Read Biblia Mixe de Quetzaltepec Salmo 124 Bible Online

Salmo 124 - Biblia Mixe de Quetzaltepec bible

Salmo 124

¹Kooxyëp yë Wintsën ka'ap të xypyutëjkëmë, ¿tii jeexyë të tyuny të jyätyë? Wä'än tyam tnikajpxtë yë Israel ja'ayëty.

²Kooxyëp yë Wintsën ka'ap të xypyutëjkëmë, ¿tii jeexyë të tyuny të jyätyë? Ma yë naaxwiinyëtë ja'ayëty ojts xyjyanipëtë'këmën ets xyjyaj'ooka'anëmën,

³jëna'ajëp jeexyë jëtu'unyë ajuuky xjyjë'ënënë ko ojts xytyukjoot'anpëjkëmë.

⁴Jëtu'un jeexyë të n'o'k të ntëko'oyëmë tä mëj nëëkom winë tyajnëjkxyën, ëkë tä winë tnijä'tstëkoyën.

⁵Tä nëëki'ixk yë mo'onts tpajë'ëtë'ëkyën, jëtu'un jeexyë të xyajnëjkxëmë.

⁶Mëjjaw kënu'kxyjyawë yë Wintsën y'itëty, mëët ko ka'ap të t'ëwa'atsy ets jëtu'unyë xy'anujk xytyuknujkëmëty mëët yë y'aaw tyëtsëty.

⁷Tëë nkukäkëmë ja o'ktakn, jëtu'un ijxtëm yë joon tkuke'ekyën yë o'ktakn mëti'ipë muum yu'utsy ijtpën; ja n'o'ktakn'ajtëm jëtu'unyë të pyojtakta'ay, paatykyëjxm të tjëkyepy wi'ix nkäkmëtyën.

⁸Yë nputëjkën'ajtëm jam tsyoony ma Wintsënën mëti'ipë yajkojën yë tsajp ets naaxwiinyëtë.