.

²Kënu'kxy yë Wintsën yë xyëëw y'itëty tyam ets xëmëkyëjxm.

³Mëjpëjktä'äky yë Wintsën yë xyëëw y'itëty jamtsow ma xëëw pyëtsimyën ets ma kyëtä'äkyën.

⁴Yë Wintsën yë'ë mëj'äämpy ijtp ma naax kajpnën, yë myëj'ajt y'oyajtën wyinajxyp yë tsajp.

⁵Ni pën tkamëpaaty yë nwintsën'ajtëm Tios, mëti'ipë jam këjxm ënä'ämpën.

⁶E yë'ë, tsyojkpy yë naaxwiinyëtë ets tsajp paaty tniku'ijxnaxy.

⁷Yë Wintsën yajjotkujktäkpy yë ëyoopëja'ay ets jyu'typ jap ëyo'onjoty yë ja'ay mëti'ipë winë yajmëyäjtypyën

⁸ets tyajnaaxweetsy ma ja'ay mëj'äämpyë y'u'unyëtën, mëti'ipë mëj'äämpy ijtëpën ma nyaax kyajpnën.

⁹Ja to'oxytyëjk mëti'ipë ka'ap ja y'u'unkën, myoopy ja jotkujk'ajtën ets y'itëty taak tsi'tsk ma ja y'u'unk y'ëna'kën, ets jotkujk tyaj'ity ma ja jyëën tyëjkën. Tukxoontä'äky mëjjawë Tios yë xyëëw nyaxëty.