Read Biblia Mixe de Quetzaltepec Salmo 140 Bible Online

Salmo 140 - Biblia Mixe de Quetzaltepec bible

Salmo 140

¹Wintsën, jëwoow jëwijtskës ma ëxëëkja'aytyëjkën, mijts xykyuwa'anëpës ma ja'ayëtyën ja ëxëëkpë y'ëtë'ëtstën y'ëna'antën,

²mëti'ipë yi'iyë nyipëjktakëtyëpën yë jëën tsip ets janaam jatsojk je'eyë tsyip'ixta'atë.

³Yë yä'änëty jëtu'un jyëjpku'pnyëty tä tsa'any yä'änën; yë y'aaw y'ayukëty jëtu'un jyëmumy tä tsa'any nyixëwätën.

⁴Wintsën, mijtsës xykyuwa'anëp ma ëxëëkja'aytyëjk ja mëk'ajtën kutujkën tmëët'atën. Kuwaankës ma ja'ayëtyën ëxëëkpë winë tuntën tkajpxtën, mëti'ipë yi'iyë myääytyëp tyajtëpën wi'ixës xy'ëkyajkuka'anaxtëty.

⁵Tääpë ja'ayëty mëti'ipë je'eyë nämyëjja'aw näjyääntyja'awëtëpën, tëë tjanipëjktaakëtë ja n'o'ktaknës. Tëë nnë'ë aay ntu'u'aayës yë tyejpxyëty tëëytyëwtë ets xyu'tsnëty maas nnaxyën.

⁶Tëës ja Wintsën n'ënëëmë: mijts nTios'ajtyp, mëtoow'itëp ko nmëkajpxëty ets ja putëjkën n'amëtowëty.

⁷Wintsën, Wintsën yajnitsokpë mëti'ipë maaytyääyëpën winë, këwent'ajtkës yë njot nkëpajk oy muum tsipjoty nyajpaatyës.

⁸Wintsën, këtii xy'ëwa'atsëty ets ja ëxëëkja'aytyëjk tpaatëty ja mëti'ipë tsyojkën'ajtëpën; këtii xy'ëwa'atsëty ets tuun'ëtë'ëtstëty mëti'ipë myääytyëp tyajtëpën. Mëti'ipës xynyawa'k xynyatënaaytyëpën, në'ix pa'at'ix nyaxtë tyëkëtë; wä'än jam tkëtakta'ay ja pojkën ma yë'ëjëtyën mëti'ipë yë'ëjëty kë'ëm kyajpxpëtsëëmtëpën.

¹⁰Wä'än tkëtä'äky ma yë'ëjëtyën tä jëënpajkën ets jap kyujëpipëtëty jutjoty ma ka'ap nijëna'a pyëtsëmtëtyën.

¹¹Wä'än t'atëkoytyë yaa naaxwiiny ja ja'ayëty mëti'ipë je'eyë ëxëëk kajpxtëpën. Wä'än yë ëyo'on jotmay tpajëtitëtë ets yajkutëkoyëtë.

¹²Ëjts wa'atsës nnijawë ko yë Wintsën nyipaye'epy yë ëyoopëja'aytyëjk ets pyutëjkëp yë ja'ay mëti'ipë moonp tujkpën.

¹³Yë ja'ayëty mëti'ipë oy yë jyuukyajtën yajtu'uye'eytyëpën, myëjpëjkta'akantëp yë mxëëw; yë ja'ayëty mëti'ipë mëtëy winë tyuuntëpën, jam jyuuky'ata'antë ma mijts myajpaatyën.