Read Biblia Mixe de Quetzaltepec Salmo 145 Bible Online

Salmo 145 - Biblia Mixe de Quetzaltepec bible

Salmo 145

¹Nimëtya'akäämpyës yë mmëjajtën, mijts Tios, mëti'ipës nTios'ajtypyën ets mëti'ipës n'ënä'ämpë'ajtypyën. Xëmë yë mxëëw nmëjjawëja'any nkënu'kxyjyawëja'anyës.

²Xëmë mijts oy njawëja'any, ets ntukxoonta'akäämpyës yë mxëëw xëmë.

³Yë Wintsën janty mëj yë'ë ets patëp yajmëjpëjkta'akëty. Yë myëj'ajtën tsip nja'akyujkëmëty.

⁴Yë naaxwiinyëtë ja'ayëty xëmë nëjkx tmëjpëjkta'aktë mëti'ipë të xyajkojyën, yajnimëtya'akaanp mëti'ipë të xytyuny të xykyäjpxyën.

⁵Yajnimëtya'akaanp yë mmëjajtën m'oyajtën, ëjts nnimëtya'akäämpyës wi'ix winë mëj këjää të xytyuny të xykyäjpxyën.

⁶Nëjkxëp yajnikäjpxy yajnimëtyä'äky yë mëjpë këjääpë të xytyuny të xykyäjpxyën ets atsë'ëk ajawëpë, näjyëtu'un nnimëtya'akäämpyës yë mmëjajtën mkëjxm'ajtën.

⁷Yajnimëtya'akaanp yë m'oyjot m'oywyinma'any, yajtukyaaxëjaanp yajtukjokëjaanp ko mijts aak'oy ets aak tëyajtën winë të xytyuny.

⁸Yë Wintsën janty'oy jot winma'any tmëëtëty, ets pa'ëyoop najts'ëyo'owëp, mä'kxtujkp ets tsojkp ja'ap.

⁹Yë Wintsën aak y'oyjya'awëtyääpy wä'än tpënëty, mëët oyjyot oywyinma'any tkëwent'aty mëti'ipë të tyajkojyën.

¹⁰Wintsën, wä'än mkuuy'iy mkuuyä'äxyë mëti'ipë të xyajkojyën. Wä'än näjyëtu'un mtukxoontä'äkyë tëkokyë jënu'un oy mmëtunyën.

¹¹Wä'än tnimëtya'aktë wi'ix myëjëtyën mijts yë mkutujkën. Wä'än tnimëtya'aktë mëti'ipë mijts të xytyuny të xykyäjpxyën mëët yë mëj'ajtën.

¹²Wä'än tëkokyë yë naaxwiinyëtë ja'ay yajtuknija'awëtya'atë yë mmëjajtën ets tyë'kxën jyajjën yë m'ënä'ämtakn.

¹³Yë mkutujkën, yë'ë mëti'ipë winë xëëw winë jëmëjt ijtpën, yë m'ënä'ämën yë'ë mëti'ipë xëmëkyëjxm yajpatpën.

¹⁴Yë Wintsën wyijtsë'kpy mëti'ipë këtaapën ets wyijtskujkëp tëëpë y'ënu'kxën.

¹⁵Tëkokyë yë ja'ay aakmijts mtuk'ijxpäjtëp, yë'ë y'ëwxijtëp ets xyajkay xyaj'uukëty ko yuu pyaatëtëty.

¹⁶Xajwa'kx yë mkë'ë mëët yë m'oyjot m'oywyinma'any, ets yaj'it ku'uxyë tëkokyë jënu'un winë jyuuky'ätyën.

¹⁷Yë Wintsën wa'ats winë tuny ma nyë'ë'aaw tyu'u'aawën, aak'oy winë tuny tkäjpxy.

¹⁸Yë Wintsën winkon yajpaaty ma ja'ayën mëti'ipë mëkajpxëpën, mëti'ipë mëkajpxëpën winë aaw winëjot.

¹⁹Yë'ë kyuuytyuunpy ets yaj'atëëpy yë tsyojkën ma ja'ayën mëti'ipë mëjja'aw jaanty ja'awëyëpën. Ko y'amëtoyë yë putëjk pupäjtën, yë'ë ënätyë tmëtoy ets tyajtso'oky.

²⁰Yë Wintsën kyuwäämpy mëti'ipë tsojkëyëpën ja'awëyëpën, e yë ëxëëkja'aytyëjk yajkutëkoopy poj'am.

²¹Ëjts nmëjpëjkta'akäämpyës yë Wintsën. Wä'än tëkokyë tmëjjaw tkënu'kxyjyawëtë yë Wintsën tyam ets xëmëkyëjxm.