Read Biblia Mixe de Quetzaltepec Salmo 141 Bible Online

Salmo 141 - Biblia Mixe de Quetzaltepec bible

Salmo 141

¹Mijts yam nmëkäjpxyp, Wintsën: min tsojkyë. Mëtoow'ijtkës yë n'ayuk ma yam mijts nmëkäjpxyën.

²Wä'änës yë ntsajpkäjpxy jam tja'ty ma mijtsën tä poom jyokyën, koos yë nkë'ë nxajë'ëkëty jëtu'un nyaxëty tä jeexyë wintsë'kën myajmo'oyën ko jyënäkyxyëëw'aty.

³Wintsën, mijts mkëwent'atëp yë nwiin n'aawës, këtiipë nëkoo tii ajotkumonë nkajpxpëtsëmëtyës.

⁴Jëpëk jëtun yë ëxëëk jot ëxëëk winma'any maas ëjtsën; këtii xyajkutukëty etsës tëkatsy winë ntunëty nkajpxëty ëkë nyajpaatëtyës ma ëxëëkja'aytyëjk ye'eymyuk nyajxmuktën.

⁵Mëyajtën ënäty tu'uk yë oyjyä'äy tyuunpy koos xytyukkumëtowëty maas tii oy nkatunyën, jëtu'unës njawëty tä tu'uk yë on pya'akxuukyën koos xy'ojëty ka'apës jëtu'unpë nwiinkjawëja'any oy mëk njamëtowëtyës ëjts je'eyëmës Tios nmëkajpxa'any.

⁶Yë ëxëëkja'aytyëjkëty nëjkxëp yajkujëpijpnajxta'atë ja'awjoty ets jäänëm nëjkx tnijawëtë ko ja aaw ayuk mëti'ipës nkäjpxypën, janty mëtëy yë'ë.

⁷Yë wyääyëty pyajkëty jëtu'unyë nëjkx kujy jëpipy yajtuunta'atë jap jutjoty, jëtu'un ijxtëm yë ja'ay tniwookën yë ni'ipy naaxkëjxy.

⁸Wintsën, yë nwiinës jämyë tu'ukyë kyëx'ixy ma mijtsën, jam ma mijtsën jamës npaaty ja näy'ijx'it näkyëwent'atë, paaty këtiis nijëna'a xy'ëxmatsëty.

⁹Mijts xyajtso'okëpës ma ja o'ktaknën mëti'ipë ojts tjapëjkta'aktën ja nmëtsipës; yaj'ëwaatsëpëtsëëmkës ma o'ktaknën mëti'ipë ja ëxëëkja'aytyëjk të tjanipëjktaakëtën.

¹⁰Wä'än jap kë'ëm tka'atë ëxëëkja'aytyëjk ma tejpxyën mëti'ipë kë'ëm të tni''ixëtën, e ëjts minës yë njä'ä n'ëkyajtu'uye'ey.