Read Biblia Mixe de Quetzaltepec Salmo 13 Bible Online

Salmo 13 - Biblia Mixe de Quetzaltepec bible

Salmo 13

¹Wintsën, ¿Jëna'apaat ja'atyëkoy xyaj'ita'anyës? ¿Xëmëkyëjxmën ja'atyëkoy xyaj'ita'anyësë? ¿Jëna'a je'eyë mnäyu'utsa'anyë ko mijts niminëty?

²¿Jëna'a ka'ap n'ëkmoon n'ëktujknëtyës ets jëna'a ka'ap ja njot nja'awënës y'ëk'ëyoownëty? ¿Jëna'a ka'ap ja nmëtsipës xy'ëk'ënä'ämnëty?

³Wintsën, ni''ijxkëtakës ets mooykyës ja të'kxën jajën mëti'ipës winë oy tsuj xytyuk'ixëpën. Ka'apës mëpaat ja tsuu ma'ay xywyiintëkë; këtiipës ëxëëk njatëty nkëpätëty.

⁴Ka'ap mëpaat yë nmëtsipës y'ënä'äny; Tëës nmëmëtä'äky. Ka'ap mëpaat xyoontä'äky koos ënäty muum ntëkoy.

⁵Ëjts yi'iyës ntuk'ijxpejtyp ko mijts mtsoky mjawë; jotkujkës yë njot nwinma'any njawë koos të xyajnitso'oky.

⁶Nkuuy'ëwäämpyës yë Wintsën ko winë oy të tuny ma ëjtsën.